Le Romaivonge iskirisardo lil
15. fejezet
Opreakharipe po jekhhatyaripe ando kethanipe
1. vers
Ba amenge, kon zurale sam, trubuj, te hatyaras le bi zorangirengo slabipe, haj na amari voja te rodas.
2. vers
Savorazhene te aven pe kodo, te roden tumare dopashone vortakoski voja, haj mishtyipe!
3. vers
Ke chi o Kristo chi rodas peski voja, ba ke sar iskirime si: „Tye kushlimarenge kushlimata pe mande peline”.
4. vers
Apol sa kodo, so anglalutnes iskirisardine, po sityaripe iskirisardine, ke sperantipe te avel amen anda iskirimaske pacha haj ushorimata.
5. vers
E pacha haj o ushoripe o Del pale te delle tumenge, ke sar o Jezush kamelas, jekh hatyaripe te avel mashkar tumende,
6. vers
ke jekhe duhosa haj jekhe mujesa te luvudyisaren le Jezush Kristosko, amare Rajeske Devles haj Dades!
7. vers
Len kasaveske jekhavres sar so si, sar vi o Kristo kasavese las tumen soske sanle pe le Devlesko luvudyipe!
8. vers
Kodo phenav, ke o Kristo Jezush le biboldengi sluga kerdyilas, ke andre te sikavel le Devlesko chacho phenipe, kerdes kade so phendine le Dadeske;
9. vers
ba le murtikana anda jertipe luvudyisaren le Devles, sar so iskirime si:
„Anda kado asharav tut, Raja, mashkar le murtikana,
haj gilyabav gilyi tye anaveske”.
10. vers
Kodo phenel majdur:
„Murtikana vojin tumen
leske popularenca kethanes”.
11. vers
Majdur pale:
„Populara, asharen savorazhene le Rajes!
Te luvudyisarel les sako popularo!”
12. vers
O Izajash majdur kodo phenel:
„Le Jesseske falo avla,
kon opreushtyel, te krajilpe pe manusha,
ande leste sperantinpe le populara”.
13. vers
Le sperantimasko Del te pherdyarel tumen le patyapeske sagutna losshasa, ke o sperantipe butardes te avel ande tumende anda Sunto Duhoski zor!
Angle gindimata pa Paleske droma
14. vers
Phralale, pa tumende zhanav kodo, ke vi tume pherde sanle lashipesa, mishto zhanen sakofalo, haj zhanen jekhavreske duma te den kana bida si.
15. vers
Kathe-kothe maj tromanes iskirisardom tumenge, phralale, te serosarav tumen pe unyi trabi. Ande kodala gracijaki zor kerdom kado, so o Del das mange.
16. vers
Ke le Kristo Jezusheski sluga te avav mashkar le murtikana, haj le Devleske suntone evangeliumoski slugimata te kerav, haj kade le murtikana skunpone, perdal pa Sunto Duho suntosarde sarkafimura te kerdyon.
17. vers
Si sosa te asharavma ando Kristo Jezush angla o Del.
18. vers
Apol numa pa kodo tromav te vorbisarav, so o Kristo kerdas perdal pa mande pe kodo, ke te boldenpe karing o Del le murtikana, vorbenca haj kerdyimatanca:
19. vers
le somnonge haj chudimatange zorasa, le Duhoske zorasa, zhikaj kathar o Jeruzhalemo dur krujal phirindes zhikaj e Illiria kerdom le Kristoske evangeliumosko viacaripe.
20. vers
Kade patyivake butyake inkrav te viacarav o evangeliumo, ba na kothe kaj le Kristosko anav aba pinzhardo sas, tena pe kaveresko tele shutino fundo te vorbisarav,
21. vers
ba sar iskirime si:
„Kaske chi viacardine les, dikhena les,
haj kon chi ashundine les, hatyarena les”.
22. vers
Kado tordyardas man tele butivar, ke tumende te zhav.
23. vers
Ba ke abakanak naj man than pe kadal phuva, haj ke aba but bersh ke dorosarav tumende te zhav,
24. vers
kana maj dromaro ande Hishpania, sperantisarav, ke perdal zhalindes dikho tumen, haj tume aventar maj manca kothe, pala soste mashkar tumende jekh cerra hodinisardom man.
25. vers
Akanak apol ando Jeruzhalemo zhav ande suntonge slugipe.
26. vers
E Makedonia haj e Akhaj lasheske dikhlas, ke unyi kethane kidimata te keren pe le Jeruzhalemicka suntonge chorrenge rig.
27. vers
Lasheske dikhline, ba vi kamen lenge. Ke le murtikane rig te line anda lenge duhikane barvalimata, atunchi trubuj lenge vi ande truposke butya te slugisaren lenge.
28. vers
Apol kana kadalesa gata avo haj ande lengo vast shav kadale kethane kidimasko frukto, ando drom lines tumen, zhavtar ande Hishpania.
29. vers
Zhanav, ke kana tumende zhav, le Kristoske evangeliumoske ashtyilimaske barvalipesa zhav.
O Aposhtolo rudyipe mangel
30. vers
Mangav apol tumen, phralale, pe amaro Raj Jezush Kristo haj pe Suntone Duhosko kamipe, zhutisaren man ande tumare rudyimata. Mangen le Devles anda mande,
31. vers
ke te muntusajvav kathar le murtikana, kon ande Judea sile, haj mure Jeruzhalemeske kerde slugimata skunpo te avel le suntonge,
32. vers
haj kade anda Devlesko kamipe losshanes te zhav tumende, haj te shaj hodinisajvav tumende.
33. vers
La pachako Del te avel tumenca, savorazhenenca! Amen.
Könyvek
