Evangeliumo kathar o Mark
11. fejezet
Andrezhalipe ando Jeruzhalemo
1. vers
Kana pashe resline kaj o Jeruzhalemo haj kaj e Betania, kaj le uloj kashtengo plaj angle bishaldas dujen anda peske sityarde.
2. vers
Kodo phendas lenge: „Zhan andre ande kado than, so angla tumende si, haj sigo, kana andre resen, jekha magara dikhena savi phangli avla, pe savi inke manush chi beshlas. Skepinla avri, haj anenla kathe.
3. vers
Haj kana varikon pushela tumen, sostar keren kado, phenen, ke le Rajes trubuj, atunchi mukenala kathe.”
4. vers
Kodal gelinetar, rakhline la magara kaj o vudar phangles, avral kaj o bulho drom, haj avri puterdinela.
5. vers
Kon kothe tordyonas unyizhene kodo phendine lenge: „Sostar phandentar kodala magara?”
6. vers
Von kodo phendine, so o Jezush vladisardas lenge, pe kado mukline len.
7. vers
La magara ingerdine kaj o Jezush. Pe late sharadine penge gada, voj pale pe late beshlas.
8. vers
But zhene po drom pashjardine penge gada, kavera pale patra shingrenas pa kasht, haj po drom rispisarnas kodalen.
9. vers
Kon angla leste zhanas haj kon pala leste, kade cipinas: „Hozhanna! Ashtyilimej, kon ande Rajesko anav avel!
10. vers
Ashtyilimej amare dadesko, le Davidesko them, so aketa, aveltar! Hozhanna ando uchipe!”
11. vers
Voj pale andre gelas ando Jeruzhalemo, ande khangeri. Sakofalo dikhlas, ba ke aba karing ratyi phirelas e vrama, avri gelas ande Betania le deshudujenca.
La gularkashtesko armaja dinipe
12. vers
Kaverdyes, kana avri geline anda Betania, bokhajlas.
13. vers
Dikhlas dural jekhe but patrengire gulareske kashtes. Karing leste gelas, hajkam rakhel pe leste variso. Ba kana kothe reslas, khanchi chi rakhlas pe leste, numa le patra; ande kodi vrama chi baronas inke le gulara.
14. vers
Pe kado duma das, haj kodo phendas leske: „Khonyik tena xal pa tute maj but frukto!” Leske sityarde ashunde kado.
La khangerako avriuzharipe
15. vers
Pala kodo ando Jeruzhalemo resline. Andre geline ande khangeri, haj las avri te nashavel kodalen kon kinenas thaj paruvenas. Le financonge mesalyi haj le gulumbarenge iskamina sa opreboldas,
16. vers
haj chi muklas, ke zhikon varisoske vasura perdal te ingrel pa khangerako placo.
17. vers
Pala kodo kade sityarlas len: „Naj apol iskirime, ke muro kher la rudyimatako kher avla pe sakone popularengi rig? Tume pale le chorenge cevernake shutinela.”
18. vers
Kana le angrashaja haj le iskiritora ashundine kado, pe kodo marnas pengi godyi, ke sar shaj xasarenas les. Daranas lestar, ke sa le but manusha bari dikhenas pe lesko sityaripe.
19. vers
Kana andre ratyilas, avri gelas anda foro.
Pa patyape
20. vers
Kaver dyes detehara, kana nakhletar pasha gularesko kasht, dikhline, ke zhikathar e buchuma avrishutyilas.
21. vers
O Peter palpale serosardas, haj kodo phendas leske: „Rabbi, dikh, o gularkasht, saves armaja dan, avrishutyilas.”
22. vers
O Jezush kado phendas leske: „Patyan ando Del!”
23. vers
Apol phenav tumenge: kana varikon kodo te phenla kadale plajeske: »Vazdadyu opre haj shudetu ande mara!«, haj naj bi patyape ande lesko ilo, ba patyal, ke kade avla, so phenel, atunchi kodo vi kade avla.
24. vers
Anda kodo phenav tumenge: Sa kodo, so rudyipesa mangen, patyan, ke aba resline les, haj vi kade avla tumenge.
25. vers
Ba kana opretordyona, te rudyin, jertin kodalenge, pe kaste xolyi xal tumen, ke vi tumaro Dad, kon ande rajura si, te jertil tumare bezexa.
Pushlipe pa Jezushesko saktimo
27. vers
Pala kado pale ando Jaruzhalemo geline. Kana ande khangeri gelas, kothe geline leste le angrashaja, le iskiritora haj le phure,
28. vers
haj kodo phendine leske: „Soske saktimosa keres sa kadal? Kon das tuke o saktimo, kasave te keres?”
29. vers
O Jezush kado phendas lenge pe kado: „Pushav vi me tumendar jekh traba. Den man vorba pe kodo, atunchi vi me pheno tumenge, ke soske saktimosa kerav sa kadal.
30. vers
Le Janoshesko bolipo anda rajo sas bake kathar le manusha? Phenen mange!”
31. vers
Kodal kade vorbinaspe mashkar jekhavreste: „Kodo te phenasa, ke anda rajo, kodo phenela: atunchi sostar chi patyanas leske?
32. vers
Kana pale kodo te phenasa, ke: »kathar le manusha«?” Daranas kathar le manusha, ke sakon kodo gindisarlas pa Janosh, ke chachikanes profeta sas.
33. vers
Kodo phendine apol le Jezusheske: „Chi zhanas.” O Jezush pe kado kodo phendas lenge: „Chi me chi phenav tumenge, ke soske saktimosa kerav sa kadal.”
Könyvek
