Janosheske viziovura

Chapters:

… 14 15 16 17 18 …   ⇤ ← 16 → ⇥

verse #1

Atunchi jekh zuralo glaso ashundom anda khangeri, savo kade das duma kaj le efta andyela: „Zhantar haj shoren avri le Devleske xolyake efta kuchan pe phuv!”

verse #2

Gelastar o angluno haj avrishordas peski kuchi pe phuv, pe kado dukhardo haj zhungalo phumb kerdyilas pe manusha, kon le turbatopedosko somno phiravenas, haj pe kodol, kon lesko mosuripe luvudyinas.

verse #3

Haj vi o dujto andyelo avrishordas peski kuchi ande mara, haj kodi rateske kerdyilas, sar le mulesko, haj sako zhuvindyipe mulas ande mara.

verse #4

Haj vi o trito avrishordas peski kuchi ande aba haj pajengo anglalipe, haj kodal rateske kerdyiline.

verse #5

Ashundom le pajenge andyelos, sar kado phendas: „Chachimasko san Raja, kon san, haj kon sanas, sunto, ke kade krisardan,

verse #6

ke suntonge haj profetange rata mukline avri, rat dan len te pen. Chachikanes pelaspe lenge!”

verse #7

Haj vi jekhe kaveres ashundom kathar o oltaro te del duma: „Kade si Raja, sagutnokerimasko Del, chachej haj chachimaskej tye krisarimata!”

verse #8

Haj vi o shtarto andyelo avrishordas peski kuchi po kham, apol kadaleske davadyilas, ke tatyimatasa te dukharel le manushen, haj jagasa.

verse #9

Haj le manushen phabarelas o baro tatyipe, haj kushenas le Devlesko anav, kas saktimo si pe prikezhimata, haj chi kade chi inkerdine bezexbunuipe, ke les te luvudyisaren.

verse #10

Haj vi o panzhto andyelo avrishordas peski kuchi pe turbatopedosko krajuno iskamin. Pe kado kodalesko them tunyariko kerdyilas, haj penge shiba dindalenas ande penge dukha.

verse #11

Kushenas le chereske Devles anda penge dukhimata haj varura; ba chi inkerdine bezexbunuimata anda penge trabi.

verse #12

Haj vi o shovto andyelo avrishordas peski kuchi ande kodo baro ab, saves Eufrateseske akharen, haj avri shutyardas kodalesko paji, ke drom te keradyol kodale krajenge, kon pa khamorienteski rig aven.

verse #13

Haj dikhlom, ke anda drakosko muj, anda turbatopedosko muj haj anda xoxamne profetasko muj trin biuzhe dichimata aviline avri, sar zhanbi te avnas,

verse #14

ke le bengenge duhuraj kadal, save somnura keren, haj kaj la phuvake sakono kraj zhantar, ke kethane te kiden len po maripe pe sagutnokerimaske Devlesko baro dyes.

verse #15

– Aketa, kade avav, sar o chor! Anandoj kodo, kon ratyarel, haj samalel pe peske gada, ke nanges tena phirel, haj tena dikhen lesko lazhavo!

verse #16

Haj kethane kidel len pe kodo than, saves hebericka Harmageddoneske anavaren. –

verse #17

Haj vi o eftato andyelo avrishordas peski kuchi ando oxigeno, haj vazdino glaso ashundyilas anda khangeri, kathar o krajicko iskamin: „Pecisardyilas!”

verse #18

Haj strafinimata, haj bare bashadyimata kerdyiline, haj kasavo zurales mishkisajlas e phuv, sar inke chikana nas zhikaj manush si pe luma, kade mishkisajlas e phuv, kasve zurales!

verse #19

O baro foro pe trin riga shindyilas, le popularonge forura kethane peline, haj o Del serosardyilas pa bari Babilononia, ke peska xolyake molake palpale dino taxtaj te del lake.

verse #20

Nachilastar sako niso, haj chi le plaja chi dichonas khatik.

verse #21

Zurales baro, shel kili pahosko brishind shindyilas tele anda cheri pe manusha, haj le manusha kushenas le Devles anda paho-brishindesko prikizhipe, ke kodo zurales baro sas.

Chapters:

1 2 3 4 5 6 7 8 9 10 11 12 13 14 15 16 17 18 19 20 21 22