Le Romaivonge iskirisardo lil

Fejezetek:

… 6 7 8 9 10 …   ⇤ ← 8 → ⇥

1. vers

Naj aba khanchi doshaki kris pe kodal, kon ando Kristo Jezush si.

2. vers

Ke ando Kristo Jezushikano duhoski kris slobodisardas man kathar e bezex haj merimaski kris.

3. vers

Ke so nashtipe sas la krisake, ke o trupo bi zorake shutasla, o Del – kon bishaldas anda bezex peske chache Shaves ande kasavo trupo, so anelas pe bezexako trupo –, xasardas la bezexa ando trupo,

4. vers

ke la krisako vladipe andre te pherdyol ande amende, kon chi trajisaras kathar o trupo, ba kathar o duho.

5. vers

Le truposko manush apol le truposke butya kamel te resel, le duhosko manush pale le duhikane kamel te resel.

6. vers

Ke le truposko kamipe o meripe si, le duhosko kamipe pale o trajo haj e pacha,

7. vers

ke le truposko kamipe o na muklipe si le Devleske, ke chi mukelpe le Devleske krisake, ke china chi zhanelas te kerel kodo.

8. vers

Apol kade le truposko manush nashtig avel skunpo angla o Del.

9. vers

Tume apol na truposke, ba duhoske manusha san, kana chachikanes le Devlesko Duho beshel ande tumende. Ba ande kaste naj andral le Kristosko Duho, kodo naj lesko.

10. vers

Ba o Kristo ande tumende te si, chaches ke o trupo muloj anda bezex, ba o duho trajil perdal pa chachardyipe.

11. vers

Haj kodalesko Duho te beshel ande tumende, kon opretrajardas le Jezush Kristos anda meripe, opretrajarel vi tumaro mulikano trupo perdal pa pesko Duho, so ande tumende beshel.

12. vers

Apol kathar kado, phralale, chi samle le truposke slugi, ke kathar o trupo te trajisaras.

13. vers

Ke kathar o trupo te trajisarenas, meren, ba le duhosa te mudarena le truposke kerdyimata, trajina.

14. vers

Ke kas le Devlesko Duho zhutil, kodal le Devleske shave si.

15. vers

Ke na le slugimasko duho line, ke pale numa te daran, ba le shavoreske linipesko duho, ande soste kodo cipisaras: „Abba, Dade!”

16. vers

Apol o Duho kerel chacharipe amare duhosa, ke le Devleske shave sam.

17. vers

Apol kana leske shave sam, atunchi vi o muklipe amaroj: le Devleske aranda sam, le Kristoske pale amal aranda, ke lesa kethanes dukharas, ke lesa kethanes vi te luvudyisajvas.

18. vers

Kodo gindisarav, ke sa kodo, so akanak dukharas, nashtig pasharas kethane le avlimaske luvudyipesa, so sikadyola pe amende.

19. vers

Ke e kerdi luma dorosajves zhukarel, ke le Devleske shave te dichosajven.

20. vers

Ke e kerdi luma le khanchimaske si telalutni, na anda pesko kamipe, ba kodo perdal, kon pherdyardasla la tofnake speratimatasa.

21. vers

Ke vi e kerdi luma opreslobodisajvela tala rumuvjimasko slugipe, pe le Devleske shavengo luvudyimasko slobodipe.

22. vers

Ke zhanas, ke sako kerdyipe jekharsa phurdel pharo dyi haj dukharel zhikaj kodo.

23. vers

Ba na feri von, vi ame, kon ande amende phiravas le Duhoske kolimata: vi ame phurdas pharo dyi andralutnes, haj zhukaras le xutyilde shavipes, amare truposko muntuipes.

24. vers

Amaro drobovjipe sperantako si. Te dikhas kodo, so sperantisaras, kodo na sperantipej: ke kon sperantilas kodo, so dikhel?

25. vers

Kana pale kodo sperantisaras, so chi dikhas, atunchi vi zhukaras kodo pachasa.

26. vers

Zhikade vi o Duho pe amaro zhutipe si ande amaro bi zoripe, ke chi zhanas, ke sar trubuj te mangas, so mangas: ba o Duho zhutisarel amenge kasave phare dyi phurdimatanca, so ande vorba nashtig phenen avri.

27. vers

Ba kon perdal hatyarel le ilen, zhanel, ke savej le Duhoske mangajimata, zhanel, ke zhutisarel anda suntura kade sar o Del kamel kodo.

28. vers

Zhanas, ke kon kamen le Devles sakofalo pe lengo mishtyipe perel, kodalenge, kon kathar leski vorba trajin, suntura te aven.

29. vers

Ke kas aba pinzharelas, kodalen pe kodo trajardas, ke kasave te cirden pe leske Shavo, haj kade voj angluno arakhadyilino te avel mashkar le but phral.

30. vers

Kas pale trajardas, kodalen vi akhardas: haj kas akhardas, kodalen vi chachardyimaske kerdas; kas pale chachardyimaske kerdas, kodalen vi luvudyisardas.

31. vers

So te phenas sa pala kadal? Kana amencaj o Del, kon si dushmano amenge?

32. vers

Voj, kon chi peske chache Shaves chi sunusardas, ba kothe dasles anda amende, anda savorazhenende, apol chi delas lesa kethanes sakofalo amenge?

33. vers

Kon avlas doshari le Devleske alosardenge? O Del si kodo, kon o chachardyipe del:

34. vers

kon avlas apol kodo, kon dosharelas? Dore o Kristo Jezush, kon mulas, so majbut, vi opretrajisardyilas, pe Devleski chachi rig si, haj zhutisarel amen?

35. vers

Kon shaj shinel amen kathar le Kristosko kamipe? Chorripe bake kikidyipe? Bokh, nangipe, bida, nashavjipe bake xanro?

36. vers

Sar iskirime si:
„Anda tute mudaren amen sorro dyes,
kade dikhen amen, sar kodale bakren
saven tele mudaren”.

37. vers

Ba sa kadalen tele zhanas te viktornisaras kodaleske zhitipesa, kon kamel amen.

38. vers

Ke kodo zhanav, ke chi meripe, chi trajo, chi andyela, chi kraja, chi le akanutne, chi le avlimaske, chi e zor,

39. vers

chi uchipe, chi milnope, chi kaver sosko kerdyipe nashtig shinel amen kathar le Devlesko kamipe, so ando Kristo Jezush, ande amaro Raj si.

Fejezetek:

1 2 3 4 5 6 7 8 9 10 11 12 13 14 15 16