Le Aposhtolenge trabi
13. fejezet
Le Barnabashesko haj le Shaulesko bishavlipe
1. vers
Ande Antiochicko eklezhia but profeta haj sityara sas, mashkar lende o Barnabash haj o Shimon, kas Nigereske anavarenas, o cirenicko Lucius, haj inke o Manaen, le Herodesh fertajicke krajesko chuchako phral haj o Shaul.
2. vers
Zhitala soste kadal le Rajesko slugipe kerenas haj postyinas, o Sunto Duho kodo phendas lenge: „Alosaren mange le Barnabashes haj le Shaules pe butyi, pe soste akhardom len!”
3. vers
Pe kado postyipe inkerdine, rudyinas, pe lende shutine penge vast, pala kodo po drom bishaldine len.
Anda Antiochia perdal pa Ciprusho ande Perge
4. vers
Von apol kathar o Sunto Duho bishaldines tele geline ande Seleukia, kothar pale ando Ciprush berardine.
5. vers
Resline ando Salamiso, haj viacarenas le Devleske alaves ande biboldengi zhinagogi. Vi o Janosh ande lengo slugipe sas.
6. vers
Kana andre phirdine zhikaj o Pafos le intregone nisos, arakhline jekhe Barjezush anaveske manushes, kon tilarimo kerelas haj xoxamno manush sas.
7. vers
Le Sergius Paulus prokonzulesa, jekhe platnike manushesa sas, kon peste akhardas le Barnabashes haj le Shaules, ke kamelas te ashunel le Devleske alaves.
8. vers
Ba o Elimas o tilarimari – ke lesko anav kado somnosarel –, kecilaspe, opre kamlas te lel le prefektos, ke tena patyal.
9. vers
Ba o Shaul, kas vi Paleske phenen, Sunto Duhosa pherdyardes pe leste dikhlas,
10. vers
haj kade das duma: „Tu sakono xoxamnipesa haj nasulipesa pherdo bendyale, sakone chachimasko dushmano, ta chi nachostar le Rajeske vorta dromen tena rumusares?
11. vers
Aketa, akanak le Rajesko vast pe tute si, korrajves, haj jekh vrama chi dikhes le khameskiluma.” Ande kodo minuto tunyarikipe shindyilas pe leste, haj krujal phirindes rodelas, ke varikon pesko vast te lunzharel leste.
12. vers
Pe kado o prokonzulo patyalas, ke dikhlas, ke so pecisajlas, haj chudilaspe pe Rajesko sityaripe.
13. vers
Pala kodo o Pal haj kon lesa sas, berardinetar anda Pafos, haj ande pamfilicko Perge resline. Ba o Janosh muklas len haj palpale gelas ando Jeruzhalemo.
Le Barnabasheske haj le Paleske trabi ande pizidicko Antiochia
14. vers
Von pale perdal geline pa Perge, haj ande pizidicko Antiochia resline. Savatone andre geline ande zhinagoga haj tele beshline.
15. vers
Pala krisango haj profetango opreginavjipe la zhinagogake anglalara lende bishaldine kadala viacasa: „Murshale, phralale, te si variso ferimata pel manushengi rig, phenenla!”
16. vers
O Pal opretordyilas apol, haj peske vastesa pe pacha sikadindes duma das: „Izraelicka murshale, haj tume deldaramne, ashunen apol!
17. vers
Le Izraelicka manushengo Del avrialosardas amare daden haj bareske kerdas le popularos, kana pe Edyiptomeski phuv avlimara sas von. Pala kodo bare vastesa avri ingerdas len kothar,
18. vers
haj shtarvardesh bersh toleralisarelas lenge trabi ande pusta,
19. vers
pala kodo pe Kanaaneski phuv efta popularon mudardas, haj avri ginavjipesa avrialosardas lenge kodalenge phuva,
20. vers
karing pe shtarshela thaj panzhvardesh bersh. Pala kodo krisara das len zhikaj o Shamuel profeta.
21. vers
Kathar kadi vrama aba krajes doronas, haj o Del pe shtarvardesh bersh le Shaules das lenge, le Kiseske shaves, kon anda Benjamineski kunpania sas.
22. vers
Pala kado le David krajes das lenge, pasha kaste vi chacharipe kerdas, kado phendines: »Kathar muro ilo pashardo manushes arakhlom, le Jesseske shaves, le Davides, kon kerla maj muro sakono kamipe«
23. vers
Anda leski familia kerdas o Del, sar vi phendasla, le Izraeleske muntosares, le Jezushes,
24. vers
angla kaste o Janosh le bezexbunuimasko bolaripe viacarelas le Izraeleske interga manushenge.
25. vers
Haj kana o Janosh andre agorutnisardas peski traba, kodo phendas: »Na kodo som, kaske inkren man, aketa, pala mande avel, kaske chi som dosta chi leske sandale tele te putrav.«
26. vers
Murshale, phralale! Le Abrahameske falura haj kon mashkar tumende si deldaramne! Kadale muntuimasko alav amende bishaldyilas.
27. vers
Ke le Jeruzhalemeske manusha haj leske anglalara chi patyivisardine les, ba penge krisarimasa andre pherdyardine vi le profetange vorbi, saven sako savatone opreginaven.
28. vers
Ke chaches chi arakhline khanchi dosh te mudaren les, vi kade o mudaripe mangenas kathar o Pilatush.
29. vers
Pala soste sakofalo kerdine, so tele sas iskirime pa leste, tele line les pa kasht, haj ando murmunto shutine les.
30. vers
Ba o Del opretrajardas les anda o meripe,
31. vers
haj inke but dyesa sikadyilas kodalenge, kon lesa kethanes aviline opre anda Galilea ando Jeruzhalemo. Kadal chacharipe keren pa leste zhikaj kado dyes angla le manusha.
32. vers
Vi ame le dadenge phendi vorba viacaras tumenge,
33. vers
ke o Del amenge, leske shavenge kerdas, kana opretrajardas le Jezushes, so vi iskirime si ando dujto salmo:
»Muro shavo san tu,
adyes kerdom tut«
34. vers
Haj ke opretrajardas les anda meripe, haj ke aba majbut chi zhala palpale ando nachilipe, kade phendasles:
»Tumenge dav so le Davideske
phendom gracijimata«.
35. vers
Zhianda kado phenel vi jekh kaver than:
»Chi mukes, ke tyo Sunto,
rumuvjipe te dikhel«.
36. vers
Ke o David, pala soste ande peski vrama le Devlesko kamipe slugisarelas, mulas, pasha peske dada shutine les, haj dikhlas o rumuvjipe.
37. vers
Ba kodo kas o Del anda meripe opretrajardsas, chi dikhlas rumuvjipe.
38. vers
Zhanen avri apol murshale, haj phralale, ke perdal pa leste viacaras tumenge le bezexenge jertimata, haj sa kathar kodo, so perdal pa Mozesheske krisa nashtig chachardyon,
39. vers
perdal pa leste sakon chachardyol, kon patyal.
40. vers
Len sama anda kado, ke andre tena pherdyol pe tumende, so e profeta phendas:
41. vers
»Dikhenles, tume phutyarde,
chudintume haj nachontar,
ke ande tumare dyesa jekh butyi kerav,
kasavi butyi, so china chi patyanas,
kana varikon te phenelasles tumenge«”.
42. vers
Kana apol avrigeline, mangenas len, ke vi po kaver savato te vorbin lenge pa kadal trabi.
43. vers
Haj inke, kana gelinetar anda zhinagoga, mashkar le bibolde haj deldaramne but zhene zhanas pala o Pal haj o Barnabash, von pale zurarenas len, ke te ashon ande Devleski gracija.
44. vers
Po kaver savato aba dore o intrego foro kethane avilas, ke te ashunel le Devleske alaven.
45. vers
Ba kana le bibolde dikhline le bute manushen, xutyildas len o daramnipe, haj mashkar kushlimata na phendine le Paleske.
46. vers
Pe kado o Pal haj o Barnabash tromanes kado phendine: „Majanglal tumenge trubusardas te viacaras le Devlesko alav, ba ke tumenge chi trubuj kado, haj chi inkren tumen dostaske po sagutno trajo, aketa, kaj le murtikana boldas amen,
47. vers
ke kade vladisardas amenge o Raj:
»Le murtikanonge fimlalimaske shutom tut,
te slugis le muntuipes
zhikaj la phuvaki maj paluni granica«”.
48. vers
Kana le murtikana ashundine kado losshajline, haj asharenas le Devleske alaves. Vi patyanas savorazhene, kon po sagutno trajo sasle shutime.
49. vers
Le Rajesko alav pale butardyilas ande intrego provincia.
50. vers
Ba le bibolde opre xolyardine le patyamne haj rajkane romnyan, haj le foroske manushen. Nashavjimata vazdine po Pal haj po Barnabash, haj avri nashadine len anda pengi granica.
51. vers
Kadal tele mardine pe lende penge punrengo praho, haj gelinetar ando Ikoniumo.
52. vers
Le sityarde pale pherdyiline losshasa haj Suntone Duhosa.
Könyvek
