Janosheske viziovura

chapter 19


Chapters:


Vojisaripe ando rajo


verse #1

Pala kado, sar varisoske butezhenengo glaso te ashundomas ando cheri:
„Alleluja! Drobovjipe, luvudyipe
haj saktimo amare Devleske,


verse #2

ke chachej haj chachimaskej leske krisarimata,
ke krisaripe phendas pe bari marhimaski romnyi, kon peske marhimasa rumusardas la phuva, haj oprepushlas peske slugango rat pe lake vast!”


verse #3

Pala kado pale kado phendine: „Alleluja! Haj laki thuv oprehuraldas sagutno-sagutnes!”


verse #4

Atunchi le bish thaj shtar phure haj le shtar zhuvinde pe mosura burdosajline, haj luvudyinas le Devles, kon pe pesko krajicko iskamin beshelas: „Amen! Alleluja!”


verse #5

Kathar o krajicko iskamin pale jekh glaso das duma:
„Phenen asharipe savorazhene amare Devleske,
tume leske slugi, haj kon les daran, cine haj bare!”


verse #6

Pala kodo, sar varisoske bare kethanimasko glaso te ashundomas, kasavo sar kana le bare paja zurales bashadyon, haj sar kana o cheri bashadyol:
„Alleluja! Ke rajilpe o Raj,
amaro Del, o Sagutnokerari!


verse #7

Losshas haj vojisajvas,
haj das leske o luvudyisaripe, ke reslas le Bakresko abav
haj leski piramni gataj aba!


verse #8

Davadyilas lake, ke ande ablyolinde haj parne poxtana te uravelpe; ke o poxtan le suntonge chache trabij.”


verse #9

Atunchi kade das mande duma: „Iskirisarles: Anandej kas akhardine pe Bakresko abav!” Pala kodo kado phendas mange: „Kadal le Devleske chache alavaj.”


verse #10

Atunchi kaj leske punre burdosajlom, ke te luvudyisarav les, ba voj kade das duma mande: „Lesama, na ker kado, ke me tyiro slugimasko amal som, haj tye phralenge, kaste le Jezushesko chacharipe si. Le Devles luvudyisar, ke le Jezushesko chacharipe le profecimasko duhoj.”


Telemaren le turbatopedos haj leske profetan


verse #11

Atunchi dikhlom o puterdo cheri, haj aketa jekh parno grast, haj kon pe leste beshelas, kodaleske Chacho sas lesko anav, haj chachikanes krisarel haj marelpe.


verse #12

Leske jakha pale kasavej sar e jag, haj pe lesko shero but koroni. Kasavo anav siles opreiskirime pe leste, so numa voj haj khonyik kraver chi pinzharel.


verse #13

Kathar o rat kinde gada sas urado, haj kadoj lesko anav: le Devlesko Alav.


verse #14

Le chereske ketani avenas pala leste pe parne grast, ande parne haj uzhe poxtan uradines.


verse #15

Anda lesko muj duj rigako xanro lunzhosajlas avri, ke kodalesa te marel le popularon. Voj lasharela len sastruna rolyasa, haj voj pizdela le sagutnokerimaske Devleski bladosardo xolyako pizdari.


verse #16

Pe leske gada haj pe lesko mashkar kado si iskirime: Krajengo Kraj haj rajengo Raj!


verse #17

Pala kodo dikhlom jekhe andyelos ando kham te tordyol, savo glasunes kade cipilas sakone chiriklyange, save pe cheresko uchipe huranas: „Aven haj aven ande jekh pe Devlesko baro xamo,


verse #18

ke krajenge masa te xan, haj netanonge masa, haj grastenge masa, haj kodalenge, kon pe lende beshen, haj sakone slobodone manusheske haj slugange haj cineske haj bareske masa!”


verse #19

Dikhlom, ke o turbatopedo haj la phuvake kraja haj lenge ketani kethane aven, ke te marenpe kodalesa, kon po grast beshel haj leske ketanenca.


verse #20

Ba o turbatopedo phanglo pelas, haj lesa kethanes vi o xoxamno profeta, kon le somnura kerelas anglaleste, savenca xoxadas kodalen, kon opreline le turbatopedosko somno, haj kon luvudyinas lesko mosuripe. Kadale dujen ande zhuvindo kenosa phabardo jagako paji shudine.


verse #21

Le majbuten pale kodo mudardas, kon po grast beshelas peske xanresa, so anda lesko muj tordyolas avri. Le chiriklya sa chajiline anda lenge masa.

Chapters:


Books