Le Romaivonge iskirisardo lil
12. fejezet
O kethanipe haj e dimata
1. vers
Mangav apo tumen, phralale, pe Devlesko lashipe, ke te den tumare trupos le trajisarde, suntone, le Devles fajlino sarkafimoske. Kado te avel tumaro godyaverikano devliikano patyivipe.
2. vers
Na shon tumen pasha e luma, ba boldadyon perdal pe tumare gindimatango nyevipe, ke opre te pinzharen, soj le Devlesko kamipe, soj o lasho, leske skunpo haj feder.
3. vers
Kodo phenav apol savorazhenenge kathar kodi gracija so mange davadyilas, ke khonyik tena gindisarel pa peste majbut kathar so si: ba godyaverikanes te gindilpe, sakon kathar o patyape pashardes, so o Del das leske.
4. vers
Ke sar ando jekh trupo but riga si, haj na zhikodo kerel sako rig so o kaver,
5. vers
zhikade sam jekh trupo ando Kristo: sar jekh pale jekhavreske riga.
6. vers
Kaver falura dimata si amen kathar kodi gracija so lam: kana profetipe, atunchi te keras kade, sar o patyape phenel kodo:
7. vers
kana slugipe, atunchi khinyardyuvas ando slugipe: kana varikon sityarel, te sityarel:
8. vers
kon zuralel, te zuralel: kon dimata kerel, te kerel kodo blindones, kon anglalari si ando patyape, kon lashipe kerel ande voja.
Opreokharipe ando duho trajisaripe
9. vers
O kamipe te avel uzho! Rucin o nasul, haj pashardyon kaj o lasho!
10. vers
So pa phralikano kamipe vorbil, te aven jekhavreste slabosarde, haj patyivale,
11. vers
haj ande butyi na hodinisarde, ando duho zurale: le Rajeske slugisaren!
12. vers
Aven losshane ando sperantipe, pachake ando chorripe, haj zurale ando rudyipe,
13. vers
rigake ande suntonge bidi: haj den e patyiv sakoneske!
14. vers
Ashtyilisaren kodalen, kon nashaven tumen: ashtyilin len haj na den len armaja!
15. vers
Losshan le vojakirenca, haj roven le rovjardenca!
16. vers
Zhikodale hatyaripesa te aven jekhavreste: na barimaske, ba jekh hatyarde le telalutnenca. Tena aven platnika ande tumare jakha!
17. vers
Na potyinen khanyikaske nasulesa anda nasul! Keren o lasho sakone manushesa!.
18. vers
Sar zhanen, te shaj trajin ande pachate sakone manushesa!
19. vers
Na keren ande tumari butyi chachipe, mure skunpura, ba den than la Devlikana xolyake, ke iskirime si: „Muroj o bladokeripe, me maj potyino” – phenel o Raj.
20. vers
Ba, kana tyo dushmano bokhajvel, deles te xal, kana trushaloj, de les te pel! Ke kado te keresa, zhuvindo zharo kides pe lesko shero.
21. vers
Na muk, ke o nasul tele te viktornisarel tut: tu viktornisar le nasulipes lashipesa!
Könyvek
