chapter 12
Mangav apo tumen, phralale, pe Devlesko lashipe, ke te den tumare trupos le trajisarde, suntone, le Devles fajlino sarkafimoske. Kado te avel tumaro godyaverikano devliikano patyivipe.
Na shon tumen pasha e luma, ba boldadyon perdal pe tumare gindimatango nyevipe, ke opre te pinzharen, soj le Devlesko kamipe, soj o lasho, leske skunpo haj feder.
Kodo phenav apol savorazhenenge kathar kodi gracija so mange davadyilas, ke khonyik tena gindisarel pa peste majbut kathar so si: ba godyaverikanes te gindilpe, sakon kathar o patyape pashardes, so o Del das leske.
Ke sar ando jekh trupo but riga si, haj na zhikodo kerel sako rig so o kaver,
zhikade sam jekh trupo ando Kristo: sar jekh pale jekhavreske riga.
Kaver falura dimata si amen kathar kodi gracija so lam: kana profetipe, atunchi te keras kade, sar o patyape phenel kodo:
kana slugipe, atunchi khinyardyuvas ando slugipe: kana varikon sityarel, te sityarel:
kon zuralel, te zuralel: kon dimata kerel, te kerel kodo blindones, kon anglalari si ando patyape, kon lashipe kerel ande voja.
O kamipe te avel uzho! Rucin o nasul, haj pashardyon kaj o lasho!
So pa phralikano kamipe vorbil, te aven jekhavreste slabosarde, haj patyivale,
haj ande butyi na hodinisarde, ando duho zurale: le Rajeske slugisaren!
Aven losshane ando sperantipe, pachake ando chorripe, haj zurale ando rudyipe,
rigake ande suntonge bidi: haj den e patyiv sakoneske!
Ashtyilisaren kodalen, kon nashaven tumen: ashtyilin len haj na den len armaja!
Losshan le vojakirenca, haj roven le rovjardenca!
Zhikodale hatyaripesa te aven jekhavreste: na barimaske, ba jekh hatyarde le telalutnenca. Tena aven platnika ande tumare jakha!
Na potyinen khanyikaske nasulesa anda nasul! Keren o lasho sakone manushesa!.
Sar zhanen, te shaj trajin ande pachate sakone manushesa!
Na keren ande tumari butyi chachipe, mure skunpura, ba den than la Devlikana xolyake, ke iskirime si: „Muroj o bladokeripe, me maj potyino” – phenel o Raj.
Ba, kana tyo dushmano bokhajvel, deles te xal, kana trushaloj, de les te pel! Ke kado te keresa, zhuvindo zharo kides pe lesko shero.
Na muk, ke o nasul tele te viktornisarel tut: tu viktornisar le nasulipes lashipesa!