Le Aposhtolenge trabi
20. fejezet
O Pal ande Makedonia haj ande Akhaj
1. vers
Pala kado o Pal peste akhardas le sityarden, zurardas len, pala kodo dyes dasle, haj dromardastar te zhaltar ande Makedonia.
2. vers
Pala soste andre phirdas kodal phuva, butivar vorbilas haj ferilas len, gelastar ande Hellenicko them,
3. vers
haj kothe ashilas trin shon. Kana ande Siria kamlas te berarel, le bibolde perdal kamline te maren les. Anda kado kodo gindisardas, ke perdal pa Makedonia avel palpale.
4. vers
O bereaicko Sopater, le Pirrosesko shavo sas lesko amal, mashkar le Tessalonikicka pale o Aristarchos haj Sekundus, haj inke o derbeicko Gajus haj Timoteush, palunes anda Azhia o Tichikus haj o Trofimus.
5. vers
Von geline anglal, haj zhukardine amen ande Troas.
6. vers
Ame pale pe bi kamir manrenge dyesa berardamtar anda Filippi, haj pala panzh dyes reslam len ande Troas, kaj efta dyes ashilam.
O Pal dyesareltar kathar troasicka patyamne
7. vers
Pala kurkesko angluno dyes, kana kethane avilam po manresko phaglipe, o Pal las te vorbil lenge. Ke apol kaver dyes kamelas te dromareltar, zhikaj e dopash ratyi lunzhardas e vorba.
8. vers
Ande opralutni soba, kaj kethane avilam, sas dosta phabardi.
9. vers
Ba mashkaral jekh shavo kaske Eutichus sas lesko anav, kon ande fejastra beshelas haj sutastar, ke o Pal butaig vorbilas, pizdasles e lindra, tele pelas pa trito opralutnipe, haj mules lineles opre.
10. vers
O Pal tele gelas leste, pe leste burdosajlas, angaji dasles, haj kade das duma: „Na daran, ke lesko duho ande leste si!”
11. vers
Pala kodo opregelas, phaglas o manro haj xalas, vorbilas inke butajig, zhikaj o zoripe, pala kodo dromardastar.
12. vers
Le shaves pale zhuvindes andine kothe, haj sagutnes ushordyiline.
Anda Troaso ando Miletos
13. vers
Ame pale po bero hulyilam, haj ando Assoso berardam, ke kothe opre te las le Pales. Ke kado vladisardas, ke voj po shuko kamlas te dromarel.
14. vers
Kana pale kethane maladyilas amenca ando Assos, opre lam les, haj ando Mitileno gelam.
15. vers
Kathar berardamtar, haj kaver dyes angla o Khios reslam. Kaver dyes kaj o Samosono phanglam avri, haj po kaver dyes vi reslam ando Miletos.
16. vers
Ke o Pal kade gindisardas, ke pasha o Efezus berarelatar, ke tena trubul te ashol ande Azhia. Sidyarelas, ke te shaj, pe rusajako dyes aba ando Jeruzhalemo te avel.
Le Palesko vorbipe ando Miletos
17. vers
Anda Miletos apol vorba bishaldas ando Efezusho, haj akharadas la eklezhake phuren.
18. vers
Kana kodal kothe resliline, haj kethane sasle, kade das duma lende: „Zhanen, ke zhikathar o angluno dyes kana ande Azhia avilom, sar somas tumenca ande intrego vramate.
19. vers
Slugisardom le Rajeske intregone kamipesa, mashkar le asva haj dukha, so kathar le biboldenge azbaimata resline man.
20. vers
Khanchi so trubulas chi muklom, sakofalo viacardom tumenge, sityaros tumen angla sakoneste haj vi ande khera.
21. vers
Chacharipe kerdom vi angla bibolde, haj vi angla murtikana, pa karing o Del boldipe haj pa Jezush Kristo, ande amaro Raj patyamnipe.
22. vers
Haj akanak aketa, ando duho phangles zhavtar ando Jeruzhalemo, haj chi zhanav, ke so sakofalo zhukarel kothe pe mande.
23. vers
Feri kodo zhanav, so o Sunto Duho ande sako foro zhanaravel manca, ke sastra haj dukhimata zhukaren pe mande ando Jeruzhalemo.
24. vers
Ba chi darav kathar kadal. Chi muro trajo chi inkrav majbuteske, sar man, numa te shaj kerav muri traba, le alavesko slugipe, so kathar o Raj Jezush lom, ke chacharipe te kerav pa Devleski gracijamsko evangeliumo.
25. vers
Vi kodo zhanav aba, ke mashkar tumende, mashkar kaste phirdom, haj kaske viacardom le Devlesko them, khonyik chi dikhela muri mosura.
26. vers
Ba vi kade phenav tumenge, ke chi shutyol pe mande khanyikasko rat.
27. vers
Ke chi cirdos man kathar kodo, ke te viacarav tumenge le Devlesko sagutno kamipe.
28. vers
Len sama pe tumende haj po intrego kethanipe, pe saveste o Sunto Duho anglalarenge shutas tumen, ke te lasharen le Devleski eklezhia, so peske ratesa rodas.
29. vers
Zhanav, ke pala sote zhavtar, turbata ruv avena mashkar tumende, haj chi ferina le kethanipes.
30. vers
Haj inke vi mashkar tumende avna mursh, kon boldine vorbi phenena, ke pende te pasharen le sityarden.
31. vers
Len sama anda kado haj inkren ande tumaro serovjipe, ke tala trin bersh ratyi thaj dyese mashkar le asva sagutnes ferisaros tumen.
32. vers
Akanak pale le Devleske inbisarav tumen, haj leske gracijasle alaveske. Les siles saktimo, ke butaripe haj mukhlimata te del le intrega suntosardirenge.
33. vers
Chi dorosardom khanyikasko rup, bake somnakaj bake gada.
34. vers
Tumendar zhanen, ke kadal vast kerdine butyi anda kodo, so trubusardas man haj kodalen, kon manca si.
35. vers
Ande sakofaloste andre sikadom tumenge, ke kade trubuj te keren, te zhutisaren pe slabura, haj te serosardyon pa Raj Jezusheske vorbi, ke voj phendas: »Maj baro anandimo si kana den, sar kana len.«”
36. vers
Pala soste kadal phendas, changa das, haj jekharsa rudyilas savorazhenenca.
37. vers
Kodal pale savorazhene line zurales te roven, haj ande leski kor burdosardes chumidenas les.
38. vers
Kodo phenipe dukhalas lenge majfeder, ke chi dikhena aba majbut leski mosura. Palutnes pale geline lesa zhikaj o bero.
Könyvek
