chapter 22
Pala kodo sikadas mange le trajoske pajesko ab, savo ablyolas sar o krishtalo, haj so anda Devlesko haj Bakresko krajicko iskamin arakhadyilas haj shordyolas.
Pe leski vujicako mashkar haj pe abesko solduj dolma le trajesko kasht sas, savo deshuduvar upajil frukto; haj le kashteske patra le popularon sastyaren,
Chi avla majbut armaja po foro, ba le Devlesko haj le Bakresko krajicko iskamin tordyol ande leste, haj leske slugi slugina leske.
Dikhena leski mosura, haj pe lengo chikat avla lesko anav.
Chi avla majbut ratyi, haj chi trubula len majbut phabardako fimlalipe, chi khamesko fimlalipe, ke o Raj, o Del fimlalisarela len, haj rajisarena sagutno-sagutnes.
Atunchi kade das duma mande: „Kadal alava chaikanes chachej, haj o Raj, le profetange duhongo Del bishaldas peske andyelos, ke te sikavel peske slugange sa kodo, soske na pa buteste trubuj te pecisardyoltar.
Aketa, na pa buteste avotar. Anandoj, kon andre inkrel kadala hertijake profecimaske alava!”
Me som o Janosh, kon ashundom haj dikhlom kadal. Pala soste ashundom haj dikhlom, tele burdosajlom angla andyeloske punre, kon mange kadal sikadas, ke te luvudyisarav les.
Ba voj kdo phendas mange: „Le sama, na ker! Ke me slugicko amal som tuke, haj tye phralenge, le profetange, haj kodalenge, kon andre inkren kadala hartijake profecimaske alava. Le Devles luvudyisar!”
Pala kodo kade das duma: „Na stemplosar tele la hertijake profecimaske alava, ke e vrama pashe si!
Kon dosh kerel, kodo mukh te kerel vi majdur dosh, haj kon melaloj, te avel inke majmelalo, ba kon chachoj, te avel inke majchacho, haj o sunto te avel inke majsunto!
Aketa, na pa buteste avotar, haj muro potyinipe manca si, ke te potyinav sakoneske kathar leske trabi, sar perelpe.
Me som o Alfa haj o Omega, o angluno haj o paluno, o anglalipe haj o agoripe.
Anandej, kon thoven penge gada ande Bakresko rat, ke saktimo te avel len pe trajosko kasht, haj perdal pa vudara, andre te zhan ando foro!
Avri kathar le zhuklenca, tilarenca, marhisardenca, le mudarenca, le fetishon kamlenca, haj sakonesa, kon o xoxavjipe kamel haj kerel!
Me o Jezush, bishaldom mure andyelos, ke angla tumende chacharipe te kerel pa kadal ande eklezhiji. Me som le Davideski rikita haj o nyevo barilipe, o fimlalo zorimaskocherhaj!”
O Duho haj e piramnyi kade del duma: „Avtar!” Haj kon ashunelles, vi kodo phenel: „Avtar!” Kon trushajvel, te aveltar; haj kon kamel, te bolel ive anda trajesko paji!
Ke chacharipe keren angla sakoneste, kon ashunel kadala hertijake profecimaske alava: Varikon pashe te shol kaj kadal variso, pe kodol o Del kodal prikezhimata mukel, so tele si iskirime ande kadi hertija.
Haj kana varikon lela variso anda kadala hertijake profecimaske alava, kathar kodo o Del lela leski rig anda trajosko kasht, anda sunto foro, haj sa anda kodo, so tele si iskirime ande kadi hertija.
Kon chacharipe kerel sa pa kadal, kade del duma:
„Bater, na pa buteste avotar.”
„Amen. Avtar, Raja Jezush!”
Te avel amare Raj Jezush Kristoski gracija savorazhenenca! Amen.