Le Aposhtolenge trabi
capítulo 15
E antiochicko xape
verso 1
Tala kadi vrama unyizhene mashkar kodal, kon tele aviline anda Judea, kade sityarenas le phralen: „Kana chi sinen tumen krujal sar le Mozesheski kris phenel avri, nashtig muntosardyon.”
verso 2
Ba ke o Pal haj o Barnabash zurales oprexolyajline pe kado, avrigindisardine, ke o Pal haj o Barnabash haj inke unyizhene mashkar le majbut te zhan opre ando Jeruzhalemo kaj le aposhtolura haj kaj le preshbiterura te vorbin perdal kadi traba.
verso 3
E eklezhia lenca gelas, von pale perdal geline pa Főnicia haj Samaria. Haj phendine le murtikanongi traba, ke kaj o Del boldadyiline, haj zurales losshanas kadalake le phral.
verso 4
Kana resline ando Jeruzhalemo, e ekhlezhia, le aposhtolura haj le preshbiterura dine lenge e patyiv, von pale vorbisardine lenge, ke soski bari butyi kerdas lenca o Del.
verso 5
Ba unyizhene, kon mashkar le farizanengo grupo kerdyiline patyamne, angle tordyiline, haj kodo phendine, ke vi kodalenge krujaj trubuj te shinen pen, haj vi lenge trubuj te vladisaren, ke te inkren le Mozesheski kris.
Le aposhtolengo haj le preshbiterengo svato
verso 6
Anda kado le aposhtolura haj le preshbiterura kethane aviline, perdal te vorbin kadi traba.
verso 7
Ba ke baro xape kerdyilas, o Peter opretordyilas, haj kade das lende duma: „Murshale, phralale! Zhanen, ke o Del aba kathar le dulmutane dyesa avrialosardas man mashkar amende, ke le murtikana anda muro muj te ashunen le evangeliumosko alav haj patyamne te aven.
verso 8
Haj o Del, kon pinzharel le ilen, chacharipe kerdas, ke lenge zhikade das le Suntone Duhos, sar amenge.
verso 9
Chi shutas khanchi kaveripe mashkar amende haj mashkar lende, kana perdal pa patyape uzhardas lengo ilo.
verso 10
Akanak apol sostar zumaven le Devles kodalesa, ke kodo pharipe shon ande sityardengi kor, saves chi amare dada, haj chi ame chi zhanasas te phiravas?
verso 11
Boldines, ame patyas, ke perdal pa Jezush Kristoski gracija muntusardyuvas, sar vi von.”
verso 12
Pe kado sa le manusha ashilinetar, pala kodo ashundine le Barnabashes haj le Pales, kon vorbisordine, ke soske bare somnura haj chudimata kerdas o Del mashkar le murtikana perdal pa lende.
verso 13
Kana von ashiletar, o Jakab das duma: „Murshale, phralale, ashunen man akanak!
verso 14
O Shimon phendas, ke sar haj ande soski traba pecisardyilas le Devlesko avlipe anglunes anda kodo, ke mashkar le murtikana te kerel leske falo leske anaveske.
verso 15
Kadalesa jekh phenen vi le profetange phenimata, sar vi Iskirime si:
verso 16
»Pala kado maj palpale avav,
haj opre tordyarav le Davidesko tele pustisardino kher,
oprevazdav leske zidura,
haj so tele rumusajlas, nyevjaravles,
verso 17
ke te rodel le Rajes
le majbut manusha haj sakono popularo,
kon po zhutipe akhardas muro anav
– kade das duma o Raj, haj vi kerel kodo«,
verso 18
so pinzhardo sas kathar sagutnipe.–
verso 19
Kade kodo gindisarav, ke chi trubul te azban kodalen, kon mashkar le murtikana karing o Del boldenpe,
verso 20
ba trubul te iskirin lenge, ke te ferin pen kathar le fetisha, tena kerdyon biuzhenge, kathar o marhipe, kathar le tasade pedura haj kathar o rat.
verso 21
Ke kon le Mozeshes viacaren, kathar le dulmutane vrami kothe si ande soko foro ande zhinagogi, haj sako savatone opreginaven kodo.”
Le zhinatoske vladimata
verso 22
Pe kado le aposhtolura haj le preshbitera e intregona eklezhiasa kethanes lasheske inkerdine kodo, ke murshen te alosaren avri mashkar lende, haj te bishalen len le Palesa haj le Barnabashesa kethanes ande Antiochia le Judashesa kethanes, kas vi Barsabasheske anavarenas, haj le Silases – von mashkar le phral anglalara sas –,
verso 23
haj kathar lenge vast kado iskiripe bishaldine: „Drobovjipe kathar le aposhtolura haj kathar le prezhbitericka phral anda murtikana kerdyiline phralenge, kon ande Antiochia, ande Siria haj ande Klikia sile!
verso 24
Ke ashundam, ke unyizhene, kon mashkarutne si anda amaro kethanipe, opre xolyardine tumen haj tumaro duho penge vorbenca, ba vladipe amendar chi line,
verso 25
kade dikhlam mishtoske, pala soste pe jekh gindipe reslam, ke murshen te alosaras avri haj te bishalas len tumende amare skunpone Barnabashesa haj Palesa kethanes,
verso 26
kadale manushenca, kon pengo trajo dine anda amaro Raj Jezush Kristosko anav.
verso 27
Bishaldam apol le Judashes haj le Silashes, kon vi zhuvinde vorbasa sa kadal phenena tumenge.
verso 28
Ke kade fajlas le Suntone Duhoske haj amenge, ke khanchi majbut pharipe tena shas pe tumende, numa kodo, so trubuj:
verso 29
ke te ferin tumen kathar le fetishonge sarkafimasle butya, kathar o rat, kathar le tasade pedura haj kathar o marhipe. Kana kathar kadal ferina tumen, mishto keren kodo. Lasho sastyipe!”
Le vladimatango avriphenipe ande Antiochia
verso 30
Kodal apol, pala soste bishaldine len, tele geline ande Antiochia. Kathe ande jekh kethane akhardine le manushen, haj perdal dine o lil.
verso 31
Kana ginadineles, losshanas le ushorimaske.
verso 32
O Judash haj o Silash pale, kon vi profeta sas, bute vorbipesa ushorenas le phralen haj zurardine len.
verso 33
Pala soste jekh vrama kathe ashiline, le phral palpale bishaldine len kaj kodola, kon bishaldine len.
verso 35
Vi o Pal haj vi o Barnabash kathe sasle. Sityarenas le majbutenca kethanes, haj viacarenas le Rajesko alav.
Le Paleske haj le Barnabasheske droma shindyontar
verso 36
Ba pala unyidyesa o Pal kade das duma kaj o Barnabash: „Aventar palpale, haj pa jekh foro pa kaver, kaj viacarasas le Rajesko alav, dikhas le phralen, ke sar sile.”
verso 37
O Barnabash pesa kamlas te ingren le Janoshes, kas vi Markeske anavarenas.
verso 38
Ba o Pal mangelas les, ke tena trubuj palpale te len kodales, kon shindyilastar lendar, zhikathar e Pamfilia, haj chi gelas lenca ande butyi.
verso 39
Kade vorbi kerdyiline mashkar lende, haj shindyiline jekhavrestar. O Barnabash ando Ciprush berardas, pala soste peste las le Markos.
verso 40
Ba o Pal le Siliashes alosardas, haj dromardastar, le phral pale les ande Devleski gracija imbisardine.
verso 41
Andre phirdas la Siria haj Cilicia, zurardas le eklezhian, haj vladisardas, ke te inkren andre le aposhtolengo haj preshbiterengo vladipe.
Libros
