chapter 4
So te phenas apol pa Abraham, pa amaro kathar trupo chacho dad? So reslas voj?
Ke kana o Abraham perdal pa peske trabi te chachardyilas, si sosa te asharelpe, ba na kaj o Del.
Ke so phenel o Iskiripe?”O Abraham patyalas le Devleske, haj kado chacharimaske zhanglyilas andre leske”.
Apol ke kon kerdyimata kerel, kodaleske o potyinipe na anda sunuimaste den, ba anda kodo, ke te potyinen avri o kamipe.
Ba kodaleske, kon chi kerel kerdyimata, ba patyal ande kodo, kon chachardeske kerel le bezexasles, atunchi kodaleske lesko patyape len andre chachardyimaske, sar le Devleski gracija phenel kado.
Sar vi o David viacarel kodale manushesko anandimo, kaske o Del andre lel o chachardyipe bi kerdyimata:
„Anandej, kaske jertisardine lengo nasulipe
haj bisterdine lenge bezexa.
Anandej kodo mursh,
kaske o Raj chi lel andre leske bezexa”.
Ba kado anandimo numa le krujalÜshindenge perelpe, bake vi le bi krujalshindenge? Ke kodo phenas, ke „o patyape line andre le Abrahameske sar chachardyipes”.
Apolal, sar ginadine andre? Bater, na sar krujalshindeske, ba sar bi krujalshindeske.
Le krujalshinmaske somnos kade las, sar anda patyape kerdyilino, ando bi krujalshinipe reslino chachardyimasko somno, ke dad te avel sakoneske, kon patyal, ba bi krujalshindoj, haj o chachardyipe vi leske andre te len,
haj dad te avel vi le krujalshindenge; na feri kodalenge, kon anda krujalshinde sile, ba vi kodalenge, kon pashardyon kaj amere Abraham dadesko patyape kana bi krujalshindo sas inke.
E vorba, ke la lumako arando avla, le Abrahameske haj leske faloske na perdal pa kris dine, ba perdal pa patyapesko chachardyipe.
Kana le arando si kodal, kon anda kris si, atunchi o patyape naj anda soste si, haj e vorba khanchij.
Ke e kris xolyi kerel. Ke kaj naj kris, kothe chi krisako oprephagipe naj.
Anda kodo anda patyape, ke sakofalo anda gracija te avel, haj e vorba chachi te avel sakoneske, na feri kodalenge, kon anda kris sile, ba vi kodalenge, kon anda Abrahamesko patyape si, kon savorazhenengo dad si
angla o Del, sar iskkirime si: „bute popularenge dadeske shutom tut”. Voj patyalas kodaleske, kon opretrajarel le mulen, haj kon anav del kodalen, kon najle, ke te aven.
Voj sperantipesa patyalas vi po bi sperantipe, kade bute popularengo dad kerdyilas, sar vi phendyilas leske: „Kattyi avla tyo falo”.
Haj chi kolyilas ando patyape, haj kana aba karing le shel bersh phirelas, chi gindisardas pe pesko slabo trupo, haj chi pe Sharake shushi utera,
haj nas bi patyamno pe Devleski vorba, ba zurardyilas ande pesko patyape, haj das e patyiv le Devleske,
ande kodo sagutno gindipe, ke silesi saktimo te kerel kodo, so phendas.
Haj kado ginadine andre leske chachardyipeske.
Ba na feri pa leste iskirisardine kodo, ke andre ginadine leske,
ba vi pamende, kaske andre ginadine, kana patyas ande kodo, kon opretrajardas anda meripe le Jezushes, amare Rajes,
kon anda amare bezexa perdal davadyilas, haj anda amaro chachardyipe opretrajisardas.