Lil le kolossenge
capítulo 4
verso 1
Rajale, den le slugange kodo, so perelpe, ke zhanen, ke vi tumen si Raj ando rajo!
Sakoneske ferimata
verso 2
Ando rudyipe aven zurale, aven ande leste samalinde haj najisarde!
verso 3
Rudyisaren vi anda amende, ke o Del te putrel opre angla amende o vudar kaj o vorbipe, kaj le Krisatoski tajnako viacaripe, anda soste vi ande sastra mardine man,
verso 4
ke kade te pinzharavav kodo, sar pa leste trubuj te dav duma.
verso 5
Aven platnika angla avralutne, haj hasnisaren opre kodo, kana resardyol e lashi traba! Mishto trajisaren opre e vrama!
verso 6
Tumaro vorbipe te avel sagda skunpo, lonesa svadaslo, ke te zhanen kaske, sar te zhanen vorba te den!
Andre agoripe: haj drobovjimata
verso 7
Pa muro trajo sakofalo phenela tumenge o Tichikus, o kamado phral, o patyivalo sluga haj muro slugicko amal ando Raj.
verso 8
Zhianda kodo bishaldom les tumende, ke te pinzharen amaro trajo, haj te ushorisarel tumaro ilo.
verso 9
Lesa zhal vi o Onezimos, o skunpo haj patyivalo phral, kon tumendarutno si. Von maj pa sakofaloste vorbina tumenge, so kathe pecisardyol.
verso 10
Drobovjisarel tumen o Aristarchos muro robicko amal, haj o Mark, le Barnabashesko nyamo, pa kaste vladmata line – ke tumende te zhala, lenles mashkar tumende –,
verso 11
haj vi o Jezush, kas Justuseske anavaren. Mashkar le bibolde numa von si mura butyake amala ande Devleske themesko slugimasko viacaripe, haj vi pe muro ushoripe sas von.
verso 12
Drobovjisarel tumen o Epafras, kon tumendarutno si, haj le Kristo Jezusheski slugaj, kon sagda butyarel anda tumende ande rudyimata, ke zurale patyapesa te tordyon avri ande kodo, so le Devlesko kamipe si.
verso 13
Chacharav me pa kodo, ke but khinyardyol anda tumende, haj anda kodal, kon ande Laodicea haj ando Heierapolis sile.
verso 14
Drobovjisarel tumen o Lukach, o kamado sastyari, haj o Demas.
verso 15
Drobovjisaren kodale phralen, kon ande Laodicea si, la Ninfa haj le kethanipes, kon ande lako kher si!
verso 16
Kana kado lil tumende opreginadine, grizhon tumen pa kodo, ke vi ande laodiceake eklezhiji opre te ginavenles, le laodiciengo pale tume te ginaven!
verso 17
Phenen le Archippososke: „Av pe kodo, ke te keres o slugipe, so lan ando Raj!”
verso 18
O drobovjipe me, o Pal, mure vastesa iskirisarav. Serosardyon pa mure sastra! Gracija tumenca!
Libros
