Le Romaivonge iskirisardo lil

Chapters:

… 5 6 7 8 9 …   ⇤ ← 7 → ⇥

verse #1

Bake chi zhanen phralale – haj ke kaj kasave dav duma, kon pinzharen e kris –, ke e kris zhikaj kodo rajilpe po manush, zhikaj trajil?

verse #2

La romnya kris phandel kaj pesko zhuvindo rom, ba kana lako rom merel, opreslobodisajvel tala romeski kris.

verse #3

Ansuripe opre phagarake phenen la, kana kaver mursheski kerdyol, zhikaj lako rom trajil; ba kana lako rom merela, slobodo avla kathar peske romeski kris, haj aba chi phagela ansuripe, kana kaver mursheski avla.

verse #4

Zhikade vi tume phralale, muline kathar e kris perdal pa Kristosko trupo, ke kavereske te aven, kodalesko, kon anda meripe opretrajisardyilas, haj kade frukto te upajisaras le Devleske.

verse #5

Ke kana kathar o trupo trajisaras, perdal pa krisa le bezexenge hatyarimata trajin ande amaro trupo, haj kodal le meripeske keren frukto.

verse #6

Ba akanak, pala soste mulam kodaleske, so amen phangles inkerdas, opreslobodisajlam tala kris, ke ando nyevo dyi te slugisaras, haj na kathar le dulmutane iskirimata.

verse #7

So te phenas apol? Ke e kris bezex si? O Del te »rakhel haj te feril! Ba la bezexa chi pinzharos, numa perdal pa kris, haj chi o dorope chi pinzhardomas, kana e kris chi phenelas: „Na dorosar!”.

verse #8

Be e bezex, ke kathar o vladipe rig rakhlas, opretrajardas ande mande sakono dorope: ke bi krisako mulo si e bezex.

verse #9

Varikana vi me bi krisako trajisaros, ba kana o vladipe reslas, e bezex opretrajisardyilas,

verse #10

me pale mulom, haj o vladipe, saveske trajo trubusardino te del man, menge meripe andas.

verse #11

Ke e bezex savi rig arakhlas kathar o vladipe, xoxadas man, haj mudardas man.

verse #12

Kade apol e kris suntoj, haj vi o vladipe suntoj, chachoj haj lasho.

verse #13

Kodo kerdas apol muro meripe, so lashoj? Na. Ba e bezex, ke bezexake te sikadyol, muro meripe kerdas kasave varisosa, so lashoj, haj kade e bezex inke maj bezexaki kerdyilas kathar o vladipe.

verse #14

Ke zhanas, ke e kris duhoskij, me pale truposko som, sluga la bezexake.

verse #15

Chi me chi hatyarav, ke so kerav, ke na kodo kerav, so kamav, ba kodo kerav, so rucisarav.

verse #16

Ba kana kodo kerav so chi kamav, mishtyarav la krisa, ke lashij.

verse #17

Kade aba china na me kerav kodo, ba e bezex, kon ande mande beshel.

verse #18

Ke zhanav, o lasho chi beshel ande mande, apol ande muro trupo: ke si ande mande kamipe po lasho, ba o lasho te kerav chi zhanav.

verse #19

Ke chi kerav o lasho, so kamav, ba kodo kerav, so chi kamav, o nasul.

verse #20

Kana pale kodo kerav, so chi kamav, aba na me kerav kodo, ba e bezex, so ande mande beshel.

verse #21

Kade apol me, kon lasho kamel te kerel, kodi kris arakhav, ke o nasul tordyol mande pashe:

verse #22

Ke andralutnes muro shukaripe rakhav ande Devleski kris,

verse #23

ba kaver kris hatyarav ande muro trupo, haj kado marelpe mura godyake krisasa, haj la bezexake krisake phangleske shol man, so ande muro trupo si.

verse #24

O, me bi baxtalo manush! Kon slobodisarel man anda merimasko kado trupo?

verse #25

Le Devleski gracija, perdal pa amaro Raj, pa Jezush Kristo. Kade apol me kathar muri godyi le Devleske krisake slugisarav, ba kathar o trupo la bezexake krisake.

Chapters:

1 2 3 4 5 6 7 8 9 10 11 12 13 14 15 16