Le Romaivonge iskirisardo lil

Chapters:

… 11 12 13 14 15 16   ⇤ ← 14 → ⇥

verse #1

Den angalyi kamipesa kodales, kon slaboj ando patyape, ba kade, ke na xantume anda kodo, ke kaverfalos gindintume.

verse #2

Si, kon patyal, ke sakofalo slobodo si leske te xal; kon pale slaboj, kodo pale vegetato xal;

verse #3

Kon xal tena dikhel tele kodales, kon chi xal; haj kon chi xal, tena dosharel kodales, kon xal. Ke o Del peskireske las les.

verse #4

Kon san tu te doshares kavereske slugas? Peske Rajeske tordyol bake pereltar: apol tordyola, ke le Devles siles saktimo, ke opre te inkrel les.

verse #5

Si kon kaveripe shol po jekh dyes haj po kaver dyes, kaver pale jekhtunes lel sakone dyeses: te avel sakon zuralo ande pesko patyape.

verse #6

Kon inkrel le dyeses, anda o Raj inkrelles: haj kon xal, anda Raj xal, ke najisipe del le Rajeske: haj kon chi xal, anda Raj chi xal – haj vi voj najisipe del le Rajeske.

verse #7

Ke chi jekh chi trajil peske, haj chi jekh chi merel peske;

verse #8

zhikaj trajisaras, le Rajeske trajisaras, haj te merasa, le Rajeske merasa. Zhikaj trajisaras apol, zhikaj meras, le Rajeske sam.

verse #9

Ke o Kristo anda kodo mulas haj trajisardas opre, ke vi le mulengo haj vi le zhuvindengo Raj te avel.

verse #10

Sostar krisares apol tye phrales? Haj tu sostar dikhes tele tye phrales? Haj ke savorazhene kothe tordyuvasa angla Kristosko krisako iskamin.

verse #11

Ke iskirime si:
„Pe muro trajo phenav – phenel o Raj –,
sako chang bandyol angla mande,
haj sako shib asharel le Devles”.

verse #12

Kade sakon pa peste del vorba angla o Del.

verse #13

Anda kado apol na krisaras jekhavres, barem pe kodo zuraren tumen, ke tena keren le phralenge xolyi haj bida!

verse #14

Zhanav, haj patyav ando Raj Jezush, ke khanchi naj pestarutnes biuzho: numa kodoleske si biuzho, kon biuzheske inkrelles.

verse #15

Ba kana tyo phral brigajvel anda tyo xamo, atunchi aba na kathar o kamipe keres tye butya. Na xasar tye xamosa kodales, anda kaste o Kristo mulas!

verse #16

Na kushen kodo lasho, so davadyilas lenge!

verse #17

Ke le Devlesko them na xamoj haj pimoj, ba chachipej, pachaj haj lossh ando Sunto Duho.

verse #18

Kon ande kado slugisarel le Kristoske, skunpo si angla o Del, haj ashardoj angla e manusha.

verse #19

Anda kado te kamas kodo, so pe pacha haj pe jekhavresko mishtyipe si.

verse #20

Na rumusar tele anda xamo le Devlesko kerdyipe! Ke sakofalo uzho si apol, ba pe leski bida avla kodale manusheske, kon xolyasa xal kodo.

verse #21

Majmishtoj kana chi xas mas haj chi pes mol, haj chi kaver chi keres, anda soste tyo phral xolyajvel.

verse #22

Tyo patyape te ashol tyiro angla o Del! Anandoj, kon chi krisarel pes kodolesa, pe soste opre zurardas pes.

verse #23

Ba kon chi patyal, haj vi kade xal, krisipe cirdel pe peste, ke pesko kerdyipe na anda patyape kerdas. Bezex si apol sa kodo, so chi kerdyol anda patyape.

Chapters:

1 2 3 4 5 6 7 8 9 10 11 12 13 14 15 16