Le Aposhtolenge trabi
21. fejezet
Le Palesko drom ando Jeruzhalemo
1. vers
Kana pala soste shindyilamtar lendar, avriberardam, haj vorta dromesa ande Kosba reslam, kaver dyes ando Rodos, kothar pale ande Patara.
2. vers
Kana rakhlam kasavo bero savo ande F”nicia zhalas, andre hulyilam, haj majdur berardam.
3. vers
Kana opredichosardyilas angla amende o Ciprush, kodo pa stungo rig nakhlines muklam, pala kodo ande Siria berardam, haj reslam ando Tiruso, ke o bero kothe shutas avri so ingrelas.
4. vers
Pala soste le sityarden arakhlam, kothe ashilam inke efta dyes. Kodal perdal pa duho kodo phendine le Paleske, ke tena zhal opre ando Jeruzhalemo.
5. vers
Ba pala unyidyesa vi kade majdur gelam. Von pale savorazhene peske romnyanca haj shavorenca kethanes avriaviline amenca anda foro zhikaj e dolma, haj kothe changa dines rudyisarasas.
6. vers
Pala soste dyes dam jekhavrestar, ame po bero hulyilam, von pale khere geline kaj pengirende.
7. vers
Pe berosko agoruno zhalipe tele gelam anda Tirus ando Ptolemaiso. Patyivisardam amare phralen haj jekh dyes lende ashilam.
8. vers
Kaver dyes majdur gelam, haj ande Cezaria reslam. Kathe andre gelam ande Filip evangelaresko kher, haj leste ashilam, kon mashkar le efta o jekh sas.
9. vers
Shtar shejora sasles, haj kadal profetalinas.
10. vers
Zhikaj ame unyidyesa ashilam, jekh Agabus anavesko profeta reslas kothe anda Judea.
11. vers
Kothe avilas amende, xutyildas le Palesko brichinari, phanglas lesa peske punre haj vast, haj kade das duma: „O Sunto Duho kadal phenel: Kodole murshes, kaskoj kado brichinari, le bibolde kade phandena ando Jeruzhalemo, haj perdal den les ande murtikanonge vast.”
12. vers
Kana kado ashundam, vi ame mangasas les, haj vi kodal kon kothe beshenas, ke tena zhal opre ando Jeruzhalemo.
13. vers
Ba o Pal kado phendas: „So keren, sostar roven haj brigaren muro ilo? Haj ke me gata som anda Raj Jezushesko anav na feri pe kodo, ke te phanden man, ba ke vi te merav ando Jeruzhalemo.”
14. vers
Haj ke chi zhanglam tele te vorbisaras les, tele pachardyilam, haj kade vorbisardam: „Te avel kade, sar o Raj kamel!”
15. vers
Pala kadal dyesa dromardamtar, haj opregelam ando Jeruzhalemo.
16. vers
Anda Cezaria vi unyi sityarde amenca aviline. Penca andine le Mnazones, jekhe Ciprushickone dulmutane sityardes, ke leste te ratyaras.
17. vers
Kana ando Jeruzhalemo reslam, le phral losshanas amenge.
O Pal kaj o Jakab: le Paleski colax
18. vers
Kaver dyes o Pal amenca kethanes andre gelas kaj o Jakab, haj vi le preshbitera savorazhene kethane aviline.
19. vers
Pala soste dyes das len, sakofalo phendas, ke so kerdas o Del mashkar le murtikana perdal pa lesko slugipe.
20. vers
Kodal pale, pala soste ashundine les, luvudyinas le Devles, leske pale kodo phendine: „Dikh, phrala, but miji si mashkar le bibolde, kon patyamne kerdyiline, ba savorazhene daramnes andre inkren la krisa.
21. vers
Ba pa tute kodo ashundine, ke kathar o Mozesh durutnaripe sityares kodale bibolden, kon mashkar le murtikana si. Kodo phenes lenge, ke chi trubuj chi penge shaven krujal te shinaven, haj chi le tradiciji andre te inkren.
22. vers
So trubuj apol te keras? Ke nashtig, krujisaras kodo, ke le manusha tena aven kethane, kana ashunena, ke reslan.
23. vers
Ker apol kodo, so phenas tuke. Si amende shtar mursh, kon colax line pe pende.
24. vers
Le len pasha tute, suntosardyu lenca, potyin anda lende, ke te muravenpe. Atunchi sakon zhanela, ke naj chaches, so pa tute ashundine: boldines, vi tu andre inkres e kris, haj vi kade trajis.
25. vers
Apol pa kodal, kon anda murtikana kerdyiline patyamne, ame iskirisardam amaro vladipe, ke te ferinpe kathar le kaj fetisha sarkafimasle butya, kathar o rat, kathar le tasade pedura haj kathar o marhipe.”
26. vers
Pe kado o Pal pasha peste las le murshen, kaver dyes uzharipe kerdas, lenca kethanes andre gelas ande khangeri, haj phendas, ke le uzhimaske dyesa tele nachiline, kana anda savorazhene andre sikaven o sarkafimo.
Le Palesko telexutyilipe
27. vers
Ba kana aba o eftato dyes lokhes tele nachilas, anda Azhia aviline bibolde dikhline les ande khangeri, oprexolyardine le intrega manushen, haj xutyildine les.
28. vers
Mashkaral kado cipinas! „Izraelicka murshale! Zhutisaren! Kado kodo manush si, kon po popularo, pe kris haj pe kado than sityarel sakones pe sakorig, haj inke vi le murtikanon andre andas ande khangeri, haj marhisardas kado sunto than!”
29. vers
Ke lesa dikhline kethanes le efezushicka Trofimoses ando foro, haj pa leste gindisardine, ke o Pal andre ingerdas les ande khangeri.
30. vers
Vi mishkisajlas o intrego foro. Le manusha kethane aviline, xutyildine le Pales, haj avri ingerdine les anda khangeri, le vudara pale ande kodo minuto andre phandadine.
31. vers
Kana aba pe kodo sas, ke te mudaren les, kodi viaca reslas kaj le prefektosko mijari, ke o intrego Jeruzhalemo oprekirilas.
32. vers
Kodo sigo ketanen haj shelaren las pasha peste, haj tele sidyardas lende. Kodal pale, kana dikhline le mijares haj le ketanen, chi marenas majdur le Pales.
33. vers
Atunchi o mijari kothe ushtyilas, xutyildas les, haj pe sastra mardas les. Pala kodo pushlas, ke kon si kado, haj so kerdas.
34. vers
Ba mashkar e butimata jekh manush kaki kaver pale kuko cipilas, haj ke chi ashunelas mishto, ke cipinas, ando dyiz ingeradas les.
35. vers
Ba kana kaj o gradicho reslas, pecisajlas, ke kathar le manushengo maripe aba le ketanenge trubulas te ingren les.
36. vers
Ke le but manusha palaleste nashenas, haj kodo cipilas: „Mudar les”!
37. vers
Kana ando dyiz kamline andre te ingren le Pales, voj kade das duma kaj o mijari: „Slobodo si variso te phenav tule?” Kodo pushlas les: „Tu zhanes hellenicka?
38. vers
Haj na tu san kodo Edyiptomicko, na tu kerdan ande kadal dyesa bida, haj avri ingerdan ande pusta shtar miji sikaruishicka manushen?”
39. vers
O Pal kodo phendas leske: „Me biboldo manush som anda cicilcko Tarzusho, kodale pinzharde foroske som me lesko nagrivo. Ba mangav tut, mukh mange, te shaj vorbisarav kaj le manusha!”
40. vers
Kana kado muklas leske, ke shaj vorbil, o Pal po gradicho tordyindes sikadas le manushenge peske vastesa. Pe kado baro silenco kerdyilas. Voj pale duma das pe le biboldengi shib, haj kado phendas:
Könyvek
