Janosheske viziovura
1. fejezet
Anglardivorba
1. vers
Le Jezush Kristosko avrisikadyipe, so o Del das leske, ke te sikavel peske slugenge sa kodo, soske na pa buteste trubuj te pecisardyol. Bishaldas peske andyelos, haj avriphendas peske slugaske, le Janosheske,
2. vers
kon chacharipe kerdas pa Devlesko alav haj pa Jezush Kristosko chacharipe, sa pa kodo, so dikhlas.
3. vers
Anandoj kodo, kon ginavel haj kon ashunel kadale profecimaske alava, haj andre inkrel sa kodo, so ande kodo tele si iskirime, ke e vrama pashe si.
Anglelasharipe
4. vers
O Janosh le efta eklezhiange, so ande Azhia si. Gracija tumenge haj pachipe kathar kodo, kon si haj kon sas haj kon avlimaskoj; haj kathar le efta duhura, kon angla lesko krajunoiskamin si;
5. vers
haj kathar o Jezush Kristo, kon chacho chacharij, angluno arakhadyilino le mulenge, haj kraj le phuvakire krajenge; kon kamel amen haj thodas amen kathar amare bezexa perdal pa pesko rat,
6. vers
haj le Devleske haj peske krajimaske rashajeske shutas amen; leskoj o luvidyipe haj o saktimo sagutno-sagutnes! Amen.
7. vers
Aketa pe norura avel, haj dikhela les sakone jakha, haj kon les perdal pusadine. Penge kolyina marena maj le intregone populara anda leste. Ova! Amen.
8. vers
Me som o Alfa haj Omega, phenel o Raj, o Del, kon si, haj kon sas haj kon avlimaskoj: o Sgutnokerimasko.
Le Janosheski butyi
9. vers
Me, o Janosh tumaro phral haj amal ando kikidyipe haj ande Jezushesko pachimasko toleranshipe, pe Patmosesko niso somas anda Devlesko alav haj anda Jezushesko chacharipe.
10. vers
Ando transo pelom pe Rajesko dyes, haj pala muro dumo kasavo baro glaso ashundom, sar o fanfari,
11. vers
so kade ashundyolas: „So dikhes iskirisar tele andekh hertija, haj bishal kodo le efta eklezhiange, so ande Azhia si, ando Efezush, Samaria, Pergamono, Tiatira, Sardes, Filadelfia haj ande Laodicea!”
12. vers
Boldomman te dikhav o glaso, so manca vorbilas: haj kana boldadyilom, efta somnakuno memelyengo inkritori dikhlom,
13. vers
haj mashkar efta somnakune memelyake inkritora kasaves, sar le Manushesko Shavo te avilino, zhikaj e koch resenas leske gada, haj lesko kolyin somnakune brichinaresa sas krujal brichinisardo.
14. vers
Lesko shero haj leske bal parne sas, sar e parni postila, haj sar o jiv, haj leske jakha pale kasave sar e jag.
15. vers
Leske punre kasave sas, sar ande bov vrazdisardino xarkom, haj lesko glaso, sar le bare pajengo bashadyipe.
16. vers
Ande pesko chacho vast efta cherhaja inkerlas, haj anda lesko muj duj rigako xanro tordyolas avri. Leski mosura kasavo sas, sar ando intrego fimlalipe ablyosardo kham.
17. vers
Kana dikhlom les angla leske punre pelom, sar jekh mulo. Pesko chacho vast pe mande shutas, haj kodo phendas: „Na dara, me som o angluno haj o paluno,
18. vers
o zhuvindo, ba chaches mulo somas: ba aketa, trajiv sagutno-sagutnes: mande si le merimaske haj la telalutna lumake kiji.
19. vers
Iskirin apol opre, so dikhlan haj so si, haj savenge inke pala kado trubuj te pecisardyontar!
20. vers
Le efta cherhajengi tajna, so ande muro chacho vast dikhlan, haj le efta somnakune memelyenge inkritoron: le efta cherhaja le efta eklezhiange andyelaj: haj le efta memelyenge inkritora le efta eklezhiji si.
Könyvek
