Le Aposhtolenge trabi
10. fejezet
Le Kornelius shelaresko viziovo ande Cezaria
1. vers
Sas ande Cezarea jekh Kornelius anavesko manush, le Italeske anavardo betaljanesko shelaari.
2. vers
Sa peske familiasa kethanes patyalas ando Del, but dimatipe delas le manushenge, haj sagda rudyilas kaj o Del.
3. vers
Jekhar, kana kaj o ijjato chaso phirelas e vrama ando viziovo uzhes dikhlas, ke le Devlesko andyelo andre avilas leste, haj kodo phendas leske: „Kornelius!”
4. vers
Voj pe leste dikhlas, haj daramnes kodo phendas: „Soj, Raja?” Pe kado kodo kade das duma: „Tye rudyimata haj tyo dinipe opre hurajline angla o Del, haj voj serosajlas pa tute.
5. vers
Anda kado bishal akanak manushen ande Joppe, haj akharav kathe jekhe Shimon anaveske manushes, kas vi Petereske akharen.
6. vers
Kado kaj jekhe Shimon morchari ratyardas, kasko kher pasha e mara si. Voj maj phenela tuke, ke so trubul te keres.”
7. vers
Kana nachilastar o andyelo, kon vorbilas leste, kothe akardas peske duje slugan haj mashkar peske ketani jekhes, kon daralas le Devles.
8. vers
Sakofalo phendas lenge, haj bishaldas len ande Joppe.
Le Peteresko viziovo ande Joppe
9. vers
Kaver dyes pale, kana von inke po drom phirenas, haj kaj o foro pashardyonas, karing le shov chasura o Peter opregelas pe kheresko opralutnipe te rudyil.
10. vers
Ba mashkaral bokhajlas, haj kamlas te xal. Zhikaj kerenas leske, ando transo pelas.
11. vers
Puterdes dikhlas le cheres, haj jekh vaso muklyosardyilas tele, kasavo sar jekh baro colo, saves kathar leske shtar riga muken tele pe phuv.
12. vers
Sakofalo shtare punrenge, phuvake reptansha haj chiriklya sas ande leste.
13. vers
Jekh glaso kade das duma leste: „Ushtyi opre Peter, mudarles haj xales!”
14. vers
Ba o Peter kodo phendas: „Dur te avel mandar Raja, ke chikana chi xalom kasavo haj biuzho!”
15. vers
Ba o glaso pale vorbilas leste vi po dujto: „So o Del uzheske kerdas, kodales na phen biuzheske!”
16. vers
Kado trival inke pecisardyilas, pala kodo o vaso jekharsa oprevazdadyilas ando cheri.
17. vers
Zhikaj o Peter pa kodo gindilaspe ande peste, ke so somnosarel o viziovo, so dikhlas, le manusha, saven o Kornelius bishaldas, rodine le Shimonesko kher. Tordyiline kaj o vudar,
18. vers
andre cipisardine haj pushenas, dore o Shimon kas vi Petereske akharen, kothes si apol?
19. vers
Le Petereske pale, zhikaj pa viziovo gindilaspe o Duho kodo phendas: „Trin manusha roden tut.
20. vers
Ushtyi opre apol, zha tele, haj zhatar lenca kaj phenen, ke me bishaldom len.”
21. vers
O Peter kade tele gelas kaj le manusha, haj kade das duma: „Aketa, me som, kas roden. Anda soste aviline?”
22. vers
Kadal kodo phendine: „O Kornelius shelari, chacho haj Del daramno manush, kas le intregone bibolde kamen, kathar jekh sunto andyelo vladipe las, ke te akharavel tut ande pesko kher, haj te ashunel tutar le alava.”
23. vers
Pe kado andre ingerdas len haj das lenge e patyiv.
Le Korneliuseko bolaripe Kaver dyes pale opreushtyilas haj gelastar lenca. Unyizhene mashkar Joppicka phral lesa inkerdine.
24. vers
Po kaver dyes vi reslas ande Cezaria. O Kornelius aba zhukarelas len. Kethane akhardas peske nyamon haj lashe vortakon.
25. vers
Haj pecisajlas, ke kana o Peter andre ushtyilas, o Kornelius angla leste avilas, haj kaj leske punre burdosardes das leske e patyiv.
26. vers
Ba o Peter oprevazdas les haj kade das duma: „Ushtyi opre, ke vi me manush som!”
27. vers
Pala kodo las te vorbilpe lesa, andre gelas leste, haj bute zhenen arakhlas kothe kethane avilines.
28. vers
Kadalenge kodo phendas: „Zhanen kodo vi tume, ke o biboldo manush, sar palpale inkrelpe kathar kodo, ke strenonca te kerdyol vortako, bake andre te ushtyavel ande lesko kher. Ba o Del pe muro zhanipe andas, ke khanyikas tena dikhav tele bake biuzheske.
29. vers
Anda kado uzhe ilesa avilom po akharipe. Pushav apol: Anda soste akhardine man?”
30. vers
O Kornelius pe kado kodo phendas: „Ande kado chaso, ke shtar dyes kadalake, ke karing o ijjato chaso rudyisaros ande muro kher, haj aketa, jekh mursh tordyilas angla mande ande parne gadande.
31. vers
Kodo phendas: »Kornelius, tyo rudyipe po ashundyipe arakhlas, haj pa tye dimata serosardyiline angla o Del.
32. vers
Anda kado apol bishal ande Joppe, haj akharav le Shimones, kas vi Petereske akharen. Kaj o Shimon morcharesko kher ratyardas savo pasha mara si.«
33. vers
Sigo tute bishaldom apol, haj tu mishto kerdan, ke avilantar. Aketa, akanak savorazhene kathe samle angla tute, ke te ashunas sa kodo, so o Raj vladisardas tuke.”
34. vers
Atunchi o Peter las te vorbil: „Chachikanes kodo dikhav, ke o Del chi alosarel mashkar le manusha,
35. vers
ba boldines si, skunpoj leske sakono popularesko shavo, kon daral les haj o chachipe kerel.
36. vers
O Del bishaldas pesko alav le Izraeleske shavenge, kana pachipe viacardas perdal pa Jezush Kristo, kon sakofaloske Raj si.
37. vers
Vi tume zhanen, ke so pecisardyilas kathar e Galilea zhikaj e Judea, pala soste so o Janosh viacarelas o bolaripe:
38. vers
Ke sar makhlas opre Suntone Duhosa haj zorasa le Nazaretickone Jezushes, kon krujal phirdas, lasho kerdas, haj sastyardas sa kodolen, kas hurajlas o beng, ke o Del lesa sas.
39. vers
Ame pale chachara sam sa kodaleske, so voj ande biboldengo them haj ando Jeruzhalemo kerdas. Po kasht opre cirdines mudardine les.
40. vers
Ba o Del po trito dyes opretrajardas les, haj das leske, te sikadyol,
41. vers
na le intregone manushenge, ba kathar o Del avrialosardirenge, amenge, kon xasas haj pasas lesa, pala soste anda meripe opretrajisardyilas.
42. vers
Vi vladisardasles amenge, ke te viacaras les le manushenge, haj te chacharas andre, ke voj si kodo, kas o Del le zhuvindenge haj mulenge krisareske shutas.
43. vers
Pa leste kerel chacharipe le intrega profeta, ke perdal pa lesko anav sakon resel le bezexengo jertipe, kon feri patyal ande leste.”
44. vers
Kana o Peter kadal vorbi phenelas, o Sunto Duho tele hurajlas sa pe kodola, kon ashunenas o alav.
45. vers
Kodal kon patyanas ando krujalshinipe, bari dikhline, ke vi pe kodal tele hural le Suntone Duhoski gracija, kon murtikana sas.
46. vers
Ke ashunenas len pe shiba te vorbisaren, ke asharenas le Devles.
47. vers
Atunchi o Peter kodo phendas: „Dore shaj asvikaras le bolimaske pajes kathar kodal, kon le Suntone Duhos zhikade resline, sar ame?”
48. vers
Vladisardas apol, ke te bolen len ande Jezush Kristosko anav. Atunchi mangline les, ke te ashol lende inke unyidyesa.
Könyvek
