chapter 10
Pala kodo gelastar kothar, perdal ande Judeake granica. Pale butimata zhanas leste, voj pale sityarelas len.
Le farizana kothe geline leste, avri te zumaven les, pushle lestar: „Slobodo si apol le mursheske, te bishalel peska romnya pestar?”
Voj kado phendas lenge: „So vladisardas tumenge o Mozesh?”
Pe kado kodo phendine: „O Mozesh muklas, shindyimasko lil te ramosaras haj te bishalasla”.
Pe kado o Jezush kodo phendas lenge: „Anda tumare ilengo capenyipe iskirisardas tumenge kado vladipe.
Ba le genezaripesko anglunipe o Del mursheske haj zhulyake kerdas len.
Anda kado o manush mukhel peske dades haj peska da, haj kaj peski romnyi cirdelpe,
kade le duj jekh trupo kerdyol. Kade aba na duj zhene si, ba jekh trupo.
Apol so o Del kethane phanglas, kodo manush tena shinel jekhavrestar!”
Kade apol leske sityarde pale pushline les pa kadi traba.
Kodo phendas lenge: „Kon bishalel peska romnya haj kavera lela, ansurimataski bezex kerel kodalasa.
Kana pale e romnyi mukhel peske romes haj kavereste zhal, ansuripe phagel kodalesa.”
Atunchi cine shavoren ingerdine leste, te resel lende, ba le sityarde nashade kodalen, kon andine len.
Kado dikhles o Jezush oprexolyardyilas, haj kodo phendas lenge: „Muken mande t«aven le cine shavoren, haj na tordyon drom lenge, ke kasavengoj le Devlesko them.
Ke Amen, phenav tumenge: Kon chi lel le Devleske themes kade, sar le cine shavora, chi zhal andre kothe.”
Pala kodo ande peski angalyi las len, pe lende shutas pesko vast, haj ashtyilisardas len.
Kana avri gelas po drom, kothe nashlas leste varikon, pe changa pelas angla leste haj pushlas lestar: „Lashe Maistrovona! So te kerav, te rakhav e saguti trajimata?”
O Jezush kodo phendas leske pe kado: „Sostar phenes man lasheske? Khonyik naj lasho, feri korkoro o Del.
Pinzhares le vladimata: Na mudar, na phag ansuripe, na chor, na colaxar xoxamnes, khanyikas na xoxav, patyivin tye dades haj tya da!
Kuko kodo phendas leske: „Maistro! Kadal sa andre inkerdom aba zhi kathar muro ternipe.”
Atunchi o Jezush pe leste dikhlas, pe voja sas leske, haj kodo phendas leske: „Inke jekh trubujas te keres: zhatar, bikin sakofalo so si tut, haj de kodo le chorrenge, atunchi avucija avla tut ando rajo. Pala kodo av pala mande!”
Pe kado kodo brigako kerdyilas haj gelastar, ke baro barvalipe sas les.
O Jezush apolal krujal dikhlas haj kodo phendas peske sityardenge: „Sosko phares resen ande Devlesko them kodal, kas barvalimata si!”
Le sityarde chudinaspe pe leske vorbi. O Jezush pale duma das, haj kado phendas: „Mureshavora! Chaches, zurales pharoj ande Devlesko them andre te zhan!
Majushoroj le dromedareske perdal te zhal pa suvako kan, sar le barvalenge andre te zhan ande Devlesko them.”
Kodal pe kado inke majfeder chudinaspe, haj jekhavres pushenas: „Atunchi apol kon shaj muntusardyol?”
Ba o Jezush pe lende dikhlas haj kade das duma: „Le manushenge bi shajipe si kado, ba le Devleske na; ke le Devleske sakofalo shajipe si.”.
Atunchi o Peter das duma: „Aketa, ame muklam sakofalo haj avilam pala tute!”
O Jezush kado phendas palpale: „Amen, phenav tumenge: sakon kon muklas pesko kher bake peske phralen, phenyan bake dades, deja, haj peske shavoren, bake peske phuva anda mande haj anda evangeliumo,
shelvar kattyi lela aba akanak, ande kadi luma: khera, phralen, phenyan, daden, shavoren haj phuva, ba mashkar le nashavjimata, ande avluni luma pale e sagutni trajimata.
Anda but zhene avna anda anglune palune, haj anda palune anglune.”
Kana dromarnas, opre te zhan ando Jeruzhalemo, o Jezush angla lende zhalas. Le manusha chudinas les, leske sityarde pale daramnes zhanas pala leste. Atunchi pale peste las le deshudujen, haj las te vorbil lenge pa kodal, so pe leste zhukarel:
„Aketa, opre zhas ando Jeruzhalemo haj le Manusheske Shaves perdal dena le angrashajenge haj le iskiritorenge. Po meripe krisarna les haj perdalden les le murtikanonge.
Avri prassan les, tele shungarden les, chunyasa marena les haj mudaren les; ba po trito dyes opretrajisardyola.”
Atunchi angla leste gelas le Zebedeushesko shavo, o Jakab haj o Janosh, haj kade dine duma: „Maistro! Kodo fajas amen, ke so mangas, te keresles amenge.”
Voj pushlas lendar: „So kamen, te kerav tumenge?”
Kodo phendine: „Ker kodo amenge, ke mashkar amende jekh pe tyi chachi rig o kaver pale pe tyo stungo te shaj beshel ande tyo luvudyipe.”
O Jezush pe kado kodo phendas lenge: „Chi zhanen, ke so mangen. Zhanen te pen anda kodo taxtaj, anda soste me pav? Bake zhanen te bolen tumen kodola bolimatasa, sosa me bolarav man?”
Von kodo phendine leske: „Zhanas.” Atunchi o Jezush kodo phendas lenge: „Anda taxtaj anda soste me pav, pena, haj la bolimatasa, sosa me bolav man, vi tume bolardyona.
Ba kodo dinipe, ke pe muri chachi haj pa stungo rig kon te beshel, kodi na muri butyij. Kodo kodalengo avla, kaske kerdine les.”
Kana le desh anshunde kado, xolyajline po Jakab haj po Janosh.
Ba o Jezush peste akhardas len, haj kodo phendas lenge: „Zhanen, ke kas le populara rajeske inkren, kodal krajinpe pe lende, haj le bare saktimonpe pe lende.
Ba mashkar tumende kado na kade si, ke kon baro kamel t«avel, kodo t«avel tumari sluga:
kon pale angluno kamel t«avel mashkar tumende, kodo sluga avla sakoneske.
Ke chi le Manushesko Shavo na anda kodo avilas, leske te slugin, ba anda kodo voj te slugisarel, haj pesko trajo te del churatimaske anda butimata.”
Pala kado resline ando Jeriko. Kana avri gelas anda Jerikovo peske sityardenca haj le butipesa, o korro Bartímeus, le Tímeusesko shavo, pe dromeski jekh rig mangakerlas.
Kana ashundas, ke o Nazareticko Jezush si kodo, laspe te cipil: „Jezush, Davidesko Shavo! Gracijisar pe mande!”
But zhene pe leste dine duma, tena cipisarel. Ba voj inke majfeder cipilas: „Davidesko Shavo! Gracijisar pe mande!”
O Jezush tordyilas haj vladisardas, te akharen les angla leste. Pe kado kothe akhardine le korres, kadale vorbenca: „Patya! Ushtyi opre, akharel tut!”
Kodo pale tele shudas peske opralutne gada, oprexuttyilas haj kothe gelas leste.
O Jezush duma das leste haj pushlas lestar: „So kames, so te kerav tuke?” O korro kodo phendas leske: „Maistro! Te dikhav!”
O Jezush pe kado kodo phendas leske: „Zha, tyo patyape sastyardas tut.” Pe kado las te dikhel, haj zhalas pala leste po drom.
The software aims to connect everyone with the text of the Bible on a quickly accessible, customisable interface.
The name refers to both connectivity and speed…
“Let every man be swift to hear, slow to speak, and slow to anger!”
With love, Tom Károly