chapter 1
Le Jezush Kristosko, le Devleske Shavesko evangeliumosko anglipe.
Sar si iskirime kaj o Izajas profeta:
„Aketa, bishalav mure legataros angla tute,
kon angle lasharel tyo drom;
ande pusta cipisardeski vorba:
Lasharen haj vortaren
le Devleske droma,
O Janosh sikadyilas ande pusta: bolelas haj viacarelas le bezexbunuimatango bolipe pe bezexjertimata.
Avri geline leste sa le Judeake haj le Jeruzhalemeske manusha. Boldas len ando Jordanicko ab, so pala soste avri phende penge bezexa.
Le Janosheske gada anda dromedareski zar sas, haj morchuno brichinari phiravelas krujal pe pesko mashkar, shashki haj turbatoadyvin xalas.
Kade sityarlas: „Pala mande avel, kon majzuraloj mandar, kaske chi som dosta changadines chi leske sandalenge haravja te putrav.
Me pajesa bolav, voj pale Sunto Duhosa bolela tumen”
Pecisajlas ande kodal dyesa, ke avilas o Jezush anda galileako Nazaret, haj o Janosh boldas les ando Jordano.
Sar opre vazdadyilas anda paji, dikhlas, ke puterdyon le chera, haj o Duho, sar gulunbo pe leste hural.
Anda cheri glaso ashundyilas: „Tu san muro kamado Shavo, ande tute pherdyol muri voja.”
Pala kado o Duho sigo ingerdas les ande pusta.
Ande pusta sas shtarvardesh dyes: o beng zumavelas les. Le turbatonepedonca sas, haj le andyela sluginas leske.
Zhi palasoste o Janosh perdal davadyilas, o Jezush ande Galilea gelas, te sityarel le Devlesko evangeliumo.
Kodo phendas: „Andre pherdyilas e vrama, haj pashardyilas le Devlesko them. Inkren bezexjertimata, haj patyan ando evangeliumo.”
Kana pasha Galileaki mara gelastar, dikhlas le Shimones haj leske phrales le Andrashes, kana xudro shudenas ande mara, ke mashara sas.
O Jezush kodo phendas lenge: „Aven palamande, haj me manushenge masharange kerav tumen!”
Von atunchi mukline penge xudrura, haj zhanas pala leste.
Na dur kothar dikhlas le Jakabos, le Zebedeusheske shaves, haj leske phrales, le Janoshes, sar vi von penge xudren lasharnas ando bero,
haj sigo akhardas vi len. Kodol pale, muklines penge dades le Zebedeushes haj le slugan ando bero, haj gele pala leste.
Andre gele ando Kafarnaumo. Savatone sigo andre gelas ande zhinagoga haj sityarlas.
Bari dikhenas pe lesko sityaripe, ke kade sityarlas len, sar kas saktimo si, haj na kade sar le iskiritora.
Sas ande lengi zhinagoga jekh manush ande kaste biuzho duho beshelas. Kado kade cipisardas opre:
„So grizha xal amen tute, Nazareticko Jezush! Anda kodo avilan, te xasares amen? Zhanav kon san: le Devlesko Sunto!”
O Jezush vladisardas leske: „Mucisajve, haj zha avri anda leste.”
O biuzho duho pe kado opre tele shudelas les, pala kodo glasune cipimatasa avri gelas anda leste.
Pe kado savorazhene bari dikhline, haj kodo pushenas jekhavrestar: „Soj kado? Nyevo sityaripe, saktimosa? Inke vi le biuzhe duhonge vladisarel, haj kodal mukenpe leske.”
Je-kharsa bari viaca kerdyilas les ande Galilea.
Pala kado sigo avri gelas anda zhinagoga, haj geletar ande Shimonesko haj Andrashesko kher le Jakabosa haj le Janoshesa kethanes.
Le Shimoneski sokra javrikanes pashjolas. Vi sigo duma dine le Jezusheske anda late.
Kothe gelas late haj oprezhutisardas la kathar lako vast xutyildes. Pe kado muklas la o javrope, haj opreslugisardas lenge.
Kana andre ratyilas haj tele gelas o kham, kothe ingerde leste le intregone nasvalen haj bengalen:
o intrego foro kothe cirdadyilas kaj o vudar.
Sastyardas bute nasvalen, kathar butfala dukha, haj but bengen nashadas avri, ba chi muklas len te den duma, ke kodal pinzharenas les.
Kaver dyes kana zorilas opreushtyilas, avri gelas, haj gelastar pekh pusto than, kothe te rudyil.
O Shimon, haj kon lesa sas, pala leste geline.
Kana rakhle les, kodo phende leske: „Sakon tut rodel.”
Voj kado phendas palpale: „Aventar kaver thaneste, vi pe kaver riga, vi kothe te shaj sityarav o alav, anda kodo avilom.”
Haj andre phirdas e intrego Galilea, sityardas ande lenge zhinagogi, haj bengen nashavelas.
Atunchi kothe avilas leste jekh lepralo, haj changadines kade mangelas les: „Te kames, zhanes te uzhares man.”
O Jezush sunusardas les. Avri lunzhardas pesko vast, haj kodo phendas leske: „Kamav, av uzho!”
Kana kado avriphendas, ande kodo minuto nachilastar pa leste e lepra, haj uzhilas.
Vazdine glasosa pe leste vladisardas, haj bishaldas les kadale vorbenca:
„Lesama, khanyikaske na puknyin pa kado; ba zha, sikav tut le rashajeske, haj imbisar opre anda tyo uzhipe, so o Mozesh phendas, anda chacharipe lenge.”
Ba kodo, kana gelastar, las te phenel sakoneske e traba, kade o Jezush nashtig gelas sakonestar pinzhardes ando foro, bethar avral ande pustone thana cirdelaspe; haj kothe phirenas leste pa sogode riga.
The software aims to connect everyone with the text of the Bible on a quickly accessible, customisable interface.
The name refers to both connectivity and speed…
“Let every man be swift to hear, slow to speak, and slow to anger!”
With love, Tom Károly