Janosheske viziovura
2. fejezet
La Efezushickone eklezhijake
1. vers
Le efezushickone andyeloske iskirisarles:
Kade del duma kodo, kon le efta cherhajan inkrel ande pesko chacho vast, kon mashkar le efta somnakune memelyenge inkritora phirel:
2. vers
Pinzharav tye kerdyimatan, tyo khinyardyipe haj tya pachako toleranshipe, haj ke chi kames le nasulen; ke avrizumadan kodalen, kon aposhtolenge phenen pen, ba naj kodal, haj xoxamnenge arakhlan len.
3. vers
Pachako san, haj dukhardyilan anda muro anav, haj chi khinyilantar.
4. vers
Ba dosh arakhlom ande tute: kodo, ke muklan tyo angluno kamipe.
5. vers
Serosar apol pe kodo, kathar pelan avri, inker bezexbunuimata, haj ker kodo, so angla kado keresas: ke tena, atunchi opreushtyavav pe tute haj mishkisarav pa pesko than tye memelyake inkritoros, tena inkresa bezexbunuimata.
6. vers
Ba kodo ande tute si, ke te rucis le nikolitenge trabi, so vi me rucisarav.
7. vers
Kas si kan te ashunelles, so phenel o Duho la Eklezhiake: Le viktornisareske dav te xal pa trajosko kasht, so ande Devlesko paradajzo si!
La smirnaicka eklezhiake
8. vers
La samirnaicka eklezhiake andyeloske iskirisarles:
Kade del duma o angluno haj o paluno, kon mulo sas haj trajil:
9. vers
Pinzharav tyo kikidyipe haj tyo chorripe – ba chaches barvalo san –, haj kushen tut kodal, kon biboldenge phenen pen, apol naj kodala, ba le shatanoske zhinagogij.
10. vers
Na dara khanchi kathar kodal, so dukharesa! Aketa o beng mashkar tumende unyizhenen ande robija shudela, avri te zumavel len, haj tumaro kikidyipe desh dyes inkrela. Av chacho zhikaj o meripe, haj tuke dav le trajoski korona.
11. vers
Kas siles kan te ashunelles, so phenel o Duho la eklezhiake: Kon angluno avla, ande kodo chi kerel dosh o meripe!
La pergamonicka eklezhiake
12. vers
La pergamonicka eklezhiake andyeloske iskirisarles:
Kade del duma kasko le duj rigako xanro si:
13. vers
Zhanav, ke kaj beshes; kothe kaj le shatenesko kher si: haj avri inkres pasha muro anav, haj chi asvikardan tyo patyape inke chi ande kodal dyesa, kana o Antipas mure chachares, mure patyamnes mudardine mashkar tumende, kaj o shatano beshel.
14. vers
Ba arakhlom ande tute vi unyi dosh, ke si kothe tute patyamne le Balameske sityarimaske, kon pe kodo sityarelas le Balakos, te xoxvel le Izraeleske shaven, ke anda sarkafimasle maseste te xan haj te marhinpe.
15. vers
Kade vi tute si kasave, kon patyan le nikolitengo sityaripe.
16. vers
Inker apol bezexbunuimata vi tu, ke tena atunchi sigo pe tute do, haj maroma kodolenca mure mujeske xanresa.
17. vers
Kas si kan te ashunelles, so phenel o Duho la eklezhiake: le angluneske garadi manna dav haj jekh cino parno barr, po cino barr iskirisardines pale jekh nyevo anav, so khonyik chi pinzharel, numa kodo, kon lelles.
La tiatiricka eklezhiake
18. vers
La tiatiricka eklezhiake andyeloske iskirisarles:
Kade del duma le Devlesko Shavo, kaske jakha kasave si sar e jag, haj leske punre cirden po galbeno xarkom:
19. vers
Pinzharav tye kerdyimatan, tyo patyape, kamipe, slugipe haj pachako toleranshipe, haj tye palune trabi, save majbutindej kathar anglalutne.
20. vers
Ba arakhlom ande tute jekh dosh, ke mukes la Jezabel romnyake, kon pes profetazhulyake phenel, te sityarel, haj peste te xoxavel mure slugan, ke te marhinpe haj te xan anda fetishongo sarkafimosaripe.
21. vers
Vrama dom la te inkrel bezexbunuipe, ba chi kamel bezexbunuipe te inkrel pe pesko marhipe.
22. vers
Aketa, ando pato peravav la, haj kon lasa ansuripe phagen opre, ando baro kikidyipe avna, kana chi inkrena bezexbunuipe anda penge trabi.
23. vers
Lake shaven merimasa mudarav, haj zhanela sako eklezhia, ke me som le rinyikonge haj le ilonge perdal dikhari, haj potyino mashkar tumenge sakoneske, sar perelpe kathar lenge trabi.
24. vers
Tumenge pale kodo phenav haj le majbutenge, kon ande Tiatira sanle, kon chi patyan kado sityaripe, haj kon chi pinzhardine le shatanoske milnomata, sar phenen: Chi shav pe tumende kaver pharipe!
25. vers
Ba so si tumen, kaj kodo cirdadyon, zhikaj chi avotar!
26. vers
Kon pale angluno avla haj inkrela mure trabi,
kodaleske saktimo dav pe populara,
27. vers
ke sastruna rolyasa te lasharel kodalen,
haj te phagerdyontar, sar o mitticko vaso,
28. vers
sar vi me lomles kathar muro Dad, haj leske dav le zorimaske cherhajes.
29. vers
Kas si kan te ashunelles, so phenel o Duho la eklezhiange!
Könyvek
