Le Romaivonge iskirisardo lil
7. fejezet
Le kristianonge kathar e kris inkerdino slobodipe
1. vers
Bake chi zhanen phralale – haj ke kaj kasave dav duma, kon pinzharen e kris –, ke e kris zhikaj kodo rajilpe po manush, zhikaj trajil?
2. vers
La romnya kris phandel kaj pesko zhuvindo rom, ba kana lako rom merel, opreslobodisajvel tala romeski kris.
3. vers
Ansuripe opre phagarake phenen la, kana kaver mursheski kerdyol, zhikaj lako rom trajil; ba kana lako rom merela, slobodo avla kathar peske romeski kris, haj aba chi phagela ansuripe, kana kaver mursheski avla.
4. vers
Zhikade vi tume phralale, muline kathar e kris perdal pa Kristosko trupo, ke kavereske te aven, kodalesko, kon anda meripe opretrajisardyilas, haj kade frukto te upajisaras le Devleske.
5. vers
Ke kana kathar o trupo trajisaras, perdal pa krisa le bezexenge hatyarimata trajin ande amaro trupo, haj kodal le meripeske keren frukto.
6. vers
Ba akanak, pala soste mulam kodaleske, so amen phangles inkerdas, opreslobodisajlam tala kris, ke ando nyevo dyi te slugisaras, haj na kathar le dulmutane iskirimata.
Le nasulipeski zor: e kris, le bezexa haj o meripe
7. vers
So te phenas apol? Ke e kris bezex si? O Del te »rakhel haj te feril! Ba la bezexa chi pinzharos, numa perdal pa kris, haj chi o dorope chi pinzhardomas, kana e kris chi phenelas: „Na dorosar!”.
8. vers
Be e bezex, ke kathar o vladipe rig rakhlas, opretrajardas ande mande sakono dorope: ke bi krisako mulo si e bezex.
9. vers
Varikana vi me bi krisako trajisaros, ba kana o vladipe reslas, e bezex opretrajisardyilas,
10. vers
me pale mulom, haj o vladipe, saveske trajo trubusardino te del man, menge meripe andas.
11. vers
Ke e bezex savi rig arakhlas kathar o vladipe, xoxadas man, haj mudardas man.
12. vers
Kade apol e kris suntoj, haj vi o vladipe suntoj, chachoj haj lasho.
13. vers
Kodo kerdas apol muro meripe, so lashoj? Na. Ba e bezex, ke bezexake te sikadyol, muro meripe kerdas kasave varisosa, so lashoj, haj kade e bezex inke maj bezexaki kerdyilas kathar o vladipe.
14. vers
Ke zhanas, ke e kris duhoskij, me pale truposko som, sluga la bezexake.
15. vers
Chi me chi hatyarav, ke so kerav, ke na kodo kerav, so kamav, ba kodo kerav, so rucisarav.
16. vers
Ba kana kodo kerav so chi kamav, mishtyarav la krisa, ke lashij.
17. vers
Kade aba china na me kerav kodo, ba e bezex, kon ande mande beshel.
18. vers
Ke zhanav, o lasho chi beshel ande mande, apol ande muro trupo: ke si ande mande kamipe po lasho, ba o lasho te kerav chi zhanav.
19. vers
Ke chi kerav o lasho, so kamav, ba kodo kerav, so chi kamav, o nasul.
20. vers
Kana pale kodo kerav, so chi kamav, aba na me kerav kodo, ba e bezex, so ande mande beshel.
21. vers
Kade apol me, kon lasho kamel te kerel, kodi kris arakhav, ke o nasul tordyol mande pashe:
22. vers
Ke andralutnes muro shukaripe rakhav ande Devleski kris,
23. vers
ba kaver kris hatyarav ande muro trupo, haj kado marelpe mura godyake krisasa, haj la bezexake krisake phangleske shol man, so ande muro trupo si.
24. vers
O, me bi baxtalo manush! Kon slobodisarel man anda merimasko kado trupo?
25. vers
Le Devleski gracija, perdal pa amaro Raj, pa Jezush Kristo. Kade apol me kathar muri godyi le Devleske krisake slugisarav, ba kathar o trupo la bezexake krisake.
Könyvek
