chapter 6
Pala kado avri avilas kothar, haj gelastar ande pesko gav. Leske sityarde pale zhanas palaleste.
Kana savato kerdyilas, las te sityarel ande zhinagoga. But zhene, bari dikhenas pe lesko sityaripe, haj kodo pushenas: „Kathar las kado sa kadala? Sosko platnikipe si, so leske davardyilas? Haj soske chudimata kerdyon kathar leske vast?
Na o kashtari si kado, la Marijako shavo, le Jakabesko, le Jozhefesko, le Judashesko haj le Shimonesko phral? Na leske phenya sile kathe amende?” Haj xolyajline pe leste.
O Jezush pale kado phendas lenge: „Chi dikhen tele le profetas, numa ande lesko them, mashkar leske nyamura haj ande lesko kher.”
China chi zhanglas chi jekh chudimata te kerel kothe, feri unyi nasvalen sastyardas, pe lende shutindes pesko vast.
Haj bari dikhelas pe lengo bi patyape.
Pala kado andre phirdas le cine gava haj sityarelas.
Pala kodo peste akhardas le deshudujen, haj las te bishalel len, jekharsa dujzhenesardes. Zor das len pe biuzhe duhura.
Vladisardas lenge, ke po drom khanchi kaver tena ingren numa phirimaski rolyi: chi trasta, chi manro, chi love ande penge brichinara.
Phanden sandala, ba tena len opre duj zubunura.
Kodo phendas lenge: „Kana varikaj andre zhana andekh kher, ashon kothe, zhikaj chi zhantar kothar majdur.
Haj kana pale varikaj chi mukena tumen andre haj chi ashunena tumari vorba, zhan avri, haj maren tele vi o praho pa tumare punre, andre sikadines pe lende.”
Kodal vi geline, haj sityarnas, te bunun penge bezexa.
Bute bengen avri nashade, bute manushen makhline ulojesa, haj kodal vi sastyiline.
Vi o Herodesh kraj ashundas pa leste, ke lesko anav pinzhardo sas aba. Kodo phenenas: „O Bolari Janosh trajisardas opre anda meripe, haj anda kodo mishkisajven ande leste chuda kerde zor”
Kavera pale kade vorbinas: „O Illesh si voj.” Pale kavera kodo phenenas: „Profeta si kado; sar jekh t«avlas mashkar profeti.”
Kadal ashundes o Herodesh kade das duma: „O Janosh si, kasko shero tele shinadom, kodo trajisardyilas opre anda meripe.”
Ke o Herodesh vladisaripe das avri haj xutyiladas le Janoshes. Phanglo shutadas les ande robija anda Herodiash, kon leske phraleske, le Filiposke sas romnyi, ba voj romnyake las la.
Ke o Janosh kodo phendas le Herodesheske: „Naj slobodo tye phraleska romnya te les.”
Anda kado o Herodesh intrikalilas pe leste, haj kamelas te mudarel les, ba nas les troma te kerelles.
Ke o Herodesh inkrelas kathar o Janosh. Zhanelas pa leste, ke chacho sunto manush si, anda kado ferilas les, butivar labilisho kerdyolas les ashundines, ba losshanes ashunelas les.
Jekhar apol, kana o Herodesh baro xamo keradas pe pesko arakhadyimasko dyes peske themeske rajenge, le mijardenge haj le Galileickone rajkanenge,
andre gelas la Herodiashaki shej haj khelelas lenge. Kado zurales pe fajlimaste sas le Herodesheske haj kaj mesalya beshle rajenge. O kraj pe kado kodo phendas la shake: „Mang mandar so feri kames, me davla tuke.”
Vi colaxardas lake: „Ke zhiso manges, davla tuke, te trubuj vi mure themeski dopash rig!”.
Kodi avri gelas haj pushlas kathar peski dej: „So te mangav?” Kodi kade das duma: „Le Bolare Janoshesko shero.”
Pe kado sidyardes andre gelas kaj o kraj haj phendas pesko manglipe: „Kodo kamav, ke akanak de mange le Bolare Janoshesko shero pekh tejari.”
O kraj brigake daspe, ba anda peski colax haj angla majbut raj chi kamlas te lel laki voja.
Sigo bishaldas le mudares, haj vladisardas, te anen lesko shero pekh tejari. Kodo tele shindas lesko shero ande robija,
andas lesko shero pekh tejari, haj perdal dasles la shake, e shej pale kothe dasles peska dake.
Kana leske sityarde avri zhangline kado, aviline, ingerdine lesko trupo haj andekh murmunto shutine les.
Le aposhtolura pale kethane aviline kaj o Jezush, haj savorazhene phendine, ke so sakofalo kerdine haj so sityardine.
Voj a- tunchi kodo phendas lenge: „Aventar rigate pekh korkorutno than, haj hodinisaren jekh cerra.” Ke kasave but zhene phirenas-nakhenas, ke inke chi te xan nasle vrama.
Ando bero beshline apol, haj rigate cirdinepe pekh pachuno than, korko.
Butzhene apol dikhline len, haj sama line, kana geletar. Anda sako foro nashenas kothe, haj vi majsigo resline sar von.
Kana avri hulyilas, o Jezush dikhlas le bute manushen, haj sunusardas len, ke kasave sasle, sar le bimalyarenge bakre, haj pe but sakofaloste las te sityarel len.
Kana aba po apono bandyolas e vrama, kothe geline leste leske sityarde, haj kodo phendine leske: „Pusto si kado than haj vi nachilastar aba e vrama.
Bishal len, te zhanen anda cine gava haj majrura te kinen penge xamasko.
Ba voj kado phendas lenge: „Den len tume te xan.” Kodal kado phendine palpale: „Te zhastar haj te kinas anda dujshela denara manro, te zhanas te das len te xan?”
Pe kado pushlas lendar: „Sode manro si tumen?” Zhan haj dikhen les. „Kana ginadele, kodo phendine: „Panzh kotora haj duj mashe.”
Voj vladisardas lenge, ke te beshaven len tele savorazhenen ande grupura pe zeleno char.
Tele beshline apol, ande grupura shel thaj panzhvadesh zhene ande jekh.
Atunchi xutyildas le panzh kotora manre haj le duje mashen, opredikhlas po cheri, ashtyilipe phendas, haj phaglas le manren. Pala kodo kothe dasle kaj peske sityarde, te shonle angla lende. Vi le duje mashen uladas mashkar lende.
Savorazhene xaline haj vi chajiline.
Anda ashline manre haj mashe deshuduj koshnyici shutene pherdo.
Kon xaline anda manro, panzhmiji zhene sas, feri le mursh.
Pala kado sigo vladisardas peske sityardenge, te beshen ando bero, haj te zhan angle pe kaver dolma, ande Betsaida, zhikaj voj bishalel le manushen.
Pala soste bishaldas len, opre gelas po plaj te rudyil.
Kana andre ratyilas, o bero pe marako mashkar sas, voj pale korkori pe dolma.
Dikhelas len, ke soske phares shuvnaren – ke anda kaver rig phurdelas lenge e balval. Ande ratyako kodo vramipe, kana le ketani po shtarto parude than, kothe gelas lende pe mara phirindes, pala kodo kamlas te nakheltar pashalende.
Kodal pale dikhles, ke pe mara phirel, dichimaske gindisardine les haj opre cipisardine,
ke savorazhene dikhline les, haj darajline. Ba voj sigo duma das lende, haj kodo phendas lenge: „Patyan! Me som, na daran!”
Pala kodo andre beshlas lende ando bero, e balval pale tordyilas. Von pe kado inke majfeder chudinaspe ande pende.
Ke chi sityiline anda manreski traba, haj lengo ilo inke bi hatyarimasko sas.
Perdal resline pe mara, haj pe Genezarki phuv resline haj avri phangle.
Ba kana avri hulyiline anda bero, le manusha sigo oprepinzharde les,
haj krujal nashindes anda sako rig line kethane te kiden le nasvalen patosa kethane kothe, kaj ashundine, ke kothe si voj.
Kaj feri andre reslas ande gava, majrura bake forura, pe vujici shonas le nasvalen, haj mangenas les, ke feri kaj leske gadengo agor te shaj resen. Sa kodola, kon leste resline, sastyiline.
The software aims to connect everyone with the text of the Bible on a quickly accessible, customisable interface.
The name refers to both connectivity and speed…
“Let every man be swift to hear, slow to speak, and slow to anger!”
With love, Tom Károly