Angluno lil kaj le korintushicka
capítulo 14
Le profecimaske haj le shibange dimata
verso 1
Aven kamimaske, roden le duhoske dimata, haj majfeder pale kodo, ke te zhanen te profetalin.
verso 2
Ke kon pe shiba vorbil, na le manushenge vorbil, ba kathar o Duho vorbil tajnicka butya.
verso 3
Kon pale profetalil, le manushenge vorbil, pe lengo mishtyipe, haj ushoripe.
verso 4
Kon pe shiba vorbil, pe pesko mishtyipe kerel: ba kon profetalil, la eklezhiake kerel kodo.
verso 5
Fajas man apol, ke savorazhene te vorbinas pe shiba, ba majfeder kodo, te profetalin, ke majbaro si kodo, kon profetalil, sar kon pe shiba vorbisarel, atunchi, kana avriphenel kodo vi uzhes, pe eklezhiako mishtyipe.
verso 6
Kade apol phralale, tumende reslinos pe shiba te vorbisaros, so mishtyipe keros tumenge, kana chi vorbisaros tumende avri sikadyipesa bake pinzharipesa, profecipesa bake sityaripesa?
verso 7
Ke vi le bi trajisarde bashavjimata, sar e bansuri bake citera, kana chi den kaverfalo glaso, sar shaj pinzharen opre la bansura bake la citera?
verso 8
Haj kana o thur bichacho glaso del, kon zhala po larimo?
verso 9
Kade vi tume, kana pe shiba vorbisardes uzhi vorba chi phenav, sar hatyarena atunchi, ke so phenen?
verso 10
Ke kasave but shiba si pe luma, haj chi jekh naj bi hatyarde.
verso 11
Apol kana chi pinzharav so phenel e vorba, streno avo kodaleske, kon vorbil, haj vi kon vorbil streno avla mange.
verso 12
Kade vi tume, ke duhikane dimata kamen te resen, aven pe kodo, ke pe eklezhiako mishtyipe te barvajven.
verso 13
Zhi anda kado, kon pe shiba vorbisarel te rudyil, ke vi te phenel avri uzhes kodo.
verso 14
Ke kana pe shiba rudyisarav, muro duho rudyil, ba muro hatyaripe bi fruktoskoj.
verso 15
So avel avri anda kado? Te rudyisarav vi ando duho, ba te rudyisarav vi hatyaripesa; te gilybav vi ando duho, ba te gilyabav vi hatyaripesa.
verso 16
Ke kana numa ando duho phenes najisipe, kon kothe si bi zhanipesko, sar shaj phenel pe tyo najisipe, ke „Bater”, kana chi zhanel, ke so phenes?
verso 17
Ke chaches, tu shukares des najisipe, ba o kaver chi mishtyisajvel pe late.
verso 18
Najisipe dav le Devleske, ke savorazhenendar majfeder vorbisarav pe shiba;
verso 19
ba ande eklezhia barem kamav panzh vorbi godyaverikanes te phenav, ke vi kaveren te sityarav, sar deshmiji vorbi pe shiba.
verso 20
Phralale, ande godyaverikane butya na aven shavora, aven barem ando nasulipe shavora: ba ande godyaverikane aven oprebariline.
verso 21
Iskirime si ande kris:
„Pe strene shiba haj strenenge mujesa
vorbisaro maj kaj kado popularo,
ba chi kade chi ashunen pe mande” – |phenel o Raj.
verso 22
Apol kana pe shiba vorbin na le patyamnenge si kodo mishtyipe, ba le bi patyamnenge; o profetalipe pale na le bi patyamnenge, ba le patyamnenge.
verso 23
Apol kana kethane avel e intrego eklezhia, haj savorazhene pe shiba vorbina, kana bi zhanipeske bake bi patyamne te ushtyavena andre, dore na kodo phenena, ke dilyajline?
verso 24
Ba kana savorazhene profetalina, haj andre ushtyavela jekh bi patyamno bake bi zhanipesko, kodaleske sakon pe lesko duho vorbila, kodales sakon krisarela,
verso 25
leske ileske tajni avrizhanardyona, kade ke po muj burdosardines luvudyisarela le Devles, haj avriphenela: „Chachikanes mashkar tumende si o Del”.
Le delpatyivisaripesko jekhipe
verso 26
So avel avri anda kado, phralale? Kana kethane aven, haj savorazhenen si salmo, si sityaripe, si avrisikadyipe, si shibake dimatipe, si hatyaripe: sakofalo pe tumaro mishtyipe te kerdyol.
verso 27
Kana pe shiba del duma varikon, duj bake trin zhene te vorbin, pala jekhavreste, jekh pale te hatyaravel kodo.
verso 28
Tena naj kon hatyaravel, atunchi te ashol ande eklezhia: te vorbil peske haj le Devleske.
verso 29
Le profeti pale dujzhene bake trinzhene te vorbin, le majbut pale te krisaren len.
verso 30
Kana pale kaver, kon kothe si resel avrisikadyipe, o majangluno te asholtar.
verso 31
Ke pala jekhavreste savorazhene shaj profetalin, ke savorazhene te sityon, haj zuralipe te resen.
verso 32
Le profecimasko duho telalutnarelpe le profetaske.
verso 33
Ke o Del na le kethane boldipesko Del si, ba le pachipesko.
Sar vi ande suntonge intrega eklezhija,
verso 34
le romnya tena vorbin pe kethane avlimata, ke naj slobodo lenge te vorbisaren; ba te aven muklane, sar vi e kris phenel.
verso 35
Kana pale kamen te sityon variso, te pushen khere penge romen: ke chi perelpe le romnyange te vorbisaren pe kethane avlimata.
verso 36
Dore tumendar avilas le Devlesko alav, bake feri tumende reslas?
verso 37
Kon profetaske bake duhikane manusheske inkrel pes, te hatyarel, ke so tumenge iskirisarav, kodo le Rajesko vladipej.
verso 38
Kana pale varikon chi pinzharelles andre, atunchi chi les chi pinzharenatar.
verso 39
Anda kado, apol mure phral, profetalisaren, haj muken vi pe shiba te shaj vorbisaren.
verso 40
Ba sakofalo patyivales te pecilpe.
Libros
