chapter 12
Pala kado ande paraboli las duma te del lende: „Jekh manush drakh beshadas, gradyija kerdas krujal, xiv hunadas, haj kalsamos vazdas. Pala kodo avri das kodo le arendashenge, voj pale pe strene phuva dromardastar.
Kana avilastar e vrama, bishaldas jekhe slugas kaj le arendasha, te anel lendar anda drakhengo upaja.
Kodal xutyildine le slugas, mardine les, haj shushe vastesa nashadine les.
Pe kado kaver sluga bishaldas lende: kadaleske inke vi lesko shero andre phagline, haj marhisardine les.
Ba pale kaveres bishaldas, ba vi kodales mudardine, haj pala kodo inke vi kaveren.
Sasles jekh chachikanes skunpo shavo, palunes kodales bishaldas lende. Ke kodo gindisardas: »Mure shaves ande patyivate inkrena.«
Ba le arendasha kade denas duma mashkar pende: »Kathej o arando! Aven, mudaras les, haj amaro avla o arandimope!«
Xutyildine les, mudardine les, haj perdal shudine les pa drakhenge gradyija.
So kerla apol akanak le drakhengo raj? Avela, mudarla le arenda-shen, le drakhen pale kaverenge dela.
Bake chi ginade o iskiripe:
»O barr, saves le barrara shudine,
kolcosko barr kerdyilas;
o Raj kerdas les kodaleske,
haj kado chudimataj
ande amare jakha«?”
Atunchi kamline te xutyilen les, ba daranas kathar le butimata. Hatyardine kodo, ke pa lende vorbisardas kadal paraboli. Kothe mukhline les apol, haj gelinetar.
Majpalal kothe bishaldine leste mashkar le farizanongire haj Herodesheske manushen unyizhenen, te xutyilen les ande leske vorbi.
Kothe aviline, kodo phendine leske: „Maistro! Zhanas, ke chachipe phenes sagda, haj chi dikhes le manushengo trupo, ba le Devlesko drom kathar o chachipe sityares. Slobodo si taksha te potyinas le chasaroske, bake na? Potyinas bake tena potyinas?”
Ba voj pinzharlas lengo paxandipe, anda kado kodo phendas lenge: „Sostar zumaven man? Anen mange jekhe denaros, mukh dikhavles!”
Kodal andine jekhes. Atunchi pushlas len. „Kaskij kadi mosura haj o opreiskiripe?” Kodo phendine leske: „Le chasareskoj.”
Pe kado o Jezush kodo phendas lenge: „Den apol le chasareske, so le chasareskoj, haj le Devleske, so le Devleskoj.” Haj chudinaspe pe leste.
Atunchi kothe gele leste le sadducana, kon kodo phenen, ke naj opretrajisaripe. Pushline les:
„Maistro! O Mozesh iskirisardas amenge, ke kana varikaske merel lesko phral haj pala peste mukela peska romnya bi shavoresko, atunchi o phral te lel kodaleska romnya, haj te kerel shaves le phraleske.
Sas jekhar efta phral. O angluno romnya las peske pala kodo mulas, ba shavoro chi kerdas.
Atunchi o kaver las la, ba vi kodo mulas, haj chi muklas shavores. Zhikade vi o trito.
Las la romnya sa le efta phral, ba chi mukline shavores. Sa pala kado mulas vi e romnyi.
Kaj o opretrajisaripe apolal, kana sa opretrajisardyona, mashkar kadal saveske avla leski romnyi? Ke eftange sas voj romnyi.”
O Jezush kado phendas lenge: „Kade dichol anda kodo chi vobin vorta, ke chi pinzharen le iskirimata, haj chi le Devlesko saktimo!
Ke kana le mule opretrajisardyona, chi ansurisajven, chi romeste chi zhan, ba kasave avna, sar le andyela ando rajo.
Pa mule apolal, ke opretrajisardyona, chi ginade ande Mozesheski hertija kaj o vepresoste, ke sar phendas leske o Del, kana duma das: »Me som le Abrahamesko haj le Izhakesko Del haj le Jakobesko Del?«
Voj na le mulengo Del si, ba le zhuvindengo. Kade apol zurales ando bizhanipe sanle.”
Atunchi kothe gelas leste jekh iskiritori, kon ashundas lengo xape, ke dikhlas, ke mishto das leske e vorba, pushlas les: „Savo si o majangluno mashkar le vladimata?”
O Jezush kado phendas leske: „Mashkar le vladimata o majangluno kado si: »Ashun, Izrael! Amaro Raj, amaro Del si o jekhtuno Raj!
Kam tye Rajes, tye Devles anda tyo intrego ilo, anda tyo intrego duho, anda tyi intrego godyi haj anda tyi intrego zor! « Kado si o angluno vladipe.
O dujto pale kadoj: »Kam tye dopashone vortakos, sar tut!«. Kathar kadal naj maj bare vladimata.”
O iskiritori atunchi kado phendas leske: „Mishtoj, Maistro! Mishto phendan, ke jekh si o Del, haj naj kaver numa voj;
haj les te kamas anda intrego ilo, anda intregone godyate, anda intrego duho haj anda intrego zor, le dopashune vortakos pale kade te kamas, sar amen – majbut kerel kathar sako phabardo thaj kaverfale sarkafimo.”
Kana o Jezush dikhlas, ke sosko godyaverikanes das vorba palpale, kodo phendas leske: „Chi san dur kathar le Devlesko them.” Pala kado khonyik chi tromajlas majdur te pushel les.
Ba o Jezush, kana ande khangeri sityardas, pushlas: „Sar shaj phenen le iskiritora, ke o Kristo le Davidesko shavoj?
Haj ke voj o David phenel kathar o Sunto Duho phenades:
»Kade del duma o Raj kaj muro Raj:
pa muri chachi rig besh tele,
zhikaj tala tye punre shudav tye dushmanon«.
Kana o David peske Rajeske phenel les, atunchi sar shaj avel lesko shavo?” Haj e butimata vojasa ashunelas les.
Voj pale mashkar o sityaripe kado phendas lenge: „Ferin tumen kathar le iskiritora, saven fajle ande lunzhi pluviale te phiren, haj ande forura kana dyes den len,
ande zhinagogi ande anglune thana te beshen, pe bare xamimata po majangluno than te beshen.
Xan le phivlyange khera, haj avralutnes bare rudyin. Kadalen majfeder krisarna!”
O Jezush pala kado tele beshlas ande khangeraki kodi rig kaj e avucija kidenas kethane, haj dikhelas, ke sar shuden le manusha love ando taxtaj: but barvale but love shudine andre.
Pala kodo avilas jekh chorri phivlyi romnyi, haj andre shudas duj fillera, so jekh krecari kerel.
Atunchi kothe akhardas peske sityarden, haj kodo phendas lenge: „Amen, phenav tumenge: kadi chorri phivlyi majbut das kathar kodal, kon but love shudine ando taxtaj.
Ke kodal sa anda kodo dine, anda soste but sile, kadi pale anda pesko chorripe andre shudas sakofalo, so sasla, sa kodo anda soste shaj trajilpe.”