Le Aposhtolenge trabi
14. fejezet
Ando Ikoniumo, Listra haj Derbe
1. vers
Ando Ikonumo pale kodo pecisardyilas, ke savorazhene andre geline ande biboldengi zhinagoga haj vorbinas, kade ke anda bibolde haj hellena but zhene patyamne kerdyiline.
2. vers
Ba mashkar kodal bibolde kon chi patyanas, oprexolyardine le murtikanongo duho pe phral.
3. vers
Ba vi kade kothe ashiline na cerra vrama, haj patyanas zurales majdur ando Raj, kon chacharipe kerdas pasha pesko gracijicko alav: ke muklas, ke somnura haj chudimata te kerdyon kathar lenge vast.
4. vers
Ba le foroske manusha alosardyilinetar. Sas kon le biboldenca, kavera pale le aposhtolenca inkrenas.
5. vers
Kana pale le murtikane haj le bibolde pe lende kamline te den le anglalara manushenca kethanes, te maren len haj barrenca te shuden len,
6. vers
haj von avri zhangline kado, kade gelinetar ande Likaonesko foro, ande Listra, ande Derbe, haj krujal krujal ande intrego provincia.
7. vers
Ande intrega riga viacarenas o evangeliumo.
8. vers
Sas ande Listra jekh paralizane punresko manush, kon zhikathar pesko arakhadyipe langardo sas, haj chikana zhanelas te phirel.
9. vers
Ashunelas le Pales kana vorbilas. O Pal pe leste dikhlas, haj ke dikhlas, ke patyal ando sastyipe,
10. vers
glasunes kodo phendas: „Tordyu opre vorta, pe tye punre!” Kodo oprexuttyilas haj phirelas.
11. vers
Kana le but manusha dikhline, ke so kerdas o Pal, pe likaonicko shib oprecipisardine: „Le Devleske manusha ando trupo uradinepe, haj tele huralyline amende!”
12. vers
Le Barnabashes Jupitereske anavardine, le Pales pale Merkureske, ke voj ingrelas e vorba.
13. vers
Angla foro tordyilino Jupiter-khangerako rashaj bikura haj luludya andas angla vudara, haj la butimatasa kethane sarkafimo kamlas andre te sikavel.
14. vers
Kana le aposhtolura, o Barnabash haj o Pal ashundas kado, shingerdine penge gada, cipindes avrisidyardine mashkar e butimata,
15. vers
haj kado phendine: „Murshale, sostar keren kado? Vi ame zhikasave manusha sam sar tume, haj kodo viacaras tumenge, ke kathar kadal khanchi kerde butya te bolden tumen karing o trajisardo Del, kon le cheres haj la phuva kerdas, la mara haj sa kodo, so ande lende si.
16. vers
Ande dulmutane vrami muklas sakone murtikanoske, ke pe pesko drom te phirel,
17. vers
ba chi pes chi muklas bi chacharimasko, ke lasho kerdas anda cheri: brishind, lashe vrami das, haj andre pherdyardas amaro ilo xamosa haj losshasa.”
18. vers
Zhisar phenenas kadal, ba vi kade phares pachardine tele le manushen, ke tena sikaven andre lenge sarkafimo.
19. vers
Anda Antiochia haj Ikoniumo unyi bibolde palalende avilas. Oprexolyardine le manushen, haj barrenca shudine le Pales. Pala kodo avri ingerdine les anda foro, ke kodo gindisardine, ke mulas.
20. vers
Ba kana le sityarde krujal line les, opre ushtyilas, haj andre gelas ando foro. Kaver dyes pale le Barnabashesa gelastar ande Derbe.
Palpale zhalipe ande Siria
21. vers
Pala sote vi kadale foroske viacardine o evangeliumo haj butenge sityarenas, palpale geline ande Listra, Ikoniumo, haj Antiochia.
22. vers
Sar zhanas po drom zurardine le sityardengo duho, haj ferinas len, ke te ashon ande pengo patyape. Phendine lenge, ke pa but pharimata perdal trubul andre te zhan ande Devlesko them.
23. vers
Haj pala sote ande unyi eklezhiji postyisardes haj rudyindes preshbiteron vladisardine lenge, le Rajeske inbisardine len, ande kaste patyanas.
24. vers
Pala kodo perdal geline pa Pizidia, haj ande Pamfilia resline.
25. vers
Pala sote vi ande Perge viacarenas le Rajesko alav, tele geline ande Attalia,
26. vers
kothar pale berardinetar ande Antiochia, kathar ande Devleski gracija imbisardines bishaldine len pe akanak kerdi butyi.
27. vers
Kana resline haj kethane kidine la eklezhia, phendine sakoneske, ke soske bare butya kerdas o Del perdal pa lende, haj ke le patyapesko vudar puterdas vi le murtikanonge.
28. vers
Pala kado dosta butaig kothe ashiline le sityardenca.
Könyvek
