chapter 24
Pala panzh dyes tele gelas o Ananiash angrashaj unyi phurenca haj jekhe Tertullus anaveske fishkarishesa, haj gelas kaj o prefekto te dosharel le Pales.
Pala soste le Pales angle akhardine, o Tertullus las te phenel o dosharipe: „Ande chachi pacha trajisaras tala tute, haj kathar tyo grizhipe but sakofalo majmishto kerdyilas,
kado sagda haj pe sako than lashe ilesa las, lashe Felix.
Apol butaig opre tena inkrav tut, mangav tut, ashun amen skurcindes kathar tyo baripe.
Kade dikhlam, ke kado manush bida kerel haj xape vazdel mashkar sakono biboldo pe intrego phuv, haj voj si o anglalari ande kodal marimata, so le nazareticka kethanimata vazden.
Haj inke vi la khangera kamlas te marhisarel, anda kado xutyildam les.
Kana krisaresa, vi tu zhanesa sa kodo lestar, sosa ame dosharas les.”
Vi le bibolde zurardine kado, haj chacharenas, ke sa kado kade si.
Ba o Pal, pala kodo, ke o prefekto sikadas leske, ke te vorbil, kado phendas palpale: „Apol ke zhanav, ke aba but bersh krisari san kadale popularoske, lashe duhosa vorbisarav anda mande.
Shaj zhanes avri apol, ke naj majbut sar deshuduj dyes, kana opreavilom ando Jeruzhalemo te rudyisarav.
Chi dikhlas man khonyik te xavma bake bida te kerav, chi ande khangeri, chi ande zhinagoga,
haj chi ando foro. China chi zhanen angla tute andre te chacharen, sosa akanak kathe dosharen man.
Ba kodo apol avriphenav tuke, ke le Dadeske, mure Devleske slugisarav, pala kodo kethanipe zhalindes, so von hartikanoske phenen, haj patyav ande kodo, so tele si iskirime ande kris haj ande profeti.
Sperantipe si man ando Del, saves vi von zhukaren, ke le chache haj le nasula opretrajina.
Kathar kado apol vi me kodo kamav, ke muro duho uzho te avel sagutnes angla o Del haj le manusha.
Ba pala but bersh reslom, ke dimata te dav mure populareske, te kerav sarkafimo haj colaxaripe.
Anda kadal trabi arakhline man pala muro uzharipe ande khangeri, ba na butipesa, haj china na mashkar e bida.
Kodal unyizhene bibolde, kon anda Azhia aviline, kaske trubusardino te aven angla tute, haj dosh te vazden, kana vorba si len pe mande,
bake vi kadal kathe, numa te phenen avri, ke arakhline dore ande mande variso nasulipe, kana angla o angsvato tordyilom.
Numa ande kodo jekh phenipe, so glasunes viacaros, kana mashkar lende tordyuvos, ke anda mulengo opretrajisaripe tordyuvav akanak angla tumaro krisano iskamin.”
Ba o Felix lunzhardas lengi butyi, ke mishto pinzharelas kado drom, haj kodo phendas: „Maj kana o Lizias mijari tele avla, atunchi ashuno tumen.”
Le shelareske pale vladisardas, ke te lel pe leste sama, te del les pacha, haj tena feril khanyikas leskirendar, ke pe lesko slugipe te aven.
Pala unyidyesa o Felix kothe avilas la Druzillasa, peska romnyasa, kon biboldi romnyi sas. Akharadas le Pales, haj ashundas les pa Jezush Kristosko patyape.
Ba kana voj pa chachipe, pa uzhipe haj pa avluno krisipe las te vorbil, o Felix daramnes duma das: „Akanak apol zhatar, maj ande kaver vrama akharo tut.”
Ba vi kodo sperantisarelas, ke o Pal maj tele potyinela les, haj anda kado vi butivar akharavelas les haj vorbilaspe lesa.
Ba pala duj bersh pala o Felix o Porcius Festus kerdyilas o prefekto. O Felix ande biboldengi voja kamelas te phirel, kade le Pales ande robilya muklas.
The software aims to connect everyone with the text of the Bible on a quickly accessible, customisable interface.
The name refers to both connectivity and speed…
“Let every man be swift to hear, slow to speak, and slow to anger!”
With love, Tom Károly