chapter 11
Aven palamande, sar me zhav pala o Kristo.
Asharav tumen, ke ande sakofaloste te serardyon pa mande, haj inkren le tradiciji, kade sar perdal dom kodol tumenge.
Fajas man apol, te zhanen, ke sakone murshesko shero o Kristo si, la romnyako shero o mursh si, le Kristosko shero pale o Del si.
Sako mursh kon sharade sheresa rudyil bake profetalil, lazhavjipe anel pe pesko shero;
haj sako romnyi, kon bi sharade sheresa rudyil haj profetalil, lazhavjipe anel pe pesko shero ke; ke kado zhikasavoj, sar kana muravenisardinesas la.
Kana e romnyi chi sharavel andre pesko shero, te shinavel tele peske bal; ba kana lazhaveski butyij la romnyake, ke tele te shinel peske bal, atunchi te sharavel numa andre pesko shero.
Le mursheske chi trubul andre te sharavel pesko shero, ke voj le Devlesko dujto mosuripe si haj luvudyipe, ba e romnyi le murshesko luvudyipe si.
Ke na o mursh si anda romnyi, ba e romnyi si anda mursh;
haj na le murshes kerdine anda romnyi, ba la romnya anda mursheste.
Anda kado la romnyake trubuj te phiravel pe pesko shero le telalunipesko somno, anda andyela.
Ba chaches si, ke ando Raj chi romnyi naj bi romesko, chi rom bi romnyako.
Ke sar e romnyi anda mursh kerdyilas, kade vi o mursh kathar e romnyi arakhadyol.
Krisaren kado tume: Perelpe dore bi andre sharade sheresa romnyake te rudyisarel kaj o Del?
Apol chi sityarel tumen vi o trajo pe kodo, ke kana o mursh lunge bal bararel, lesko lazhavjipe si kodo,
ba kana e romnyi bararel lungi bal, pe lako asharipe avla? Ke e bal sar sharadyipe davadyilas lake.
Haj kana varikon te xalpe fajas, kado ame chi sityilam te keras, haj chi keren kado chi ande Devleski eklezhia.
Akanak na pe tumaro mishtyipe ba pe tumaro nasulipe aviline kethane.
Ke majanglal kade ashunav, ke kana kethane aven shindyimata si mashkar tumene, haj anda kado si so vi patyav.
Ke trubuj, vi shindyipe te avel mashkar tumende, ke le avri zumavjimata avri te zhanardyon.
Ba kana kethane aven, aba kodo na le Rajeske xamosko xape si,
ke kana xan sakon pesko xamasko lel angle, haj o jekh bokhajvel, o kaver pale chajol.
Dore naj tumen kher te xan kothe haj te pen kothe? Bake tele dikhen le Devleski eklezhia, haj tele lazhavaren kodalen, kas najle khanchi? So te phenav tumenge? Te asharav tumen? Ande kado chi asharav!
Ke kathar o Raj lom, so perdal dom tumenge, ke o Raj Jezush kodi ratyi kana purrisardine les, xutyildas o manro,
najisipe phendas, phaglasles, haj kade das duma:”Kadoj muro trupo, so anda tumende davadyol. Kado te keren pe muro serovjipe!”
Pala xamo zhikade xutyildas vi o taxtaj, haj kade das duma: „Kado taxtaj o nyevo teshtamentoj ande muro rat. Keren kado sodivar feri penles, pe muro serovjipe!”
Ke kana kado manro xan, haj kado taxtaj pen, le Rajesko meripe viacaren, zhikaj chi aveltar.
Kon apol bi patyivales xal o manro, bake pel le Rajesko taxtaj, bezexarel pe Rajesko trupo haj rat.
Te gindil perdal apol o manush pes, haj kade te xal anda manro haj te pel anda taxtaj,
ke kon kade xal haj pel, ke chi alosarel le trupos, pesko krisaripe xal haj pel.
Anda kado si mashkar tumende but nasvale haj bi zorake, haj but zhene muline.
Ba te krisarenas tumen, chi perasas tala krisaripe.
Kana pale tala krisaripe peras, o Raj dukharel amen, ke tena bezexardyuvastar kadala lumasa.
Anda kado, phralale, kana kethane aven po xamo, zhukaren jekhavres.
Kana varikon bokhaloj, te xal khere, ke na po krisaripe te aven kethane. Le majbut pale atunchi lasharo, kothe te zho.
The software aims to connect everyone with the text of the Bible on a quickly accessible, customisable interface.
The name refers to both connectivity and speed…
“Let every man be swift to hear, slow to speak, and slow to anger!”
With love, Tom Károly