Dujto lil kaj le korintushicka
capítulo 11
Le aposhtolesko biegoizmope
verso 1
Oh, feri te toleralisarenas mandar variso cino dilipe! Haj inke te toleralin vi man!
verso 2
Ke le Devleske daramnimatasa som daramno pe tumende. Ande angrustya shutom tumen jekhe mursheske, ke sar uzha suntona te ingravtu kaj o Kristo.
verso 3
Ba darav, ke sar o sap xoxadas la Eva peske xalipesa, kade vi tumaro hatyaripe boldelape kathar le Kristosko uzho kothedinipe.
verso 4
Ke varikon te avel, haj kaver Kristos viacarel, sar kas ame viacaras, bake kaver duho svagaren andre, so aba line, bake kaver evangeliumo, so aba perdal hatyardine, kodo mishto toleralisaren.
verso 5
Ba kodo gindisarav, ke khanchesa chi kerdom maj cerra kathar le majbare aposhtolura,
verso 6
ke vi tena zhanav shukares te vorbisarav, pinzharipe si man, ke kodo ande sakofaloste sakoneske andre sikadom tumenge.
verso 7
Bake bezex kerdom atunchi, kana man tele lazhavardom, ke tumen opre te asharav, ke le Devleske evangeliumos ive viacardom tumenge?
verso 8
Kavere eklezhiandar lom potyinipe, dimata lom lendar, ke tumen te shaj slugisarav.
verso 9
Kana tumende somas haj nas man khanchi, khanyikaske chi somas pe lesko pharipe, ke so faltilas mange, ande kodo zhutinas kodal phral, kon anda Makedonia aviline, haj ande sakofaloste sama los, ke pe tumaro pharipe tena avav, haj vi sama lo.
verso 10
Pe Kristosko kodo chachipe phenav, so ande mande si, ke kado asharipe nashtig len mandar pe Akhajake thana.
verso 11
Sostar? Anda kodo, ke chi kamav tumen? O Del zhanel!
verso 12
Ba so kerav, vi kero, ke te lav e traba kathar kodal, kon traba roden, ke ande kodo, ande soste asharenpe, kasaveske te sikavenpe andre, sar ame sam.
verso 13
Ke kasave xoxamne aposhtola si, xoxamne butyara, kon le Kristoske aposhtolenge keren pen.
verso 14
Haj kado china naj chudipe, ke vi o shatano le fimlalipeske andyeloske kerel pes.
verso 15
Naj bari butyi apol, kana vi leske slugi le chachimaske slugenge keren pen. Lengo agoripe maj sikavela lenge picimata.
Le aposhtoleske dukha haj khinimata
verso 16
Pale phenav apol, tena dikhel man khonyik dileske. Ba vi kade te kerena, dore dikhen man te kamen vi dileske, apol muk te asharav man jekh cerra vi me.
verso 17
So phenav, na sar o Raj phenav, ba sar anda dilipe, kana kasave butyanca asharav man.
verso 18
Soske but zhene asharen pen kathar o trupo, akanak vi me asharo man.
verso 19
Ke tume losshanes toleralisaren le dilen, ke tume platnika sanle.
verso 20
Ke muken, kana varikon po slugipe del tumen, kana varikon nakhavel tumen, kana varikon ande pesko saktimo lel tumen, kana varikon phutyarelpe, kana varikon pa muj shenel tumen.
verso 21
Lazhavjikanes phenav, ke sar ame slabura te avilamas ande kadi butyi. Ba kodalesa, sosa varikon tromal te asharel pes – anda dilipe phenav –, vi me tromav.
verso 22
Bibolde si von? Vi me! Izraelitana si von? Vi me! Le Abrahameske falura si von? Vi me!
verso 23
Le Kristoske slugi si von? Sar diloro phenav, me inke majfeder: but khinyipe, butivar robija, but mardyimata, haj ke butivar somas pashe kaj o merimpe.
verso 24
Kathar le bibolde panzhvar lom bi jekhesko shtarvardesh malavjipe.
verso 25
Trivar dukhardom kathar rolyandar mardyimata, jekhar barrenca shudine man, trivar berosko phagerdyipe reslom, kade jekh dyes haj jekh ratyi shudardyilom pe milno mara.
verso 26
Butivar somas po drom, ande bida pe abeske paja, ande bida mashkar le chor, ande bida mashakar mure populara, ande bida mashkar le murtikana, ande bida ando foro, ande bidate pe pusta, ande bidate pe mara, ande bidate mashkar xoxamne phral,
verso 27
ande khinyimata haj chorripe, ande but ratyarimata, ande bokh haj trush, ande but postyimata, ando shil haj nangipe.
verso 28
Pasha kadal kothe si inke, ke sako dyes dosharen man, haj le intrega eklezhiange gindura.
verso 29
Kon si slabo, ke me tena avos slabo? Kon xolyajvel opre, ke me tena phabuvos?
verso 30
Te trubuj te asharav man, mure slabipesa asharav man.
verso 31
O Del, amare Rajesko le Jezushesko Dad, kon ashtyilimej sagutnes, zhanel, ke chi xoxavav.
verso 32
Ando Damaskuso le Aretas krajesko prefekto lavavelas sama le damaskusirenge foros, ke man te xutyilel,
verso 33
haj perdal pa fejastra, andekh koshnyica mukline man tele pa zido, kade muntosardyilom anda leske vast.
Libros
