chapter 4
Pala kadal viziovo dikhlom, haj aketa, vudar puterdyilas ando cheri, haj o angluno glaso, savo sar fanfari ashundyolas, kade vorbilas mange: „Av opre kathe, haj sikavav tuke sa kodo, so pala kado andre trubuj te pherdyol!”
Ande kodo minuto ando transo pelom, haj aketa krajicko iskamin tordyolas ando cheri, haj po krajicko iskamin beshelas varikon.
Kon kothe beshelas cirdelas leski mosura kaj o jashpisho haj karneolo: kushtik lelas krujal le krajickone iskamines, kasavi sar le shmaragdoski rang.
Le krajickone iskamines bish thaj shtar iskamin lelas krujal, haj pe iskamina bish thaj shtar phure beshenas ande parne gada uradines, pe lengo shero somnakuni korona.
Anda krajicko iskamin strafina denas angle, haj baro bashadyipe ashundyolas avri. Efta rolya phabonas angla krajicko iskamin: le Devleske efta duhura.
Angla krajicko iskamin glazhuni mara sas, kasavi sar krishtalo te avilino, haj ande krajicko iskaminesko mashkar, haj krujal kaj krajicko iskamin shtar zhuvindimata, anglal haj palal pherdo jakhenca.
O angluno zhuvindipe po levo cirdelas, o dujto zhuvindipe po biko cirdelas, le tritone zhuvindipes, sar manusheki mosura te avilinosasles, haj o shtarto zhuvindipe po huraldo akvilno anelas.
Le shtare zhuvindenge savorazhenen shov-shov phakha sasle, krujal-krujalutnes haj andral pherdi sas jakhenca. Vi dyese vi ratyi sagda kodo phenenas:”Suntoj, suntoj, suntoj o Raj, o sagutnokerimasko Del, kon sas haj kon si haj kon avla!”
Kana kadal zhuvindimata luvudyipe, patyivipe haj ashtyilipe phendine kodaleske, kon po krajicko iskamin beshelas, le sagutno-sagutnes trajisarimaske,
le bish thaj shtar phure tele burdosardyiline angla kodo, kon po krajicko iskamin beshelas, kamenas le sagutno-sagutnes trajisardines, tele shutine pengi korona angla krajicko iskamin, haj kade dine duma:
„Perelpe, Raja, Devla, ke tyiro te avel o luvudyipe,
e patyiv haj o saktimo, ke tu kerdan sakofalo, haj anda tyiro kamipe kerdyiline le zhuvindimata!”