Evangeliumo kathar o Mark

Fejezetek:

… 10 11 12 13 14 …   ⇤ ← 12 → ⇥

1. vers

Pala kado ande paraboli las duma te del lende: „Jekh manush drakh beshadas, gradyija kerdas krujal, xiv hunadas, haj kalsamos vazdas. Pala kodo avri das kodo le arendashenge, voj pale pe strene phuva dromardastar.

2. vers

Kana avilastar e vrama, bishaldas jekhe slugas kaj le arendasha, te anel lendar anda drakhengo upaja.

3. vers

Kodal xutyildine le slugas, mardine les, haj shushe vastesa nashadine les.

4. vers

Pe kado kaver sluga bishaldas lende: kadaleske inke vi lesko shero andre phagline, haj marhisardine les.

5. vers

Ba pale kaveres bishaldas, ba vi kodales mudardine, haj pala kodo inke vi kaveren.

6. vers

Sasles jekh chachikanes skunpo shavo, palunes kodales bishaldas lende. Ke kodo gindisardas: »Mure shaves ande patyivate inkrena.«

7. vers

Ba le arendasha kade denas duma mashkar pende: »Kathej o arando! Aven, mudaras les, haj amaro avla o arandimope!«

8. vers

Xutyildine les, mudardine les, haj perdal shudine les pa drakhenge gradyija.

9. vers

So kerla apol akanak le drakhengo raj? Avela, mudarla le arenda-shen, le drakhen pale kaverenge dela.

10. vers

Bake chi ginade o iskiripe:
»O barr, saves le barrara shudine,
kolcosko barr kerdyilas;

11. vers

o Raj kerdas les kodaleske,
haj kado chudimataj
ande amare jakha«?”

12. vers

Atunchi kamline te xutyilen les, ba daranas kathar le butimata. Hatyardine kodo, ke pa lende vorbisardas kadal paraboli. Kothe mukhline les apol, haj gelinetar.

13. vers

Majpalal kothe bishaldine leste mashkar le farizanongire haj Herodesheske manushen unyizhenen, te xutyilen les ande leske vorbi.

14. vers

Kothe aviline, kodo phendine leske: „Maistro! Zhanas, ke chachipe phenes sagda, haj chi dikhes le manushengo trupo, ba le Devlesko drom kathar o chachipe sityares. Slobodo si taksha te potyinas le chasaroske, bake na? Potyinas bake tena potyinas?”

15. vers

Ba voj pinzharlas lengo paxandipe, anda kado kodo phendas lenge: „Sostar zumaven man? Anen mange jekhe denaros, mukh dikhavles!”

16. vers

Kodal andine jekhes. Atunchi pushlas len. „Kaskij kadi mosura haj o opreiskiripe?” Kodo phendine leske: „Le chasareskoj.”

17. vers

Pe kado o Jezush kodo phendas lenge: „Den apol le chasareske, so le chasareskoj, haj le Devleske, so le Devleskoj.” Haj chudinaspe pe leste.

18. vers

Atunchi kothe gele leste le sadducana, kon kodo phenen, ke naj opretrajisaripe. Pushline les:

19. vers

„Maistro! O Mozesh iskirisardas amenge, ke kana varikaske merel lesko phral haj pala peste mukela peska romnya bi shavoresko, atunchi o phral te lel kodaleska romnya, haj te kerel shaves le phraleske.

20. vers

Sas jekhar efta phral. O angluno romnya las peske pala kodo mulas, ba shavoro chi kerdas.

21. vers

Atunchi o kaver las la, ba vi kodo mulas, haj chi muklas shavores. Zhikade vi o trito.

22. vers

Las la romnya sa le efta phral, ba chi mukline shavores. Sa pala kado mulas vi e romnyi.

23. vers

Kaj o opretrajisaripe apolal, kana sa opretrajisardyona, mashkar kadal saveske avla leski romnyi? Ke eftange sas voj romnyi.”

24. vers

O Jezush kado phendas lenge: „Kade dichol anda kodo chi vobin vorta, ke chi pinzharen le iskirimata, haj chi le Devlesko saktimo!

25. vers

Ke kana le mule opretrajisardyona, chi ansurisajven, chi romeste chi zhan, ba kasave avna, sar le andyela ando rajo.

26. vers

Pa mule apolal, ke opretrajisardyona, chi ginade ande Mozesheski hertija kaj o vepresoste, ke sar phendas leske o Del, kana duma das: »Me som le Abrahamesko haj le Izhakesko Del haj le Jakobesko Del?«

27. vers

Voj na le mulengo Del si, ba le zhuvindengo. Kade apol zurales ando bizhanipe sanle.”

28. vers

Atunchi kothe gelas leste jekh iskiritori, kon ashundas lengo xape, ke dikhlas, ke mishto das leske e vorba, pushlas les: „Savo si o majangluno mashkar le vladimata?”

29. vers

O Jezush kado phendas leske: „Mashkar le vladimata o majangluno kado si: »Ashun, Izrael! Amaro Raj, amaro Del si o jekhtuno Raj!

30. vers

Kam tye Rajes, tye Devles anda tyo intrego ilo, anda tyo intrego duho, anda tyi intrego godyi haj anda tyi intrego zor! « Kado si o angluno vladipe.

31. vers

O dujto pale kadoj: »Kam tye dopashone vortakos, sar tut!«. Kathar kadal naj maj bare vladimata.”

32. vers

O iskiritori atunchi kado phendas leske: „Mishtoj, Maistro! Mishto phendan, ke jekh si o Del, haj naj kaver numa voj;

33. vers

haj les te kamas anda intrego ilo, anda intregone godyate, anda intrego duho haj anda intrego zor, le dopashune vortakos pale kade te kamas, sar amen – majbut kerel kathar sako phabardo thaj kaverfale sarkafimo.”

34. vers

Kana o Jezush dikhlas, ke sosko godyaverikanes das vorba palpale, kodo phendas leske: „Chi san dur kathar le Devlesko them.” Pala kado khonyik chi tromajlas majdur te pushel les.

35. vers

Ba o Jezush, kana ande khangeri sityardas, pushlas: „Sar shaj phenen le iskiritora, ke o Kristo le Davidesko shavoj?

36. vers

Haj ke voj o David phenel kathar o Sunto Duho phenades:
»Kade del duma o Raj kaj muro Raj:
pa muri chachi rig besh tele,
zhikaj tala tye punre shudav tye dushmanon«.

37. vers

Kana o David peske Rajeske phenel les, atunchi sar shaj avel lesko shavo?” Haj e butimata vojasa ashunelas les.

38. vers

Voj pale mashkar o sityaripe kado phendas lenge: „Ferin tumen kathar le iskiritora, saven fajle ande lunzhi pluviale te phiren, haj ande forura kana dyes den len,

39. vers

ande zhinagogi ande anglune thana te beshen, pe bare xamimata po majangluno than te beshen.

40. vers

Xan le phivlyange khera, haj avralutnes bare rudyin. Kadalen majfeder krisarna!”

41. vers

O Jezush pala kado tele beshlas ande khangeraki kodi rig kaj e avucija kidenas kethane, haj dikhelas, ke sar shuden le manusha love ando taxtaj: but barvale but love shudine andre.

42. vers

Pala kodo avilas jekh chorri phivlyi romnyi, haj andre shudas duj fillera, so jekh krecari kerel.

43. vers

Atunchi kothe akhardas peske sityarden, haj kodo phendas lenge: „Amen, phenav tumenge: kadi chorri phivlyi majbut das kathar kodal, kon but love shudine ando taxtaj.

44. vers

Ke kodal sa anda kodo dine, anda soste but sile, kadi pale anda pesko chorripe andre shudas sakofalo, so sasla, sa kodo anda soste shaj trajilpe.”

Fejezetek:

1 2 3 4 5 6 7 8 9 10 11 12 13 14 15 16