Le Romaivonge iskirisardo lil

Fejezetek:

… 7 8 9 10 11 …   ⇤ ← 9 → ⇥

1. vers

Chachipe phenav ando Kristo, chi xoxavav, muro duhipe pashamande shol chacharipe ando Sunto Duho,

2. vers

ke baroj muro brigipe haj mure ileski dukh sagutnes.

3. vers

Ke kodo mangos, ke me te avav sar armajaslo dur kathar o Kristo anda mure phral, kathar mure truposke phrala,

4. vers

anda izraelicka, kaskej le shavorimaske svagaripe, o luvudyipe, le konvenciji, o krisipe, le Devlesko patyivipe haj le paratnimata.

5. vers

Lengej le dada, haj kathar o trupo vi o Kristo mashkarutno si lenge, kon pe sakofaloste oprralutnoj, sagutnes ashtyilime Del si. Amen.

6. vers

Kodo nashtig avel, ke le Devlesko alav nachilisardyilas. Ke na sakon izraelitaj, kon anda Izrael si:

7. vers

haj china na savorazhene le Abrahameske shavora si anda kodo, ke leske faluraj: ba”Le izhakeske falon phenena tyire faloske”.

8. vers

Kaver vorbasa: na kodalenge shavora si Del, kon le truposke shavoraj, ba le vorba dimatake shavora, kodal si le falura.

9. vers

Ke e vorba kado phenel: „Ande kadal vrami avotar, haj la Shara shavo avla”

10. vers

Kado na feri laki traba sikavel, ba vi la Rebekaki, kon jekhestar, kathar amaro Izhak dad kerdas shaves,

11. vers

ke so majanglal te arakhadyilinesas, haj so majanglal lasho bake nasul te kerdinesas – anda kodo, ke le Devlesko slobodo alosaripe te ashol –,

12. vers

na anda kerdyimata, ba anda akhardesko kamipe kado phenipe line: „o baro avla le cineski sluga”,

13. vers

sar iskirime si: „Le Jakobos kamos, le Ezhaues pale rucisaros”.

14. vers

So phenas kaj kado? Naj kado bi chachipe kathar o Del? Naj.

15. vers

Ke phendas le Mozesheske: „Sunusajvav pe kodo, pe kaste sunusajvav, haj jertisarav kodaleske kaske jertisarav”.

16. vers

Apol na pe kodo tordyol, kon kamel, bake zurarel, ba po jertimasko Del.

17. vers

Ke o Iskiripe kodo phenel le Faraovoske: „Anda kodo kerdom tut, ke te sikavav pe tute muro saktimo, haj muro anav pe intrego luma te viacaren”.

18. vers

Kodaleske jertisarel apol, kaske kamel, haj kodales kerel jekhtuneske, kas kamel.

19. vers

Kodo phenes mange maj pe kado: „Atunchi sostar krisarel vi kade? Ke kon shaj kerlas kaver kathar lesko kamipe?”

20. vers

Manusha! Kon san tu te krisarestu le Devlesa? Dore pushel o vaso kathar pesko kerdari: „Sostar kerdan man kasaveske?”

21. vers

Naj apol saktimo le vasareske pe materia, ke zhianda kodi materia le jekhe vasaos pe patyivali butyi te kerel, le kaveres pale po bi patyivalo?

22. vers

O Del pale na peski xolyi kamlas te sikavel haj pesko saktimo te dikhavel, haj na anda kodo phiravelas le xolyake butyan pachasa, so pe pustimata kerdyiline?

23. vers

Haj na anda kodo te pinzharavel peske luvudyimasko barvalipe pe le lashimaske butya, saven po luvudyipe kerdas,

24. vers

sar vi ame sam, kas akhardas na feri mashkar le bibolde, ba vi mashkar le murtikane?

25. vers

Sar kaj o Ozeash phenel:
„Kon naj muro popularo, kodales mure popularoske akharo,
haj na le skunpones skunponeske”.

26. vers

Haj atunchi kado avla:
„Pe kodo than, kaj kodo phendine lenge:
«Tume chi san muro popularo«,
kothe le trajisarde Devleske shavenge akharena len”.

27. vers

O Izajash pale kado viacarel pa Izrael: „Kana le Izraeleske shave kattyi zhene avna, sar pe maraki dolma e char, numa le ashilimarde muntosardyona.

28. vers

Ke peski vorba andre pherdyarela haj sidyardes vi kerela o Raj pe phuv”.

29. vers

Sar anglal vi phendas o Izajash:
„Kana le ketanengo Raj chi muklino amenge falon,
kade phirdamas, sar e Sodoma,
haj kasave avilamas, sar e Gomorra”.

30. vers

So te phenas apol? Kodo ke le murtikana, kon chi phiren pe le chachardyimasko drom, resline o chachardyipe, apol anda patyape inkerdo chachardyipe?

31. vers

Apol boldines o Izrael kamelas te resel le chachardyipeski kris, haj chi kade chi reslas pe chachardyipeski kris.

32. vers

Sostar? Ke na le patyapesa, ba perdal pa kerdyimata kamlas kodo te resel. Pelinetar ande pelimasko barr,

33. vers

sar iskirime si:
„Aketa, ando Sion tele shav le pelimasko barr
haj la bidako plaj,
haj khonyik chi lazhajvelatar,
kon patyal ande leste”.

Fejezetek:

1 2 3 4 5 6 7 8 9 10 11 12 13 14 15 16