chapter 14
Duje dyesenca pala kado sas la patradyako ratyako xamo haj le bi kamire manrengo barodyes. Le angrashaja haj le iskiritora pa kodo vorbisarnas, ke sar shaj xutyilnas les xajipesa, haj sar shaj mudarenas les.
Ke kodo phendine: „Na pe baredyeseste, tena avel maripe mashkar butimata.”
Kana o Jezush ande Betania sas ande lepralone Shimonesko kher haj kaj e mesalya beshelas, kothe gelas leste ekh romnyi, ande alabashtromicko vaso chachi, kuch nardushicko uloj andines. Phaglas o alabashtromo, haj pe lesko shero shordas les.
Sas kon xolyajlas anda kado, haj kade vorbinas mashkar pende: „Pe soste sas lasho kade po khanchi avri te shoren kado uloj?
Kado uloj shaj bikindesas majbut, sar pe trinshela denara, haj le love shaj dinesas kothe le chorrenge!” Haj xolyajline pe romnyi.
Ba o Jezush kade das duma: „Denla pacha! Sostar azban la? Ke lasho kerdas mange.
Chorre sagda avla tumenca, haj kana kamen, mishtyipe shaj keren lenge: ba me chavo sagda tumenca.
Voj kerdas kodo, so kathar laki zor sas: anglal makhlas muro trupo po praxope.
Apol, phenav tumenge: pe intrego luma, kaj sityarena kado evangeliumo, phenena vi kodo, so voj kerdas, pe lako serovjipe.”
O ishkarioticko Judash apol, mashkar deshuduj o jekh, gelastar kaj le angrashaja, avri te del les lenge.
Kana kado ashundine von, losshajline, haj vi phendine leske, ke love dena les. Voj pale zhukarlas e vrama, kana shaj del avri les.
Le bikamire manresko angluno dyes, kana la patradyako bakrora opresarkafenas, leske sityarde pushline lestar: „So kames, kaj te zhas angle te lasharas, te shaj xas la patradyako ratyako xamo?”
Atunchi bishaldas dujen mashkar peske sityarde, kadale vorbenca: „Zhantar ando foro. Maladyona kothe jekhe manushesa, kon pajesko khoro ingrel. Zhan pala leste,
haj kaj andre zhala, phenen le khereske rajeske, ke o Maistrovo pushel: »Kaj si muro than, kaj la patradyake bakrora mure sityardenca shaj xav?«
Sikavla tumenge ekh baro xamaskosko than gata, sakofalo avri shutines. Kothe lasharen angle amenge.”
Leske sityarde oprelinepe haj andre geline ando foro. Sakofalo kade arakhline, sar phendas lenge, haj kerdine la patradyako xamos.
Kana andre ratyilas, kothe reslas le deshudujenca.
Kana tele beshline haj xanas, o Jezush kade das duma: „Amen, phenav tumenge: mashkar tumende o jekh, kon manca xal, purrila man”.
Pe kado kukola brigajline, haj jekhtunes pushenas lestar: „Dore na me som kodo, Raja?”
Voj kodo phendas lenge: „Mashkar deshuduj o jekhto, kon manca jekharsa bolel anda tejari.
Ke le Manushesko Shavo zhalatar, sar vi si iskirime pa leste, ba jaj si kodale manusheske, kon le Manusheske Shaves purril! Majmishto avilino kodale manusheske, chi tena arakhadyilino!”
Sar xanas, o Jezush xutyildas o manro, ashtyilipe phendas, phaglas les, haj kothedasles lenge kadale vorbenca: „Xutyilen les, kado muro trupoj.”
Pala kodo xutyildas o taxtaj, najisipe phendas, kothe das les lenge, haj piline anda leste savorazhene.
Voj pale kade das duma: „Kado muro rat si, le nyeve tashtamentosko, savo anda butimata avri shordadyol.
Amen, phenav tumenge: majbut aba chi pav anda drakhesko upajipe zhikaj kodo dyes, zhikaj o nyevo chi pav ande Devlesko them.”
Palasoste gilyabade o himnuso, avrigeline pe uloj kashtengo plaj.
O Jezush kodo phendas lenge: „Savora zhene koldolardyona ande mande, ke iskirime si: »Marav le malyares, haj rispisardyon le bakra«.
Ba palasoste opretrajisardyilom, angla tumende zhav ande Galilea.”
O Peter pe kado kodo phendas leske: „Sakonesko patyape te bandyola ande tute, muro patyape ande tute chikana chi mukela man!”
O Jezush kado phendas leske palpale: „Amen, phenav tuke, tu inke kadi ratyi zhiso majanglal o bashno duvar cipila, vi trivar asvikaresa man.”
Voj inke majfeder zurarlaspe: „Inke vi tusa kethanes te trubuj te merav, chi atunchi chi asvikaro tut!” Zhikade vorbinas vi le majbut savorazhene.
Kothe resline ando majro, saves Getsamaneske anavarenas. Atunchi kodo phendas peske sityardenge: „Beshen tele kathe, zhikaj rudyisarav.”
Pashapeste las le Peteres, le Jakabos haj le Janoshes, haj laspe te izdral haj te dukhardyol.
Kodo phendas lenge: „Mulikanes brigakoj muro dyi. Ashon kathe haj ratyaren.”
Jekh cerra majangle gelas, pe phuv burdosajlas haj rudyilas, ke te shaj, te durutnisajvel lestar kado chaso.
Kado phendas: „Abba, Dade! Sakofalo shajipe si tuke. Le mandar kado taxtaj! Ba na kodo t«avel, so me kamav, kodo so tu.”
Pala kodo palpale avilas, haj sovjindos arakhlas len. Kade das duma kaj o Peter: „Shimon, ta soves? Chi zhanglan te ratyares jekh chaso?
Ratyaren haj rudyin, ke ande zumavjimata tena peren! O duho gata si, ba o trupo slaboj.”
Pala kado pale gelastar haj rudyilas, zhikodale vorbenca save majinte phenelas.
Pale palpale gelas, haj sovjindes arakhlas len, ke lenge jakha pharosajline: china chi zhanenas, so te phenen palpale leske.
Pala kodo vi po trito kothe avilas, haj kodo phendas lenge: „Soven feri haj pachardyon! Dostaj, reslas o chaso! Aketa, le Manusheske Shaves ande bezexalenge vast dena.
Ushtyen opre, zhastar! Aketa, pashe si aba, kon purril man.”
Inke vorbilas, kana reslas o iskarioticko Judas, o jekh mashkar deshuduj, haj lesa but manusha xanrenca rolyanca kathar le angrashaja, kathar le iskiritora haj kathar le phure bishaldines.
Kon purrisardas les, somno sikadas lenge: „Kas chumidav, voj si, xutyilen les, haj mishto samalines ingren les.”
Kana kothe reslas, sigo kothe ushtyadas leste, haj kade das duma: „Rabbi!” Haj chumidas les.
Kodal pale vast vazdine pe leste, haj xutyildine les.
Kon kothe sas, mashkarlende jekh xanro cirdas, pe angrashajeski sluga maladas, haj tele shindas lesko kan.
O Jezush kade das lende duma: „Sar pekh varisosko chor, kade aviline avri xanrenca haj rolyanca, te xutyilen man.
Sako dyes tumenca somas, sityaros ande khangeri, haj inke chi xutyildine man. Ba le iskirimatange andre trubuj te pherdyon.”
Leske sityarde atunchi mukhline les, haj savorazhene nashlinetar.
Ba jekh terno zhalas pala leste, pe lesko nango trupo numa jekh gad sas. Xutyildine les,
ba kodo, pesko gad kothe muklines, nanges nashlastar lendar.
Le Jezushes kaj o angrashaj ingerdine. Kethane avilas leste sako angrashaj, iskiritori haj phuro.
O Peter pale dural zhalas pala leste, zhiandre kaj le angrashajesko dyiz, haj le sluganca kethanes kaj e jag tele beshindos tatyolas.
Le angrashaja haj o intrego svato, colaxaripe rodenas po Jezush, te shaj den les po meripe, ba chi arakhline.
But zhene dinepe xoxamnes colaxa pe leste, ba lenge phenimata nas jekh.
Palunes unyizhene opretordyiline, haj xoxamne colaxa phendine pe leste kadale vorbenca:
„Ashundam, ke kado kodo phendas: »Tele putrav kadi khangeri so vastenca kerdine, haj tala trin dyes kaver vazdav, so na vast kerdas«.”
Ba lenge phenimata chi kade chi anenas pe jekhavreste.
Atunchi o angrashaj mashkaral tordyilas, haj pushlas le Jezushes: „Khanchi chi phenes sa pe kodo, so kadal pe tute colaxaren?”
Voj bi vorbako a-shilas, haj khanchi chi phendas. O angrashaj pale pushlas les: „Tu san apol o Kristo, le ashtyilime Devlesko Shavo?”
O Jezush kado phendas leske: „Me som. Haj dikhena le Manusheske Shaves pe Saktimoski chachi rig te beshel, haj te aveltar ande chereske norura”.
Atunchi o angrashaj shingerdas peske gada, haj kade das duma: „Ta so grizha si amen inke pe colaxara?
Ashundine o kushlipe. So gindin?” Pe kado savorazhene po meripe krisardine les.
Pala kado sas kon tele shungardas les, andre sharade leski mosura, haj dukhumenca malavenas les, haj kodo phenenas leske: „Profecisar!” Haj inke vi le slugi pa muj shinenas les.
Talakadi vrama o Peter tele sas ande avlina. Kothe avilas le angrashajeski jekh sluga,
dikhlas le Peteres ke tatyol, mishto dikhlas les, haj kodo phendas: „Vi tu le Nazaretickone Jezushesa sanas!”
Ba voj asvikarlas: „Chi pinzharav les, haj chi kodo chi hatyarav, ke so phenes.” Pala kodo avri gelas ande angluni kinda: atunchi oprecipisardas o bashno.
E sluga pale dikhlas les, pale las te phenel le majbute manushenge, ke vi kado mashkar lende si.
Voj pale tele asvikardas. Na pala buteste, kon kothe tordyonas, pale kade dine duma kaj o Peter: „Chachikanes anda lende san, ke Galileako san.”
Voj pale las armaja te del haj te colaxarel: „Chi pinzharav kodale manushes, pa kaste vorbin!”
Pe kado oprecipisardas o bashno, po dujto. Le Petereske pale palpale serosardyilas le Jezusheski vorba, so phendas leske: „Zhimajanglal o bashno duvar cipila, trivar asvikaresa man.” Haj las te rovel.
The software aims to connect everyone with the text of the Bible on a quickly accessible, customisable interface.
The name refers to both connectivity and speed…
“Let every man be swift to hear, slow to speak, and slow to anger!”
With love, Tom Károly