chapter 19
Zhikaj o Apollo ando Korintush sas, o Pal andre phirdas le opralutne provinciji, pala kodo ando Efezush avilas, haj pe unyi sityarde arakhlas.
Kadalenge kodo phendas: „Dore line o Sunto Duho, kana patyamne kerdyiline?” Ba kadal kodo phendine leske palpale: „Inke chi kodo chi ashundam, ke si Sunto Duho.”
Voj pe kado pushlas len: „Apol sar sanle atunchi bolisarde?” Kodal kado phendine: „Le Janosheske bolimatasa.”
Pe kado o Pal kodo phendas: „O Janosh le bezexbunuimaske bolimatasa bolelas le manushen, haj kodo phendas, ke ande kodo te patyan, kon pala leste avel, apol ando Jezush.”
Kana kado ashundine, bolardine pen ando Raj Jezushesko anav.
O Pal pe lende shutas peske vast, haj o Sunto Duho pe lende huralylas, von pale pe shiba line te vorbin haj profetalinas.
Kadal mursh deshuduj zhene sasle.
Pala kodo andre phirelas ande zhinagoga, tromanes sityarelas tala trin shona, haj vorbilas sakoneske patyamnes pa Devlesko them.
Ba ke unyizhene chi patyanas, haj inke vi marhinas le Rajesko drom angla butimata, gelastar lendar. Rigate akhardas le sityarden haj pala jekh dyes pala kaver ande Tirannoseski ishkola sityarelas.
Kado duj bersh inkerdas, kade sa kodala, kon ande Azhia beshenas, bibolde haj murtikana, ashundine le Devlesko alav.
O Del vi zurales bare chudimata kerelas kathar le Paleske vast.
Ingerdine leske dikhle haj kretinci, so phiravelas, haj pe nasvale shutinele, pe soste kodal vi sastyiline, haj le biuzhe duhura avrigeline anda lende.
Sas vi kasave luma phirde bibolde, kon beng nashavenas, ke le Raj Jezushesko anav mangenas pe kodal ande kaste nasul duhura sas. Kodo phenenas: „Vladisarav tumenge perdal pa Jezush, kas o Pal viacarel!”
Jekhe bibolde angrashajeske efta shave kerenas kado.
Ba o nasul duho kade das lende duma: „Le Jezushes pinzharav, vi pa Pal zhanav, ba tume kon sanle?”
Pala kado kodo manush, ande kaste o nasul duho sas, pe lende xuttyilas, ande pesko saktimo laslen, haj kade sikadas lenge peski zor, ke bi gadengo haj mardines nashline avri anda kodo kher.
Kado apol ando Efezush avrizhanglas sakono biboldo haj murtikano, pe soste darajline, haj asharenas le Raj Jezushesko anav.
Vi mashkar le patyamne but zhene aviletar, haj avriphendine penge trabi.
Kodal pale, kon pala bare trabi phirenas, but zhene kethane phiradine le hertiji, haj angla sakoneste phabardinele. Perdal ginadine vi kodalenge ahora, haj kade dikhline, ke lengi ahor panzhvardesh miji rup si.
Kade le Rajesko alav butajlas haj zurardyolas.
Kana sa kadal pecisajline, o Pal perdal pa duho avrigindisardas, ke perdal zhal pa Makedonia haj pa Akhaj, haj zhaltar ando Jeruzhalemo. Ke kodo gindisardas: „Apol kothe aba te somas, vi ande Roma trubuj te zhav.”
Angle bishaldas kade dujen ande Makedonia mashkar kodal, kon sluginas leske, le Timoteushes haj le Erastoses, haj voj inke jekh vrama ande Azhia ashilas.
Ba ande kodi vrama na cerra maripe kerdyilas anda Rajesko drom.
Ke jekh Demetrios anavesko rupari Dianicka-khangerora kerelas anda rupeste, haj kaj baro barvalipe zhutisardas kade le biznisaron.
Kadalen haj kasave butyaren kethane akhardas apol, haj kodo phendas lenge: „Manushale! Mishto zhanen, ke anda kadi butyi las amari potyin.
Ba dikhen haj ashunen vi kodo, ke kado Pal na numa ando Efezush, ba vi ande intrego Azhia bute manushen vorbil perdal po kaver drom. Kodo phenel, ke na devlaj kodola, so vastenca keren.
Kade apol na numa amari butyi nacholatar haj kerdyol khanchi kerdeske, ba vi la bara Dianake khangera ande khanchi lena, haj vi kodolako rajipe tele nachola, kas e intrego Azhia haj e intrego luma patyivil.”
Kana kadal vorbi ashundine, zurales xolyarnyika kerdyiline, haj oprecipisardine: „Barij le Efezushengi Diana!”
Kethane boldadyipe phirdas andre le foros, haj jekhe gindimatasa ande krujicko teatro nashline. Kothe ingerdine le Makedonicke Gajuses haj Aristarchuses, le Paleske amalen.
Atunchi o Pal andre kamlas te zhal mashkar le manusha, ba le sityarde chi mukline les.
Unyizhene vi mashkar le Azhiicka anglalara, kon leske vortakura sas, bishaldine leste, haj mangline les, ke tena zhal ando teatro.
Kothe sakon kaver cipilas, ke le manushengo kethanipe chi hatyarenas jekh, ke but zhene chi kodo chi zhanenas, ke anda soste aviline kethane.
Palunes angle andine mashkar le manusha le Alexanderes, kas le bibolde angle pizdine. O Alexander pale pacha sikadas peske vastesa, ke kamlas te zhanaravel le manushen.
Ba kana oprepinzhardine, ke biboldoj, jekharsa savorazhene line te cipin, haj inke karing le duj chasura kade cipinas: „Barij le Efezushengi Diana!”
Palunes o notari tele pachardas le manushen, haj kade das duma: „Efezushicka maurshale! Si dore kasavo manush, kon chi zhanelas, ke le Efezushesko foro patyivil la Diana, le Jupitereska sumbura?
Ke kado kade si, trubuj te pachardyon, haj khanchi chi trubuj kade te keren, so chi gindisaren perdal.
Ke kathe andine kadale manushen, kon china naj chi patyiv oprephagara, haj chi tumara Diana chi kushenas.
Apol le Demetriuses haj le majbute butyaren variso dosh te sile pe varikaste – ke pala soste inkren krisange dyesa haj si vi prokonzulura –, te mangen kris pe jekhavreste.
Haj kaver xapeski bida te si tumen, po patyivalo krisako kethanipe shaj phenen kodo.
Ke inke ande kodo khatrimo peren andre, ke andre dena tumen anda kadi rebellimata, so adyes kerdine – ke khanchi dosh naj amen pe kado kethane avilipe –, haj chi zhanena so te phenen.” Kado phendas, pala kodo bishaldas le manushen.
The software aims to connect everyone with the text of the Bible on a quickly accessible, customisable interface.
The name refers to both connectivity and speed…
“Let every man be swift to hear, slow to speak, and slow to anger!”
With love, Tom Károly