Le Romaivonge iskirisardo lil
14. fejezet
„Zurale” haj „slabura” ando kethanipe
1. vers
Den angalyi kamipesa kodales, kon slaboj ando patyape, ba kade, ke na xantume anda kodo, ke kaverfalos gindintume.
2. vers
Si, kon patyal, ke sakofalo slobodo si leske te xal; kon pale slaboj, kodo pale vegetato xal;
3. vers
Kon xal tena dikhel tele kodales, kon chi xal; haj kon chi xal, tena dosharel kodales, kon xal. Ke o Del peskireske las les.
4. vers
Kon san tu te doshares kavereske slugas? Peske Rajeske tordyol bake pereltar: apol tordyola, ke le Devles siles saktimo, ke opre te inkrel les.
5. vers
Si kon kaveripe shol po jekh dyes haj po kaver dyes, kaver pale jekhtunes lel sakone dyeses: te avel sakon zuralo ande pesko patyape.
6. vers
Kon inkrel le dyeses, anda o Raj inkrelles: haj kon xal, anda Raj xal, ke najisipe del le Rajeske: haj kon chi xal, anda Raj chi xal – haj vi voj najisipe del le Rajeske.
7. vers
Ke chi jekh chi trajil peske, haj chi jekh chi merel peske;
8. vers
zhikaj trajisaras, le Rajeske trajisaras, haj te merasa, le Rajeske merasa. Zhikaj trajisaras apol, zhikaj meras, le Rajeske sam.
9. vers
Ke o Kristo anda kodo mulas haj trajisardas opre, ke vi le mulengo haj vi le zhuvindengo Raj te avel.
10. vers
Sostar krisares apol tye phrales? Haj tu sostar dikhes tele tye phrales? Haj ke savorazhene kothe tordyuvasa angla Kristosko krisako iskamin.
11. vers
Ke iskirime si:
„Pe muro trajo phenav – phenel o Raj –,
sako chang bandyol angla mande,
haj sako shib asharel le Devles”.
12. vers
Kade sakon pa peste del vorba angla o Del.
13. vers
Anda kado apol na krisaras jekhavres, barem pe kodo zuraren tumen, ke tena keren le phralenge xolyi haj bida!
14. vers
Zhanav, haj patyav ando Raj Jezush, ke khanchi naj pestarutnes biuzho: numa kodoleske si biuzho, kon biuzheske inkrelles.
15. vers
Ba kana tyo phral brigajvel anda tyo xamo, atunchi aba na kathar o kamipe keres tye butya. Na xasar tye xamosa kodales, anda kaste o Kristo mulas!
16. vers
Na kushen kodo lasho, so davadyilas lenge!
17. vers
Ke le Devlesko them na xamoj haj pimoj, ba chachipej, pachaj haj lossh ando Sunto Duho.
18. vers
Kon ande kado slugisarel le Kristoske, skunpo si angla o Del, haj ashardoj angla e manusha.
19. vers
Anda kado te kamas kodo, so pe pacha haj pe jekhavresko mishtyipe si.
20. vers
Na rumusar tele anda xamo le Devlesko kerdyipe! Ke sakofalo uzho si apol, ba pe leski bida avla kodale manusheske, kon xolyasa xal kodo.
21. vers
Majmishtoj kana chi xas mas haj chi pes mol, haj chi kaver chi keres, anda soste tyo phral xolyajvel.
22. vers
Tyo patyape te ashol tyiro angla o Del! Anandoj, kon chi krisarel pes kodolesa, pe soste opre zurardas pes.
23. vers
Ba kon chi patyal, haj vi kade xal, krisipe cirdel pe peste, ke pesko kerdyipe na anda patyape kerdas. Bezex si apol sa kodo, so chi kerdyol anda patyape.
Könyvek
