Peteresko dujto lil

Fejezetek:

1 2 3

1. vers

Ba sas mashkar le manusha vi xoxamne profeti, sar vi mashkar tumende avna xoxamne sityara, save turbatura xoxamne trabi sityarena, haj kodales, kon muntosardas len, le Rajes, asvikarna, sigaslo rumuvjipe cirdines pe pende.

2. vers

But zhene patyana lenge xoxamnimata, haj anda lende kushena le chachimaske dromes.

3. vers

Anda pengo xanzhvalipe xoxamne vorbenca kamena te kinen tumen: ba o krisaripe aba dulmutanes vazdelpe pe lende, haj o pustipe, so pe lende zhukarel chi sovelatar.

4. vers

Ke o Del inke chi le doshale andyelonge chi jertisrdas, ba ande telalutna lumake sastra phandadines ando milnope shudas len, ke kothe te dukharen len haj te inkren len phangles po krisaripe.

5. vers

Haj chi jertisardas chi la dulmutana lumake, feri le Noevos, le chachipeske viacares muntosardas oxto-pesa, kana pe bi devlengire opremuklas o baro paji.

6. vers

Vi la Sodomake haj la Gomorake foros zhikaj o praho tele phabardas, pustimasa sazdelisardas len, sikadines kodalenge, kon nasul kerena;

7. vers

Le kikidisarde chache Lotos pale kathar le nasulenge azbaimata haj marhimata avrislobodisardas,

8. vers

ke voj, boldines kodales, so dikhlas haj ashundas, chacho ashilas, ba mashkar kodal beshelas, kon sako dyes nasule trabenca azbanas leske chache duhos.

9. vers

O Del zhanel te slobodisarel anda zumavjimata le deldaramnen, le nasulen pale pe krisarimasko dyes mukel, ke te bezexardyontar.

10. vers

Majfeder kodalen, kon ande bi uzhimaske dorope pala trupo phiren, haj le opralutnipes tele dikhen.

Kadal bidarimaske, phutyardej, haj chi daran le luvudyimaske butya te kushen,

11. vers

apol chaches le andyela, kon kathar pengi zor haj saktimo majbarej, chi anen pe jekhavreste kushlimaski krisaripe.

12. vers

Ba kadala, sar le chalade pedura, kushen sa kodo, so chi hatyaren. Ba xasajvenatar ande pengo rumuvjipe.

13. vers

Resena le nasulimasko potyinipe sa kodala, kon lashimaske inkren le sako dyesesko vojisaripes. Ando mishto hatyaripe tasiline melalyimata si von, kon pe penge bare xamimata vojin pe tumende.

14. vers

Lenge jakha fimlalisardyol kathar ansuripe oprephaglipe haj kathar le sagutne bezexarimata. Pende xoxaven le slabone duhon, ke lengo ilo po xanzhvalipe si avri zumado. Le armajaske shave si von,

15. vers

kon mukline o vorta drom, haj xasajlinetar. Pala Beoresko shavo, pala Balam geline, kon majfeder kamelas le nasulimasko potyinipe,

16. vers

ba vi krisardyilas anda peske bezexa: o pharipe phirado muto pedo duma das pe manushikano glaso, haj nashtisardas le profetasko dilipe.

17. vers

Bi pajeskire ab si von, kathar balval nashade nororaj –, o majkalo tunyarikipe zhukarel pe lende!

18. vers

Ke khanchimata vorbin phutyardes, haj pe marhimasle trabi xoxaven kodalen, kon daba muntusardyiline kathar le nasula.

19. vers

Slobodipe phenen lenge, apol pale von si le rumuvjimaske slugi, ke kas varikon tele viktornisarel, kodaleske vi sluga kerdyol.

20. vers

Apol kodal, kon peredal pa amare Rajesko haj muntoimasko Jezush Kristosko pinzharipe muntosardyiline kathar la lumake zhungalimata, ba pale milnosardyiline ande kadal, haj mardyiline, kadi majpaluni traba majnasul si lenge sar e angluni.

21. vers

Majmishto avilino lenge le chachipesko drom china chi te pinzhardinesas, ke pala kodalesko pinzharipe te muken o sunto vladipe, so lenge dine.

22. vers

Ke andre pherdyol pe lende kodi chachi vorba:
„Palpale zhal o zhukel kaj kodo, so avri shanglas”, haj:
„Palpale pashjilas o balo ande chik, ande soste pashjolas”.

Fejezetek:

1 2 3