Dujto lil kaj le korintushicka

Chapters:

… 3 4 5 6 7 …   ⇤ ← 5 → ⇥

verse #1

Zhanas, ke kana amari phuvaki cerha tele te rumosardyola, kathar o Del lasa kher, na kathar vast kerdo, ba sagutno kher ando cheri.

verse #2

Vi anda kado dukharas ande kado trupo, ke dorosaras opre te las pe leste amaro cheruno kher,

verse #3

ke kana tele trubuja te nandyaras amen, nangeske tena dichuvas.

verse #4

Ke zhikaj ande kadi cerha sam, khinyardes dukharas, ke na kodo kamas, tele te nandyaren amen, ba opre te uraven amen, haj kade kodo, so merimasko si, te nakhavelles, o trajo.

verse #5

Kon pale oprezurardas pe kado amen, o Del si kodo, kon le duhoski dimata das amenge.

verse #6

Anda kado sagutnes patyas, haj zhanas, ke zhikaj ando trupo trajisaras, dur phiras kathar o Raj,

verse #7

ke ando patyape phiras, haj na ando dikhlipe.

verse #8

Ba patyas, haj majfeder fajas amen avri te avas anda trupo, haj te resas kaj o Raj.

verse #9

Anda kado vi zuraras amen, ke po fajlipe te avas leske, zhi leste te sam, zhi dur te trajisaras lestar.

verse #10

Ke savorazhenenge trubuj te tordyuvas angla Kristosko krisako ikamin, ke sakon te lel pesko potyinipe, kade, sar lasho bake nasul kerdas ande pesko trupo.

verse #11

Ke pinzharas le Rajeski dar, le manushen kamas te patyavas, ba angla o Del uzhes tordyuvas. Sperantisarav apol, ke vi angla tumaro duhosko hatyaripe uzhes tordyuvas.

verse #12

Chi inbisaras tumenge pale amen, ba das tumenge o shajipe, ke amenca te asharen tumen kodalenge, kon avralutnes asharenpe, haj na kathar o ilo.

verse #13

Ke kana avral sam pamende, kodo anda Del pecilpe; kana pe godyate sam, kodo pale anda tumende si.

verse #14

Le Kristosko kamipe sidyaravel amen, ke kodo gindisaras, ke kana jekh mulas anda butende, atunchi savorazhene muline;

verse #15

haj anda kodo mulas anda sakoneste, ke kon trajin, aba na penge te trajin, ba kodaleske, kon mulas anda lende haj opretrajisardyilas.

verse #16

Kathar kado apol, ame khanyikas chi pinzharas kathar o trupo. Haj kana le Kristos vi kathar o trupo te pinzhardam, abakanak na kade pinzharas les.

verse #17

Anda kado, kon ando Kristo si, nyevo kerdyipe si: le dulmutane nachilinetar, haj aketa, nyeve kerdyiline.

verse #18

Sa kado pale kathar o Del si, kon perdal pa Kristo avripachardas amen pesa, haj amenge das le avripacharimasko slugipe.

verse #19

Ke o Del sas, kon ando Kristo avri pachardas pesa la luma, kade, ke chi las andre amare bezexa, haj pe amende muklas le avripacharimasko alav.

verse #20

Ame apol ande Kristosko bishalipe phiras, haj o Del zurarel perdal pamende. Anda Kristo mangas apol tumen, pachardyon avri le Devlesa!

verse #21

Voj si kodo, kon chi pinzharelas bezex, bezexeske kerdasles anda amende, ke ame le Devlesko chachipe te avas perdal pa leste.

Chapters:

1 2 3 4 5 6 7 8 9 10 11 12 13