Evangeliumo kathar o Mark
capítulo 15
Avriashunipe angla o Pilatush
verso 1
Le angrashaja le phurenca, haj le iskiritorenca kethane svato inkerdine detehara, pala kodo phangle le Jezushes, haj ingerdine les kaj o Pilatush.
verso 2
O Pilatush pushlas les: „Tu san apol le biboldengo kraj?” Voj kodo phendas leske: „Tu phenes.”
verso 3
Le angrashaja bute sakofalosa dosharenas les.
verso 4
O Pilatush anda kado pale pushlas les: „Khanchi chi phenes?” Dikh, so sakofalosa dosharen tut!”
verso 5
Ba o Jezush jekh vorba chi das majbut, o Pilatush pale bari dikhelas pe kado.
verso 6
Kana baredyesa si, sityilas te mukel lenge mashkar le robura kodales, kas mangen.
verso 7
Sas atunchi ekh Barabash anavesko robo, kas le rebellishonca kethane xutyildine, kon ando maripe vi mudaripe kerdas.
verso 8
Avilas apol e butimata, haj line te mangen kodo, so sagda kerlas lenge.
verso 9
O Pilatush kodo phendas lenge: „Kamen apol, te mukav tumenge le biboldenge krajes?”
verso 10
Ke zhanelas, ke le angrashaja anda xanzhvalipe dine les ande lesko vast.
verso 11
Ba le angrashaja oprexolyardine le manushen, ke barem le Barabashes te den avri lenge.
verso 12
O Pilatush pale pushlas lendar: „So kamen apolal, so te kerav le biboldenge krajesa?”
verso 13
Kodal pale numa kado cipinas: „Po trushul lesa!”
verso 14
O Pilatush pushlas len: „Ba so nasulipe kerdas?” Kodal pe kado inke majfeder cipinas: „Po trushul lesa!”
verso 15
O Pilatush atunchi, ke pe manushengi voja kamlas te kerel, bishaldas kade le Barabashes, le Jezushes pale chunyasa maradas, haj perdal das les, te tannaren les po trushul.
Le Jezushesko avriprassape
verso 16
Atunchi le ketani andre ingerdine les ande andralutni avlina, kaj le majbut ketani sas haj kethane akhardine savorazhenen.
verso 17
Lole gada dine pe leste, haj anda kanre korona xudine haj pe lesko shero shutineles,
verso 18
pala kodo kade prassanas les: „Av drobome, biboldengo Kraj!
verso 19
Pala kodo trestijasa marenas lesko shero, tele shungarenas les, haj changadines patyivinas angla leste.
verso 20
Pala soste avriprassadine les, tele line pa leste o lolo, pe leste dine leske gada, haj avriingerdine les, ke po trushul te tannaren les.
Po trushul tannaripe
verso 21
Le Cireneickone Shimones, le Shandoreske haj le Rufuseske dades, kon pa mal khere avlines pe kodo drom nakhlastar, zorasa vladisardine leske, te ingrel lesko trushul.
verso 22
Avriingerdine les pe kodo than, saves Golgotake anavarnas, so kattyi phenel, ke »Kuputengo than«.
verso 23
Mirhasa hamisardi mol dine les te pel, ba chi trubusardas les.
verso 24
Pala kodo po trushul tannardine les, leske gada pale uladine mashkar pende, avri kheldines, ke so saveske te perelpe.
verso 25
O trito chaso sas, kana po trushul tannardine les.
verso 26
Opre sas iskirime, ke anda soste krisardine les: „Le biboldengo kraj.”
verso 27
Po trushul tannardine lesa kethanes vi duje choren, le jekhes pe chachi, le kaveres pe leski stungo rig shutine.
verso 29
Kon pale intye phirenas pengo shero mishkisardines kushenas les, haj kado phenenas: „Mo! Tu, kon tele putres la khangera haj pe trin dyes oprevazdesla,
verso 30
muntusar tut, hulyi tele pa trushul!”
verso 31
Zhikade vi le angrashaja le iskiritorenca kethanes prassandes kado phenenas jekhavreske: „Kaveren muntusardas, pes pale chi zhanel te muntul!
verso 32
O Kristo, le Izraelesko kraj, te hural tele akanak pa trushul, te dikhas haj te patyas!” Marhinas les vi kodala, kas lesa kethane tannardine po trushul.
Le Jezushesko meripe
verso 33
Po shovto chaso tunyarikipe muklyosardyilas pe intrego phuv zhikaj o ijato chaso.
verso 34
Po ijjato chaso o Jezush oprecipisardas, haj glasunes kade das duma: „Eloí, Eloí, lema sabaktani?” Kado kattyi phenel: „Muro Del, muro Del, sostar muklan man?”
verso 35
Mashkar kodal kon kothe tordyonas unyizhene, kana kado ashundine, kodo phendine: „Aketa, le Illeshes akharel.”
verso 36
O jekh kothe nashlas, ekha spondya ando shut boldas haj pekh trestija opreshutindes dasles te pel, haj kade das duma: „Muken les! Dikhas, aveltar apol o Illesh, tele te lel les!”
verso 37
O Jezush pale glasunes oprecipisardas haj avri das pesko duho.
verso 38
Atunchi la khangerako firhango mashkaral shindyilas kathar opralutnipe zhikaj telalutnipe.
verso 39
Kana o shelari, kon leske mostar tordyolas, dikhlas, ke kade cipindes avri das pesko duho, kado phendas: „Kado manush chachikanes le Devlesko Shavo sas.”
verso 40
Vi romnya sas, save dural dikhenas les. Mashkar lende sas e Maria Magdolna haj e Maria, le majtere Jakabeski haj le Jozhefeski dej, haj e Salome,
verso 41
save, kana inke ande Galilea phirdas, zhanas pala leste haj sluginas leske; haj inke but kavera romnya, save lesa kethane geline opre ando Jeruzhalemo.
Le Jezushesko praxope
verso 42
Kana andre ratyilas – ke e lasharimatako dyes, so angla savatosko dyes sas –,
verso 43
kothe avilas o arimateicko Jozhef, jekh rajkano svatori, kon vi voj zhukarelas le Devleske themes. Tromanes andre gelas kaj o Pilatush, haj manglas le Jezusheske trupos.
verso 44
O Pilatush chi kamelas te patyal, ke aba mulas. Akharadas le shelares, haj pushlas les, ke chachikanes mulas apol.
verso 45
Kana kathar shelari chachardyilas pa traba, le Jozhefeske das o trupo.
verso 46
O Jozhef pale poxtan kindas, tele las les, haj andre patyardas les ando poxtan. Pala kodo andekh plaj shindo murmunto shutas les, haj kaj le murmuntesko vudar, jekh baro barr shuvadas.
verso 47
E Maria Magdolna pale haj e Maria, le Jozhefeski dej dikhenas, ke kaj praxosardine les.
Libros
