chapter 15
Le angrashaja le phurenca, haj le iskiritorenca kethane svato inkerdine detehara, pala kodo phangle le Jezushes, haj ingerdine les kaj o Pilatush.
O Pilatush pushlas les: „Tu san apol le biboldengo kraj?” Voj kodo phendas leske: „Tu phenes.”
Le angrashaja bute sakofalosa dosharenas les.
O Pilatush anda kado pale pushlas les: „Khanchi chi phenes?” Dikh, so sakofalosa dosharen tut!”
Ba o Jezush jekh vorba chi das majbut, o Pilatush pale bari dikhelas pe kado.
Kana baredyesa si, sityilas te mukel lenge mashkar le robura kodales, kas mangen.
Sas atunchi ekh Barabash anavesko robo, kas le rebellishonca kethane xutyildine, kon ando maripe vi mudaripe kerdas.
Avilas apol e butimata, haj line te mangen kodo, so sagda kerlas lenge.
O Pilatush kodo phendas lenge: „Kamen apol, te mukav tumenge le biboldenge krajes?”
Ke zhanelas, ke le angrashaja anda xanzhvalipe dine les ande lesko vast.
Ba le angrashaja oprexolyardine le manushen, ke barem le Barabashes te den avri lenge.
O Pilatush pale pushlas lendar: „So kamen apolal, so te kerav le biboldenge krajesa?”
Kodal pale numa kado cipinas: „Po trushul lesa!”
O Pilatush pushlas len: „Ba so nasulipe kerdas?” Kodal pe kado inke majfeder cipinas: „Po trushul lesa!”
O Pilatush atunchi, ke pe manushengi voja kamlas te kerel, bishaldas kade le Barabashes, le Jezushes pale chunyasa maradas, haj perdal das les, te tannaren les po trushul.
Atunchi le ketani andre ingerdine les ande andralutni avlina, kaj le majbut ketani sas haj kethane akhardine savorazhenen.
Lole gada dine pe leste, haj anda kanre korona xudine haj pe lesko shero shutineles,
pala kodo kade prassanas les: „Av drobome, biboldengo Kraj!
Pala kodo trestijasa marenas lesko shero, tele shungarenas les, haj changadines patyivinas angla leste.
Pala soste avriprassadine les, tele line pa leste o lolo, pe leste dine leske gada, haj avriingerdine les, ke po trushul te tannaren les.
Le Cireneickone Shimones, le Shandoreske haj le Rufuseske dades, kon pa mal khere avlines pe kodo drom nakhlastar, zorasa vladisardine leske, te ingrel lesko trushul.
Avriingerdine les pe kodo than, saves Golgotake anavarnas, so kattyi phenel, ke »Kuputengo than«.
Mirhasa hamisardi mol dine les te pel, ba chi trubusardas les.
Pala kodo po trushul tannardine les, leske gada pale uladine mashkar pende, avri kheldines, ke so saveske te perelpe.
O trito chaso sas, kana po trushul tannardine les.
Opre sas iskirime, ke anda soste krisardine les: „Le biboldengo kraj.”
Po trushul tannardine lesa kethanes vi duje choren, le jekhes pe chachi, le kaveres pe leski stungo rig shutine.
Kon pale intye phirenas pengo shero mishkisardines kushenas les, haj kado phenenas: „Mo! Tu, kon tele putres la khangera haj pe trin dyes oprevazdesla,
muntusar tut, hulyi tele pa trushul!”
Zhikade vi le angrashaja le iskiritorenca kethanes prassandes kado phenenas jekhavreske: „Kaveren muntusardas, pes pale chi zhanel te muntul!
O Kristo, le Izraelesko kraj, te hural tele akanak pa trushul, te dikhas haj te patyas!” Marhinas les vi kodala, kas lesa kethane tannardine po trushul.
Po shovto chaso tunyarikipe muklyosardyilas pe intrego phuv zhikaj o ijato chaso.
Po ijjato chaso o Jezush oprecipisardas, haj glasunes kade das duma: „Eloí, Eloí, lema sabaktani?” Kado kattyi phenel: „Muro Del, muro Del, sostar muklan man?”
Mashkar kodal kon kothe tordyonas unyizhene, kana kado ashundine, kodo phendine: „Aketa, le Illeshes akharel.”
O jekh kothe nashlas, ekha spondya ando shut boldas haj pekh trestija opreshutindes dasles te pel, haj kade das duma: „Muken les! Dikhas, aveltar apol o Illesh, tele te lel les!”
O Jezush pale glasunes oprecipisardas haj avri das pesko duho.
Atunchi la khangerako firhango mashkaral shindyilas kathar opralutnipe zhikaj telalutnipe.
Kana o shelari, kon leske mostar tordyolas, dikhlas, ke kade cipindes avri das pesko duho, kado phendas: „Kado manush chachikanes le Devlesko Shavo sas.”
Vi romnya sas, save dural dikhenas les. Mashkar lende sas e Maria Magdolna haj e Maria, le majtere Jakabeski haj le Jozhefeski dej, haj e Salome,
save, kana inke ande Galilea phirdas, zhanas pala leste haj sluginas leske; haj inke but kavera romnya, save lesa kethane geline opre ando Jeruzhalemo.
Kana andre ratyilas – ke e lasharimatako dyes, so angla savatosko dyes sas –,
kothe avilas o arimateicko Jozhef, jekh rajkano svatori, kon vi voj zhukarelas le Devleske themes. Tromanes andre gelas kaj o Pilatush, haj manglas le Jezusheske trupos.
O Pilatush chi kamelas te patyal, ke aba mulas. Akharadas le shelares, haj pushlas les, ke chachikanes mulas apol.
Kana kathar shelari chachardyilas pa traba, le Jozhefeske das o trupo.
O Jozhef pale poxtan kindas, tele las les, haj andre patyardas les ando poxtan. Pala kodo andekh plaj shindo murmunto shutas les, haj kaj le murmuntesko vudar, jekh baro barr shuvadas.
E Maria Magdolna pale haj e Maria, le Jozhefeski dej dikhenas, ke kaj praxosardine les.
The software aims to connect everyone with the text of the Bible on a quickly accessible, customisable interface.
The name refers to both connectivity and speed…
“Let every man be swift to hear, slow to speak, and slow to anger!”
With love, Tom Károly