chapter 13
Sakon te mukelpe le majbare krisake! Ke naj saktimo, numa kathar o Del: save pales si, kodal o Del kerdas.
Apol kon chi mukelpe le opralimaske, le Devleske chi mukelpe. Kon pale kade keren, von shon pen tala krisipe.
Ke le kraja e lashe kerdyimata chi dosharen, numa o nasul. Kodo kames, ke tena trubuj te daras kathar o opralutnipe? Ker o lasho, haj asharipe lesa lestar,
ke voj le Devleski slugaj pe tyi rig. Ba nasul te kerdan, dara, ke na anda khanchi phiravel o xanro: ke slugaj voj le Devleske, ke palpale te del krisimatasa pe kodo, kon nasulipe kerel.
Anda kado trubuj apol te muken tumen, na feri anda krisarda xolyate ba vi anda duhosko hatyaripe.
Haj vi le dimata potyinen andre, ke anda Del keren o slugipe, kana anda kado slugisaren.
Den apol sakoneske sosa kamen: kaske dimatasa, kodoleske kodo, kaske darasa kodaleske e dar, kaske patyivipesa, kodaleske o patyivipe!
Na kamen khanyikaske khanchesa, numa kodalesa, ke jekhavres kamen, ke kon peske manushikane amales kamel, kerdas la krisa.
Ke kodo, ke na marhisar, na mudar, na chor, xoxamnes na colaxar, na dorosar le kaveresko, haj so kaver vladipe inke so si, andre svagarel kado jekh alav: kam tye dopashone vortakos, sar tut.
O kamipe chi kerel nasul le dopashone vortakoske. La krisako kerdyipe apol o kamipe si.
Haj vi anda kodo, ke pinzharen la vrama, ke kathej o chaso, kana opretrubuj te ushtyuvas anda suno. Ke akanak o muntusaripe maj pashe si amende, sar kana patyamne kerdyilam.
E ratyi nachilas, o dyes pale pashardyilas. Shudas apol la tunyarimatake kerdyimata, haj las opre le fimlalimaske mudvara.
Sar dyese, te phiras patyivale; na ando matyipe haj na ando marhipe, haj na ando kecipe haj rivalizalipe,
ba len pe tumende le Raj Jezush Kristos, haj na muken tumaro trupo ande hatyarimaske dorura!