chapter 7
O ang- rashaj pe kado pushlas lestar: „Apol chachikanes kade tordyol e butyi?”
Voj pale kodo phendas: „Murshale, phralale haj dadale, ashunen apol! Le luvudyimasko Del sikadyilas amare dadeske, le Abrahameske, kana ande Mezopotamia sas, haj so majanglal ande Haran chi gelas te beshel.
Kade das duma leste: »Zha avri pa tyi phuv haj mashkar tye nyamura haj av pe kodi phuv, so sikavav tuke«.
Pe kado muklas le kaldeickengo them, haj gelastar ande Haran. Kathar pale pala leske dadesko meripe perdal andas les pe kadi phuv, pe soste tume beshen akanak.
Chaches chi das anda late khanchi leske, ba phendas leske, ke leske delala haj leske falonge palaleste, ba nasles inke shavo.
O Del kado phendas leske: »Lesko falo bi kheresko beshela pe streno phuv, ande slugimata shonale haj dukharena len shtarshela bersh.
Ba me, – phenel o Raj –krisarav le popularos, kaske slugi avna, pala kodo avri avena haj slugina mange pe kado than«
Haj jekhtunes vi phanglas lesa le krujalshinimatasko konvencija. Le Abrahamoske kade kerdyilas lesko shavo o Izhak, kas krujalshindas po oxtoto dyes, le Izhakesko pale o Jakob, le Jakobeske pale le deshuduj patriarki.
Le patriarki anda xanzhvalimata bikindine le Jozhefes ando Edyiptomo, ba o Del lesa sas,
haj avrimuntusardas les anda sakono pharipe. Gracijimata haj platnikipe das les angla o Faraovo, kon le Edyiptomesko kraj sas, kade ke kodo le Edyiptomeske haj vi pe pesko kher anglalareske shutas les.
Ande kodal vrama bari bokh haj zurales baro chorripe sas ande intrego Edyiptomo haj Kanaano, haj amare dada chi rakhline xamasko.
Ba kana o Jakob ashundas, ke ando Edyiptomo si dyiv, bishaldas amare daden anglunes:
po dujto aba pinzhardine le phral le Jozhefes, haj angla o Faraovo avri zhanardyilas lesko falipe.
O Jozhef pe kado pala leste bishaladas haj akharadas peske dades, le Jakobos haj le intregone nyamon, eftavardesh thaj panzhe duhon.
O Jakob apol gelastar ando Edyiptomo, haj pala kodo voj haj amare dada muline.
Perdal ingerdine len ando Sichemo, haj praxosardine len ando murmunto, so o Abraham kindas peske pe rupune love kathar le Sichimicko Hamoresko shavo.
Ba kana pashardyilas la vorbaki vrama, so o Del das le Abrahameske, le manusha butajvenas ando Edyiptomo,
zhikaj kaver kraj chi kerdyilas ando Edyiptomo, kon chi pinzharelas le Jozhefes.
Kado nasules grizholaspe amare falonca. Kodolesa krisarelas amare daden, ke avritrubujas te shon penge cine shavoren, ke tena ashon ande trajoste.
Ande kodal vrami arakhadyilas o Mozesh, kas o Del kamelas. Trin shon ande leske dadesko kher xaxavenas les.
Pala soste apol avrishutine les, le faraovoski shej peste las les, haj oprebarardas les sar lako shavo te avilinosas.
O Mozesh kade avrisityilas le Edyiptomesko sako platnikipe, haj saktimicko kerdyilas ande peske vorbi haj trabi.
Haj kana pale andre pherdyardas ande pesko shtarvardeshto bersh, opre-shutas las ande pesko ilo, ke zhal thaj dikhel peske phralen, le Izraeleske shaven.
Kana dikhlas, ke jekhes bi chachindes azban, zhutisardas leske, haj kade das palpale e traba, ke mudardas le Edyiptomickires.
Ke kodo gindisardas, ke leske phral maj hatyarena les, ke o Del perdal pa leske vast del lenge o slobodipe, ba kodal chi hatyardine les.
Kaverdyes mashkar lende gelas, kana xanaspe, haj pacharelas len: »Murshale, tume phral sanle, sostar azban jekhavres?«
Ba kodo kon azbalas peske dopashune vortakos, pizdas les, haj kade das duma: »Kon shutas tut opralutneske bake krisareske pe amende?
Dore chi kames te mudares man, sar mudardan aratyi le Edyiptomickires?«
Kana o Mozesh ashundas kadal vorbi, nashlastar, haj avlimari kerdyilas pe Midianeski phuv, kaj duj shave kerdyiline les.
Kana shtarvardesh bersh nachiline ande Shina plajeski pusta andyelo sikadyilas leske ande vepresoski jag.
O Mozesh dikhelas les, haj chudilaspe pe traba. Ba kana kothe gelas te dikhel les, o Raj das leste duma:
»Me som tye dadengo Del, le Abrahamesko Del le Izhakesko Del haj le Jakobesko Del«. O Mozesh pe kado darajlas, haj chi tromajlas te dikhel les.
O Raj pale kodo phendas leske: »Le tele pa tye punre e sandala, ke o than, pe soste tordyos, sunto phuv si.
Mishto dikhlom ando Edyiptomo mure zhuvinde popularesko chorripe, ashundom lenge sansarimata, anda kodo hurajlom tele, ke te muntusarav len. Av apol, bishalav tut ando Edyiptomo«
Kadale Mozeshos, kas asvikisardine, kana kodo phendine: »Kon shutas tut opralutneske haj krisareske?«, o Del anglalareske haj slobodareske bishaldas les le andyeloske zhutimatasa, kon sikadyilas leske ando verpeso.
Voj andas len avri, haj mashkaral chudimata haj somnura kerelas pe Edyiptomeski phuv pala kodo kaj e Loli mara haj ande pusta inke shtarvardesh bersh.
Kado kodo Mozesh si, kon phendas le Izraeleske shavenge: »Profeta kerela tumenge o Del mashkar tumare phral, kasaves sar me som«.
Voj sas kodo, kon anda pusticko kethanipe, vorbilas le andyelosa, kon pe Shina plaj vorbilas leste haj kaj amare dada: voj las perdal le trajoske alava, ke amenge te delles.
Ba amare dada chi kamline te mukenpe leske, haj durutnardine les, haj lengo ilo palpale dorolas ando Edyiptomo.
Anda kodo phendine le Aroneske: »Ker amenge Devlen, te sikaven o drom von, ke chi zhanas, ke so pecisardyilas kadale Mozeshesa, kon avri andas amen pa Edyipomeski phuv!«
Haj vicava kerdine ande kodal dyesa, haj sarkafimo sikadine andre la fetishake, haj losshanas kodalake, so penge vastenca kerdine.
Anda kado o Del boldaspe lendar, haj mukelas lenge, ke te slugisaren le chereske ketanenge, sar vi si iskirime ande profetangi hertija:
»Dore sikadine mange andre sarkafimicko pedo bake sarkafimura
tala shtarvardesh bersh ande pusta, Izraelesko kher?
Barem andre xutyildine le Malokeski cerha,
haj tye devlenge, Refanosko cherhaj,
haj fetisha, so kerdine, ke te kamen len.
Anda kado perdal pa Babilonia ingro maj tumen«.
La konvencijaki cerha amare dadenca sas ande pusta, sar o Del phendasles lenge, kon kaj o Mozesh das duma, ke te kerella kade sar so dikhlasla.
Kado amare dada perdal line, haj vi andre ingerdinela, le Jozhuevosa ande murtikanengo them, kas o Del avri nashadas angla amare dada, zhi kaj le Davidesko dyesa.
Voj gracijimata arakhlas kaj o Del, haj rudyilas, ke kher te shaj vazdel le Jakoboske Devleske.
Palunes feri o Shalamon kerdas leske kher.
Ba le Uchimasko chi beshel ande kodo so vast kedas, sar e profeta phenel:
»O cheri si muro krajicko iskamin,
e phuv pale mure punresko iskamin.
Ta sosko kher kerenas mange – phenel o Raj –,
bake kaj avlas muro pachipesko than?
Haj na mure vast kerdas sa kadala?«
Tume capenokorreskire, bi krujalshinde ileskire haj kanenge! Tume sagda chi muken tumen le Suntone Duhoske: sar tumare dada, kade vi tume.
Save profetas chi nashavenas tumare dada? Ova, mudardine len, kon pa kodale Chachesko avlipe profecinas, kaske tume akanak leske purritora haj mudara kerdyiline,
tume, kon kathar le andyelongo slugipe line e kris, ba andre chi inkerdinela.”
Kana kadala ashundine, oprexolyajline ande pengo ilo, haj penge dand kircinas pe leste.
Ba voj le Suntone Duhosa pherdyardes opredikhlas po cheri, dikhlas le Devlesko luvudyipe, haj le Jezushes, ke pe leski chachi rig tordyol.
Dumadas: „Aketa, puterdes dikhav le cheran, haj le Manusheske Shaves te tordyol pe le Devleski chachi rig.”
Pe kado von cipindes andre xutyildine penge kan, haj jekhehatyaripesa pe leste nashline.
Pala kodo avri ingerdine les avral pa foro, haj barrenca shudine les. Le dikhara pale tele shutine penge gada kaj jekhe terneske punre, kas Shauleske anavarenas.
Kana barrenca shudenas le Ishtvanes, kodo kade rudyilas: „Raja Jezush, le tute muro duho!”
Kana pale pe changa pelas, glasunes kodo cipisardas: „Raja, na gindisar kado pe lengi bezex!” Kana kado avri phendas, sutastar ando Raj.