capítulo 2
Kana reslas la rusajako dyes, savorazhene kethane sasle, zhi pe kodo than.
Jekharsa glaso ashundyilas anda cheri, kasavo, sar kana zurales phurdel e balval. Andre pherdyardas le intregone kheres, kaj beshenas.
Pala kodo anda jekh avrialosardyiline shiba sikadyiline lenge, kasave sar e jag, haj tele muklyosardyiline pe savorazhenende.
Atunchi savorazhene andre pherdyiline Suntone Duhosa haj pe but shiba line te vorbin, sar o Sunto Duho dasle lenge, te den duma.
Kaj kadi vrama, so tala o cheri si popularo anda sogodende sas ando Jeruzhalemo kasavo biboldo, kon daralas le Devles.
Kana ashundine o baro glasipe, butimata kidadyilas kethane, haj zurales bari dikhenas, ke sakon pe peski shib ashunelas len te vorbin.
Savorazhene bari dikhenas haj chudinaspe: „Aketa, kadal, kon vorbin, dore savorazhene anda Galilea sile?
Sar ashunas apolal vi kade savorazhene amare shiba, ande soste arakhadyilam?
Ame, partusha, medura, elemiticka, mezopotamicka, judaicka, kappadocicka, pontushicka, azhijicka,
frigianicka, pamphilianicka, edyiptomicka haj anda Cirene Libiicka manusha, haj anda Roma aviline avlara,
bibolde, prozeliti, kretaicka haj arabura: ashunas, ke pe amare shiba viacaren le Devleske bare trabi.”
Savorazhene bari dikhenas haj chudikanes phenenas jekhavreske: „Dore soj kado?”
Ba kavera prassandes kado phenenas: „Pherdo sile gugle molyasa!”
Atunchi o Peter, kon le deshujekhenca kothe tordyolas, oprevazdas peski vorba, haj las te vorbil karing lende: „Bibolde mursh, haj le Jeruzhalemeske intrega manusha! Zhanen avri kado haj ashunen muri vorba!
Na matej kadal, sar tume gindisaren, ke le dyeseske inke feri lesko trito chaso si,
apol numa feri kodo pecisajlas, so o Joel profeta phendas:
»Haj kado avla ande palune dyesa
– phenel o Raj –,
avri mukav muro Duho pe sakono manush:
atunchi tumare shave haj sheja profetalina,
tumare terne sikadyimata dikhena,
tumare phuren pale sune dikhlimata avnale.
Pe mure slugi haj slugara avri mukav muro Duho ande
kodal dyesa, haj profetalina.
Chudimata kero kothe opre po cheri
haj somnura tele pe phuv, rates, jag haj thuvjimata.
O kham tunyariko kerdyola o shonitiko pale rateske,
zhiso majanglal avelatar le Rajesko baro haj dikhlimasko dyes.
Haj kado pecisjvela: sa kodo, kon po zhutipe akharela
le Rajeske anaves, muntosardyola«.
Izralikane manusha, ashunen kadal vorbi: tume le Nazaretickone Jezushes, kodale manushes, kas o Del chachardas angla tumende zoranca, chudimatanca haj somnonca, save, sar vi tume zhanen, perdal pa Del kerelas mashkar tumende,
kadale manushes kathar le bi Devlenge vastendar oprekarfardines mudardine les, pala soste kathar le Devlesko gindipe haj angle zhanaipe perdal davadyilas.
Ba o Del opreputerdas le merimaske sastra, haj opretrajardas les, sar vi bi shajipe sas, ke kukola phangles te inkren les,
ke o David pa leste phenel:
»Angla mande dikhav le Rajes sagda,
ke pe muri chachi rig tordyol voj,
ke tena kolyuvavtar.
Anda kado losshal muro ilo,
haj losshal muri shib,
haj inke vi muro trupo ande pachate hodinisajveltar,
ke chi mukes muro duho ande telalutni luma
haj chi mukes, ke tyo Sunto kernyipe te dikhel.
Sikaves mange le trajesko drom,
haj angla tute losshasa pherdyares man«.
Murshale, phralale! Muk te dav tumende duma tromanes pa David baro dad! Voj mulas, haj vi praxosardine les, haj lesko murmunto zhikaj kado dyes kathej amende.
Ba ke voj profeta sas, haj zhanelas, ke o Del colaxasa phendas leske, ke anda leske shavora varisavo beshela pe lesko iskamin,
ando avlipe dikhindes pa Kristosko opretrajisaripe vorbilas: ke chi ande telalutni luma chi ashola, haj chi lesko trupo chi dikhela kernyipe.
Kadale Jezushes o Del opretrajardas, haj kadaleske ame savorazhene chachara sam.
Apol pala soste le Devlesko chacho vast opreashardas les, haj kas o Dad leske ande vorbate das, le Suntone Duhos, avripherdyardas les – kas tume dikhen haj ashunen.
Ke na o David gelas opre ando cheri, ke voj kodo phenel:
„Duma das o Raj mure Rajeske:
»Pe muri chachi rig besh tele,
zhikaj me tye dushmanon.
tye punreske iskamineske kerav«.
Te zhanel avri apol le Izraelesko intrego kher intregone zhanipesa, ke o Del Rajeske haj Kristoske kerdas les, kodale Jezushes, kas tume po trushul tannardine!”
Kana kadal ashundine, ande pengo ilo baro hatyaripe line. Kade dine duma kaj o Peter haj kaj le majbut aposhtolura: „So te keras, murshale, phralale?”
O Peter kodo phendas lenge: „Inkren bezexbunuimata, haj savorazhene te bolardyol ando Jezush Kristosko anav pe tumare bezexengo jertipe: atunchi lena vi tume sar tofnipes le Suntone Duhos.
Ke e vorba tumenge vorbil, haj inke tumare shavenge, haj sa kodalenge, kon dur sile, ba mashkar kaste sakones akharel peste amaro Raj amaro Del.”
Haj vi bute kavere vorbenca zurarelas len: „Muntusaren tumen kathar kado nasul generaciovo!”
Kodal apol kade kerdine, sar so phendas haj vi bolardine pen: karing le trin miji duhura pashardyilas kodo dyes lende.
Von pale zurale ilesa avri inkrenas ande le aposhtolengo sityaripe, ande kristianengo kethanipe haj ande rudyimata.
Dar xutyildas sakones, ke but chudimata haj somno pecisajlas kathar le aposhtolura.
Le patyamne sa kethane inkrenas, haj sakofalo so sasle mashkarutno sas.
Penge phuva thaj barvalimata bikindine, haj lengi ahor uladine, sakoneske kattyi sode trubujasles.
Sako dyes je- khe ilesa kothe sas ande khangeri, kaj sako kher kerenas o manro phagipe, haj losshanes haj uzhe ilesa lenas pende kade o xamasko.
Luvudyinas le Devles, haj kodo sorro dyes kamelas len. O Raj pale sako dyes bulyharelas le muntuimaske butimatan.