Peteresko dujto lil

Fejezetek:

1 2 3

1. vers

Aketa, mure kamade, kado dujto lil iskirisarav tumenge, ande soste mure vorbenca opreushtyavav tumaro patyivalo duho,

2. vers

ke te serosardyon pe kodal butya, so le sunci profeti angles phendine, haj le Rajeske haj Muntosareske perdal pa aposhtolura viacarde vladimata.

3. vers

Majanglal trubuj te zhanen, ke ande palune dyesa ande xoxavjimaste phirde prassamne avena, kon kathar pengo dorope trajin,

4. vers

haj kodo phenen: „Kaj si lesko avlimasko paratnimope?” Ke zhikathar muline le dada, sakofalo kade ashilas, zhikathar o kerdyipe.

5. vers

Ba kadal chi kamen te zhanen pa kodo, ke majanglal o cheri kerdyilas, pala kodo e phuv, so perdal pa Devleski vorba anda paji kerdyilas haj ando paji sas.

6. vers

Kathar kadal duj pustisajlas e luma so atunchi sas, kana o paji shordasla.

7. vers

E phuv haj o cheri so akanak si, zhikodo Alav inkerdas pe jag, pe krisarimasko haj pe bidevlikane manushengo dyes.

8. vers

Pe jekh varisoste pale zurales len sama, mure kamade: Kaj o Raj jekh dyes kattyij, saj jekh mija bersh, haj jekh mija bersh pale, sar jekh dyes.

9. vers

O Raj chi zebil peske vorbasa, sar unyizhene gindin kodo. Toleralisarel amen, ke chi kamel, ke vi varikon te xasajveltar, ba savorazhene te patyan po bezexbunuipe.

10. vers

Le Rajesko dyes kade avelatar, sar o chor. Atunchi le chera bare glasosa nachonatar, le riga kathar o baro tatyipe bilyanatar, e phuv pale haj le zhuvinde pe late phabonatar.

11. vers

Kana sa kadal pustinape, apol soskirenge trubuj te aven ando sunto trajo tumenge,

12. vers

kon zhukaren haj zurales dorosaren le Devleske dyesesko avlipe, kana le chera phabonatar haj nachonatar, le riga pale kathar la jagako tatyipe bilyanatar?

13. vers

Ame apol – sar leski vorba phenel –nyevi phuv haj nyevo cheri zhukaras, kaj o chachipe beshel.

14. vers

Kana apol, mure kamade, kadal zhukaren, pe kodo te aven, ke uzhes bidoshako te arakhel tumen ande pacha.

15. vers

Inkren amare Rajesko toleranshipes pe tumende dikhlines muntoimaske, sar vi amaro kamado phral o Pal iskirisardasles tumenge kodale platnikipesa, so leske davadyilas.

16. vers

Vi vorbil pa kadal sa ande peske lila. But butya apol pharo si ande lende te hatyaren – kadalen le bi zhanara haj le slabura perdal xoxaven, sar vi le majbute Iskirimatan, pe pengo xasajvipe.

17. vers

Tume apol, mure kamade, pala soste sa kadal zhanen, len sama, ke le bidevlikanengo xoxavjipe tena xutyilel tumen, haj tena xasaren tumaro zuraripe.

18. vers

Barem baron ande gracija ande amare Rajesko haj muntori Jezush Kristosko pinzharipe. Leske te avel luvudyipe akanak haj pe sagutnipesko dyes! Amen.

Fejezetek:

1 2 3