Evangeliumo kathar o Mark
10. fejezet
O Jezush ande Judea zhal
1. vers
Pala kodo gelastar kothar, perdal ande Judeake granica. Pale butimata zhanas leste, voj pale sityarelas len.
Pa shindyipe
2. vers
Le farizana kothe geline leste, avri te zumaven les, pushle lestar: „Slobodo si apol le mursheske, te bishalel peska romnya pestar?”
3. vers
Voj kado phendas lenge: „So vladisardas tumenge o Mozesh?”
4. vers
Pe kado kodo phendine: „O Mozesh muklas, shindyimasko lil te ramosaras haj te bishalasla”.
5. vers
Pe kado o Jezush kodo phendas lenge: „Anda tumare ilengo capenyipe iskirisardas tumenge kado vladipe.
6. vers
Ba le genezaripesko anglunipe o Del mursheske haj zhulyake kerdas len.
7. vers
Anda kado o manush mukhel peske dades haj peska da, haj kaj peski romnyi cirdelpe,
8. vers
kade le duj jekh trupo kerdyol. Kade aba na duj zhene si, ba jekh trupo.
9. vers
Apol so o Del kethane phanglas, kodo manush tena shinel jekhavrestar!”
10. vers
Kade apol leske sityarde pale pushline les pa kadi traba.
11. vers
Kodo phendas lenge: „Kon bishalel peska romnya haj kavera lela, ansurimataski bezex kerel kodalasa.
12. vers
Kana pale e romnyi mukhel peske romes haj kavereste zhal, ansuripe phagel kodalesa.”
Le shavorengo ashtyilipe
13. vers
Atunchi cine shavoren ingerdine leste, te resel lende, ba le sityarde nashade kodalen, kon andine len.
14. vers
Kado dikhles o Jezush oprexolyardyilas, haj kodo phendas lenge: „Muken mande t«aven le cine shavoren, haj na tordyon drom lenge, ke kasavengoj le Devlesko them.
15. vers
Ke Amen, phenav tumenge: Kon chi lel le Devleske themes kade, sar le cine shavora, chi zhal andre kothe.”
16. vers
Pala kodo ande peski angalyi las len, pe lende shutas pesko vast, haj ashtyilisardas len.
Pa barvalipe haj pa pala Jezushesko zhape
17. vers
Kana avri gelas po drom, kothe nashlas leste varikon, pe changa pelas angla leste haj pushlas lestar: „Lashe Maistrovona! So te kerav, te rakhav e saguti trajimata?”
18. vers
O Jezush kodo phendas leske pe kado: „Sostar phenes man lasheske? Khonyik naj lasho, feri korkoro o Del.
19. vers
Pinzhares le vladimata: Na mudar, na phag ansuripe, na chor, na colaxar xoxamnes, khanyikas na xoxav, patyivin tye dades haj tya da!
20. vers
Kuko kodo phendas leske: „Maistro! Kadal sa andre inkerdom aba zhi kathar muro ternipe.”
21. vers
Atunchi o Jezush pe leste dikhlas, pe voja sas leske, haj kodo phendas leske: „Inke jekh trubujas te keres: zhatar, bikin sakofalo so si tut, haj de kodo le chorrenge, atunchi avucija avla tut ando rajo. Pala kodo av pala mande!”
22. vers
Pe kado kodo brigako kerdyilas haj gelastar, ke baro barvalipe sas les.
23. vers
O Jezush apolal krujal dikhlas haj kodo phendas peske sityardenge: „Sosko phares resen ande Devlesko them kodal, kas barvalimata si!”
24. vers
Le sityarde chudinaspe pe leske vorbi. O Jezush pale duma das, haj kado phendas: „Mureshavora! Chaches, zurales pharoj ande Devlesko them andre te zhan!
25. vers
Majushoroj le dromedareske perdal te zhal pa suvako kan, sar le barvalenge andre te zhan ande Devlesko them.”
26. vers
Kodal pe kado inke majfeder chudinaspe, haj jekhavres pushenas: „Atunchi apol kon shaj muntusardyol?”
27. vers
Ba o Jezush pe lende dikhlas haj kade das duma: „Le manushenge bi shajipe si kado, ba le Devleske na; ke le Devleske sakofalo shajipe si.”.
28. vers
Atunchi o Peter das duma: „Aketa, ame muklam sakofalo haj avilam pala tute!”
29. vers
O Jezush kado phendas palpale: „Amen, phenav tumenge: sakon kon muklas pesko kher bake peske phralen, phenyan bake dades, deja, haj peske shavoren, bake peske phuva anda mande haj anda evangeliumo,
30. vers
shelvar kattyi lela aba akanak, ande kadi luma: khera, phralen, phenyan, daden, shavoren haj phuva, ba mashkar le nashavjimata, ande avluni luma pale e sagutni trajimata.
31. vers
Anda but zhene avna anda anglune palune, haj anda palune anglune.”
E trito profecia pa dukhardyipe haj pa opretrajisaripe
32. vers
Kana dromarnas, opre te zhan ando Jeruzhalemo, o Jezush angla lende zhalas. Le manusha chudinas les, leske sityarde pale daramnes zhanas pala leste. Atunchi pale peste las le deshudujen, haj las te vorbil lenge pa kodal, so pe leste zhukarel:
33. vers
„Aketa, opre zhas ando Jeruzhalemo haj le Manusheske Shaves perdal dena le angrashajenge haj le iskiritorenge. Po meripe krisarna les haj perdalden les le murtikanonge.
34. vers
Avri prassan les, tele shungarden les, chunyasa marena les haj mudaren les; ba po trito dyes opretrajisardyola.”
Pa rajimata haj pa slugimata
35. vers
Atunchi angla leste gelas le Zebedeushesko shavo, o Jakab haj o Janosh, haj kade dine duma: „Maistro! Kodo fajas amen, ke so mangas, te keresles amenge.”
36. vers
Voj pushlas lendar: „So kamen, te kerav tumenge?”
37. vers
Kodo phendine: „Ker kodo amenge, ke mashkar amende jekh pe tyi chachi rig o kaver pale pe tyo stungo te shaj beshel ande tyo luvudyipe.”
38. vers
O Jezush pe kado kodo phendas lenge: „Chi zhanen, ke so mangen. Zhanen te pen anda kodo taxtaj, anda soste me pav? Bake zhanen te bolen tumen kodola bolimatasa, sosa me bolarav man?”
39. vers
Von kodo phendine leske: „Zhanas.” Atunchi o Jezush kodo phendas lenge: „Anda taxtaj anda soste me pav, pena, haj la bolimatasa, sosa me bolav man, vi tume bolardyona.
40. vers
Ba kodo dinipe, ke pe muri chachi haj pa stungo rig kon te beshel, kodi na muri butyij. Kodo kodalengo avla, kaske kerdine les.”
41. vers
Kana le desh anshunde kado, xolyajline po Jakab haj po Janosh.
42. vers
Ba o Jezush peste akhardas len, haj kodo phendas lenge: „Zhanen, ke kas le populara rajeske inkren, kodal krajinpe pe lende, haj le bare saktimonpe pe lende.
43. vers
Ba mashkar tumende kado na kade si, ke kon baro kamel t«avel, kodo t«avel tumari sluga:
44. vers
kon pale angluno kamel t«avel mashkar tumende, kodo sluga avla sakoneske.
45. vers
Ke chi le Manushesko Shavo na anda kodo avilas, leske te slugin, ba anda kodo voj te slugisarel, haj pesko trajo te del churatimaske anda butimata.”
Le jerikovickone korresko sastyaripe
46. vers
Pala kado resline ando Jeriko. Kana avri gelas anda Jerikovo peske sityardenca haj le butipesa, o korro Bartímeus, le Tímeusesko shavo, pe dromeski jekh rig mangakerlas.
47. vers
Kana ashundas, ke o Nazareticko Jezush si kodo, laspe te cipil: „Jezush, Davidesko Shavo! Gracijisar pe mande!”
48. vers
But zhene pe leste dine duma, tena cipisarel. Ba voj inke majfeder cipilas: „Davidesko Shavo! Gracijisar pe mande!”
49. vers
O Jezush tordyilas haj vladisardas, te akharen les angla leste. Pe kado kothe akhardine le korres, kadale vorbenca: „Patya! Ushtyi opre, akharel tut!”
50. vers
Kodo pale tele shudas peske opralutne gada, oprexuttyilas haj kothe gelas leste.
51. vers
O Jezush duma das leste haj pushlas lestar: „So kames, so te kerav tuke?” O korro kodo phendas leske: „Maistro! Te dikhav!”
52. vers
O Jezush pe kado kodo phendas leske: „Zha, tyo patyape sastyardas tut.” Pe kado las te dikhel, haj zhalas pala leste po drom.
Könyvek
