Angluno lil kaj le korintushicka
capítulo 6
Le kristianonge bidake trabi
verso 1
Sar tromal mashkar tumende zhi varikon, kana krisaki butyi siles le kaveresa, kaj le murtikana te rodel o chachipe haj na kaj le suntura?
verso 2
Haj chi zhanen, ke le suntura krisarena la luma? Kana pale tume krisarena la lauma, dore chi sanle dosta pe kodo, ke pa khanchikane butya te krisaren?
verso 3
Chi zhanen, ke pe andyela krisarasa? Sodivar majfeder pe lumake butya!
verso 4
Kana apol ande lumake butya krisaren, kodalen shon le krisarenge, kon chi mol khanchi ande eklezhia?
verso 5
Anda kodo phenav kado, ke te lazhan tumen! Haj kade naj mashkar tumende chi jekh platniko manush, kon krisaripe zhanelas te phenel ande peske phralenge trabi?
verso 6
Phral le phralesa krisarelpe, haj inke angla murtikana.
verso 7
Haj aba vi kodo dosh si tumende, ke krisikane traba si tumen jekhavresa. Apol sostar chi toleralisaren barem le bi chachipes? Sostar chi toleralin le dosharipes?
verso 8
Haj inke tume keren bi chachimata haj keren dosh, haj apol le phralenge!
verso 9
Bake chi zhanen, ke le bi chache chi resen le Devleske themes? Na xoxaven tumen: chi marhisarde, chi fetisha kamade, chi ansuripe phagara, haj chi murshenca marhisarde mursh,
verso 10
chi xapavara, chi xanzhvale, chi matyarne, chi armaja cipisarde, chi chor, chi resena le Devleske themes.
verso 11
Bater, kasave sanasle unyizhene: ba thodine tumen, suntosardyipe resline, haj chachardyiline ande Rajesko le Jezush Kristosko anav, perdal pa amare Devleske Duho.
Bi moralipe haj o kristianicko slobodipe
verso 12
„Sakofalo slobodoj mange!” Ba na sakofalo zhutil. „Sakofalo slobodoj mange!” Feri me tena avav khancheski sluga.
verso 13
„O xamasko anda rinza si, haj e rinza anda xamasko!” Ba o Del vi kadales haj vi kodoles nacharel. Ba o trupo na anda marhipe si, ba anda Raj, o Raj pale anda trupo.
verso 14
Ke o Del opretrajardas le Rajes, haj vi amen opretrajarela peske saktimosa.
verso 15
Haj chi zhanen, ke tumaro trupo le Kristoske riga si? Te shinav apol le Kristoske riga, haj marhimaske zhulyake te kerav kodo? O Del te »rakhel haj te feril!
verso 16
Bake chi zhanen, ke kon marhime zhulyasa kamavelpe, jekhe truposke kerdyol lasa? Ke – sar o Iskiripe phenel –”dujzhene jekhe truposke kerdyon”.
verso 17
Kon pale le Rajesa jekhajvel, jekh dyi si lesa.
verso 18
Krujin le marhipes! Sakofalo bezex si, so o manush kerel, avral si pa trupo; ba kon marhilpe, kodo peske truposke bezexarel.
verso 19
Bake chi zhanen, ke tumaro trupo le Suntone Duhoski khangeri si, kon ande tumende si, haj so kathar o Del line, kade chi sanle tumare?
verso 20
Ke baro sas tumaro parudino potyinipe! Luvudyisaren apol le Devles ande tumaro trupo.
Libros
