Evangeliumo kathar o Mark
15. fejezet
Avriashunipe angla o Pilatush
1. vers
Le angrashaja le phurenca, haj le iskiritorenca kethane svato inkerdine detehara, pala kodo phangle le Jezushes, haj ingerdine les kaj o Pilatush.
2. vers
O Pilatush pushlas les: „Tu san apol le biboldengo kraj?” Voj kodo phendas leske: „Tu phenes.”
3. vers
Le angrashaja bute sakofalosa dosharenas les.
4. vers
O Pilatush anda kado pale pushlas les: „Khanchi chi phenes?” Dikh, so sakofalosa dosharen tut!”
5. vers
Ba o Jezush jekh vorba chi das majbut, o Pilatush pale bari dikhelas pe kado.
6. vers
Kana baredyesa si, sityilas te mukel lenge mashkar le robura kodales, kas mangen.
7. vers
Sas atunchi ekh Barabash anavesko robo, kas le rebellishonca kethane xutyildine, kon ando maripe vi mudaripe kerdas.
8. vers
Avilas apol e butimata, haj line te mangen kodo, so sagda kerlas lenge.
9. vers
O Pilatush kodo phendas lenge: „Kamen apol, te mukav tumenge le biboldenge krajes?”
10. vers
Ke zhanelas, ke le angrashaja anda xanzhvalipe dine les ande lesko vast.
11. vers
Ba le angrashaja oprexolyardine le manushen, ke barem le Barabashes te den avri lenge.
12. vers
O Pilatush pale pushlas lendar: „So kamen apolal, so te kerav le biboldenge krajesa?”
13. vers
Kodal pale numa kado cipinas: „Po trushul lesa!”
14. vers
O Pilatush pushlas len: „Ba so nasulipe kerdas?” Kodal pe kado inke majfeder cipinas: „Po trushul lesa!”
15. vers
O Pilatush atunchi, ke pe manushengi voja kamlas te kerel, bishaldas kade le Barabashes, le Jezushes pale chunyasa maradas, haj perdal das les, te tannaren les po trushul.
Le Jezushesko avriprassape
16. vers
Atunchi le ketani andre ingerdine les ande andralutni avlina, kaj le majbut ketani sas haj kethane akhardine savorazhenen.
17. vers
Lole gada dine pe leste, haj anda kanre korona xudine haj pe lesko shero shutineles,
18. vers
pala kodo kade prassanas les: „Av drobome, biboldengo Kraj!
19. vers
Pala kodo trestijasa marenas lesko shero, tele shungarenas les, haj changadines patyivinas angla leste.
20. vers
Pala soste avriprassadine les, tele line pa leste o lolo, pe leste dine leske gada, haj avriingerdine les, ke po trushul te tannaren les.
Po trushul tannaripe
21. vers
Le Cireneickone Shimones, le Shandoreske haj le Rufuseske dades, kon pa mal khere avlines pe kodo drom nakhlastar, zorasa vladisardine leske, te ingrel lesko trushul.
22. vers
Avriingerdine les pe kodo than, saves Golgotake anavarnas, so kattyi phenel, ke »Kuputengo than«.
23. vers
Mirhasa hamisardi mol dine les te pel, ba chi trubusardas les.
24. vers
Pala kodo po trushul tannardine les, leske gada pale uladine mashkar pende, avri kheldines, ke so saveske te perelpe.
25. vers
O trito chaso sas, kana po trushul tannardine les.
26. vers
Opre sas iskirime, ke anda soste krisardine les: „Le biboldengo kraj.”
27. vers
Po trushul tannardine lesa kethanes vi duje choren, le jekhes pe chachi, le kaveres pe leski stungo rig shutine.
29. vers
Kon pale intye phirenas pengo shero mishkisardines kushenas les, haj kado phenenas: „Mo! Tu, kon tele putres la khangera haj pe trin dyes oprevazdesla,
30. vers
muntusar tut, hulyi tele pa trushul!”
31. vers
Zhikade vi le angrashaja le iskiritorenca kethanes prassandes kado phenenas jekhavreske: „Kaveren muntusardas, pes pale chi zhanel te muntul!
32. vers
O Kristo, le Izraelesko kraj, te hural tele akanak pa trushul, te dikhas haj te patyas!” Marhinas les vi kodala, kas lesa kethane tannardine po trushul.
Le Jezushesko meripe
33. vers
Po shovto chaso tunyarikipe muklyosardyilas pe intrego phuv zhikaj o ijato chaso.
34. vers
Po ijjato chaso o Jezush oprecipisardas, haj glasunes kade das duma: „Eloí, Eloí, lema sabaktani?” Kado kattyi phenel: „Muro Del, muro Del, sostar muklan man?”
35. vers
Mashkar kodal kon kothe tordyonas unyizhene, kana kado ashundine, kodo phendine: „Aketa, le Illeshes akharel.”
36. vers
O jekh kothe nashlas, ekha spondya ando shut boldas haj pekh trestija opreshutindes dasles te pel, haj kade das duma: „Muken les! Dikhas, aveltar apol o Illesh, tele te lel les!”
37. vers
O Jezush pale glasunes oprecipisardas haj avri das pesko duho.
38. vers
Atunchi la khangerako firhango mashkaral shindyilas kathar opralutnipe zhikaj telalutnipe.
39. vers
Kana o shelari, kon leske mostar tordyolas, dikhlas, ke kade cipindes avri das pesko duho, kado phendas: „Kado manush chachikanes le Devlesko Shavo sas.”
40. vers
Vi romnya sas, save dural dikhenas les. Mashkar lende sas e Maria Magdolna haj e Maria, le majtere Jakabeski haj le Jozhefeski dej, haj e Salome,
41. vers
save, kana inke ande Galilea phirdas, zhanas pala leste haj sluginas leske; haj inke but kavera romnya, save lesa kethane geline opre ando Jeruzhalemo.
Le Jezushesko praxope
42. vers
Kana andre ratyilas – ke e lasharimatako dyes, so angla savatosko dyes sas –,
43. vers
kothe avilas o arimateicko Jozhef, jekh rajkano svatori, kon vi voj zhukarelas le Devleske themes. Tromanes andre gelas kaj o Pilatush, haj manglas le Jezusheske trupos.
44. vers
O Pilatush chi kamelas te patyal, ke aba mulas. Akharadas le shelares, haj pushlas les, ke chachikanes mulas apol.
45. vers
Kana kathar shelari chachardyilas pa traba, le Jozhefeske das o trupo.
46. vers
O Jozhef pale poxtan kindas, tele las les, haj andre patyardas les ando poxtan. Pala kodo andekh plaj shindo murmunto shutas les, haj kaj le murmuntesko vudar, jekh baro barr shuvadas.
47. vers
E Maria Magdolna pale haj e Maria, le Jozhefeski dej dikhenas, ke kaj praxosardine les.
Könyvek
