chapter 4
Zhikaj von kaj le manusha vorbinas, kothe aviline le rashaja le khangerake ketanenge anglalara haj le sadducana.
Kadal xolyajline, ke sityaren le manushen, haj viacaren anda meripe opretrajisaripe ando Jezush.
Vast vazdine apol pe lende, haj tele xutyildine len zhikaj o kaver dyes, ke aba ratyolas.
Ba mashkar kodal but zhene, kon ashunenas o alav, patyanas, kade apol le murshengo butipe reslas le panzhe mijan.
Pecisajlas apol kaver dyes, ke le angmanusha, le phure haj le iskiritora kethane aviline ando Jeruzhalemo,
lenca kethanes vi o Annash angrashaj haj vi o Kaifash, haj inke o Janosh haj Alexander, haj sode zhene feri sas anda angrashajengo falo.
Pala soste mashkarutnes tordyardine len, pushline: „Soski saktimosa bake ande kasko anav kerdine kado?”
Atunchi o Peter kathar o Sunto Duho pherdyardes kade das duma: „Amare popularenge anglalutnara haj tume phurale, ashunenles!
Tume adyes oprepushen amen, ke lasho kerdam jekhe nasvale manushesa, ke te zhanen, ke sar kerdyilas pale sasto.
Zhanen apol avri, tume haj le Izraeleske intrega manusha, ke amare Rajeske, le Nazaretickone Jezush Kristosko anaveske zorasa kerdam kado, kas tume po trushul tannardine, haj kas o Del opretrajardas anda meripe: pa leste perdal tordyol kathe kado angla tumende sastes.
Kado barr, saves tume, kerdara, shudine,
haj savo kolcosko barr kerdyilas:
haj naj ande khanyikaste kaver muntuipe, ke kaver anav china chi davadyilas le manushenge tala cheri, ande savo trubuj te muntosardyuvas.”
Kana dikhline le Peteres haj le Janoshes, ke sar avri inkren, haj avri zhangline, ke chi zhanen chi te iskirin haj bi zhanara manusha si, zurales chudinaspe, haj pe lende pinzhardine, ke le Jezushesa sasle.
Haj ke dikhline, ke vi kodo manush, kon sastyilas pasha lende tordyilas, ande khancheste chi phendine lenge dosh.
Vladisardine apol lenge, te zhan avri anda svato, pala kodo kade vorbinaspe mashkar jekhavreste:
„So te keras kadale manushenca? Ke angla Jeruzhalemicka manusha chudicka somnura kerdine, kado chaches si, haj nashtig asvikarasles tele.
Apol dore tena zhal majdur e viaca mashkar le manusha, daravas len, ke tena vorbisaren khanyikaske ande kadalesko anav.”
Pala kodo andre akhardine len, haj vladisardine, ke chi sar tena vorbin haj tena sityaren ande Jezushesko anav.
Ba o Peter haj o Janosh kodo phendas lenge: „Krisaren apol tume amen, dore mishto avlas kodo angla o Del, ke te ashunasas barem pe tumende, sar po Del!
Ke bi shajipe si amenge, ke tena phenas kodo so dikhlam haj so ashundam!”
Pe kado kodal pale daradine len, pala kodo bishaldinele, ke chi rakhline traba pe kodo, ke te shaj dosharenas len, anda le manusha, ke sakon luvudyisarelas le Devles anda kodo, ke so pecisardyilas le manushesa.
Ke majbut sar shtarvardeshe bershengo sas kodo, kasa pecisardyilas kado chudicko sastyipe.
Kana bishaldine len kaj pengirende geline, haj ingerdine e viaca, ke so sakofalo phendine lenge le angrashaja haj le phure.
Kana kodal ashundine kado, jekhe ilesa-duhosa rudyinas kaj o Del: „Raja, tu san kodo, kon kerdan o cheri haj la phuva, la mara haj sakofalo, so ande late si,
Kon le Davideske, amare dadeske, tyire slugaske mujesa, pa Sunto Duho perdal kado phendas:
»Sostar xolyajven le populara
haj gindisaren phutyarimata le manushenge?
La phuvake kraja opre ushtyiline, kethane aviline sa le kraja
po Raj haj pe lesko Opremakhlo«.
Ke chachikanes kethane aviline ande kado foro pe tyo sunto Shavo, po Jezush, kas opremakhlan: o Herodesh haj o Ponciush Pilatush le murtikanonca haj le Izraeleske manushenca kethanes,
ke te keren, so tyo vast haj tyo kamipe kamlas, te pecisajveltar.
Akanak apol, amare Raja, dikh pe lengo dosharipe, haj de kodo tye slugange, ke anda chachi zor te viacaren tyo alav.
Tu pale lunzhar avri tyo vast pe sastyarimata, ke somnura haj chudimata te kerdyon perdal pa tye suntone Shavesko, pa Jezushesko anav.”
Sar kade rudyinas, izdrajlas o than, kaj kethane aviline. Savorazhene andre pherdyiline le Suntone Duhosa, haj tromanes viacarenas le Devlesko alav.
Le patyamne butimatange jekh sas lengo ilo thaj dyi. Chi jekh chi phendas khanchi anda pesko barvalipe, ke sakofalo jekhtuno sas.
Le aposhtolura pale bara zorasa kerdine chacharipe penge Rajeske, pa le Jezush Kristosko opretrajisaripe: haj butardo sas e gracijimata ande savorazhenende.
China nas mashkar lende kon chorro sas, ke sa kodal kas phuv sasle bake kher sasle, bikindinele, haj lenge ahora andinele,
haj kaj le aposhtolenge punre shutinele. Sakoneske kattyi dine, sode trubusardas les.
Kade o Jozhef, kon anda ciprushicko falo levita sas, kon kathar le aposhtolura o Barabashicko anav las – kadalesko avriphenipe: ushorimasko shavo si –,
ke plugimaski phuv sas les, bikindas kodo, e ahor pale andas, haj tele shutas kaj le aposhtolenge punre.
The software aims to connect everyone with the text of the Bible on a quickly accessible, customisable interface.
The name refers to both connectivity and speed…
“Let every man be swift to hear, slow to speak, and slow to anger!”
With love, Tom Károly