Evangeliumo kathar o Mark

Chapters:

1 2 3 4 5 6 …   ⇤ ← 2 → ⇥

verse #1

Pa unnyi dyesa pale andre gelas ando Kafarnaumo,

verse #2

haj gelastar e viaca, ke ando kher si. But zhene kethane aviline, kade aba chi kaj o vudar chi resenas, haj viacarelas lenge o alav.

verse #3

Mashkaral kothe aviline leste unyizhene, save jekhe paralizanes andine, shtar zhene vazdenas les.

verse #4

Ke chi zhanenas angla leste te ingren les kathar e butimata, avri puterdine le kheresko opralalutnipe, kaj voj sas, tele mukhline o pato, pe soste o paralizano pashjolas.

verse #5

Lengo patyape dikhles o Jezush kade das duma kaj o paralizano: „Muro shavo! Tye bezexa jertimata resline.”

verse #6

Beshenas kothe unyizhene vi mashkar le iskiritora. Kadal kodo gindinas ande pende:

verse #7

„Sar shaj vorbil kado kade? Kushel kado. Kon shaj jertisarel le bezexa kaver, sar o Del?”

verse #8

O Jezush sama las ande pesko dyi, ke kade gindinpe ande pende, anda kado kodo phendas lenge: „Sostar gindisaren kadal ande tumaro ilo?

verse #9

So si majushoro, kodo phendo le paralizaneske: »Jertimata resline tye bezexa«, bake kodo phendo: »Ushtyi opre, le tyo pato haj phir«?

verse #10

Haj apol te dikhen, ke le Manusheske Shaves saktimo siles pe luma le bezexa te jertisarel – atunchi karing o paralizano boldaspe.

verse #11

Phenav tuke, ushtyi opre, le tyo pato haj zha khere!”

verse #12

Kodo pale sigo vi opre ushtyilas, xutyildas pesko pato, haj gelastar angla sakoneske jakhenge dikhimata, kade apol savorazhene bari dikhline, haj ashtyilinas le Devles. Kado phenenas: „Kasavo inke chi diklam chikana.”

verse #13

Pala kado pale avri gelas pasha mara. Sa le butimata karing leste cirdinepe, voj pale sityarlas len.

verse #14

Sar majdur gelas, dikhlas le Leves, le Alfeuseske shaves kaj o vamo beshelas, haj duma das leste: „Av pala mande!” kodo opreushtyilas, haj gelas pala leste.

verse #15

Majpalal kana kaj e mesalya beshline ande kadalesko kher, but financura haj bezexasle beshline tele le Jezushesa haj leske sityardenca kethane; ke butzhene sas kon zhanas pala leste.

verse #16

Le iskiritora haj le farizana, kodo dikhles, ke le bezexaslenca haj le financonca xal, pushline leske sityarden: „Sostar xal tumaro Maistrovo le financonca haj le bezexaslenca?”

verse #17

O Jezush ashundas len haj kado phendas lenge: „Na le sastenge trubuj o sastyari, ba le nasvalenge, na le chachen avilom te akharav, ba le bezexaslen.”

verse #18

Le Janosheske sityarde haj le farizana postyinas. Kothe aviline unyizhene, haj pushle kathar o Jezush: „Sostar postyin le Janosheske sityarde haj le farizanenge sityarde, tyire sityarde pale chi postyin?”

verse #19

O Jezush kado phendas lenge: „So gindin shaj postyin le xanamik butimata, zhikaj lenca si inke o piramno? Zhikaj lendej o piramno, nashtig postyin.

verse #20

Avna apol kodola dyesa, kana ingerna lendar le piramnes; atunchi postyina, kodo dyes.

verse #21

Khonyik chi suvel pe dulmutane gada nyevo poxtan, ke kodo shingrel vi le lashe riga, haj o shindyipe inke majbaro avla.

verse #22

Khonyik chi shorel nyevi mol ande dulmutane morchune trasti, ke atunchi e mol avri shinel le morchune trasti, haj avri shordyol, haj vi le trasti xalyon. E nyevi mol ande nyeve morchune trasti trubuj te shoren.”

verse #23

Pecisardyilas pale, ke savatone kana pe phuva phirlas, leske sityarde linepe haj tele shingrenas le dyiva.

verse #24

Le farizana kodo phende leske: „Dikh, kodo keren savatone so naj slobodo.”

verse #25

Voj kado phendas lenge palpale: „Chikana ginade, ke o David so kerdas, kana bokhalo sas, haj vi kodal kon lesa sas?

verse #26

Sar gelas andre ande Devlesko kher ande Abjatar angrashajeski vrama, haj xalas anda avri shutino manro, so nashtig xal kaver, numa le rashaja, haj das vi le majbutenge?”

verse #27

Pala kodo inke phendas: „O savato kerdyilas anda manush, haj na o manush anda savato.

verse #28

Anda kado le Manushesko Shavo rajil vi le savatones.”

Chapters:

1 2 3 4 5 6 7 8 9 10 11 12 13 14 15 16