Peteresko angluno lil

Fejezetek:

1 2 3 4 5

1. vers

Zhikade vi le romnya te muken pen penge romenge, ke kana unyizhene vi tena patyan le alaveske, le romnyange trabi vi kade bivorbako te patyavel len,

2. vers

kana dikhen tumaro uzho patyivalo deldaramno trajo.

3. vers

Na le avralutne balenge shukarimata, bake ke somnakaj bake fimlale gada phiraven kodo te avel lengo shukaripe,

4. vers

ba kodo so ando ilo garadyol, bi nachilimaski avucija: o blindope haj e pacha. Kadi kuch si ande Devleske jakha.

5. vers

Ke varikana kade shukaravenas pen opre le sunci haj ando Del patyamne romnya, muklisardines penge romenge,

6. vers

sar e Shara mukelaspe le Abrahameske, peske romeske phenindes les, kaske tume sheja san, kana lasho keren, haj kathar khanchi pharipe chi daran.

7. vers

Ba vi tume romale, aven lashe kaj tumare romnya, patyivin len, sar le maj slabone romnyimatan, haj sar amalen ande gracijako trajipe, ke tumare rudyima khanchi tena inkrel palpale.

8. vers

Palunes pale aven savorazhene jekh hatyarde, kamen le phralikanipes, aven jertimaske, haj muklane!

9. vers

Na den palpale o nasulipe nasulipesa, haj chi o kushlipe kushlipesa, barem phenen ashtyilipe: ke pe kodo arakhadyiline, ke ashtyilipe te muklyosardyol pe tumende.

10. vers

„Ke kon kamel le trajos te kamel,
haj lashe dyesa fajas les te dikhel,
te inkrel palpale peski shib kathar o nasul,
haj lesko muj tena vorbil xoxavjipe.

11. vers

Te boldelpe kathar o nasul,
haj te kerel lasho: te rodel la pacha,
haj te kerel kodala.

12. vers

Ke le Rajeske jakha pe chachende hodinisardyon,
haj leske kan ashunen pe lenge rudyimata:
ba le Rajeski mosura xolyako si pe nasul pecimaskire”.

13. vers

Kon shaj kerel tumenge dosh, kana e lasheske avna amala?

14. vers

Ba vi te dukhardyona anda chachipe, baxtale sanle. Kathar kadi dar na daran, haj na boldadyon kethane,

15. vers

ba len sama suntosardes ande tumaro ilo Raj Kristos. Sagda tordyon gata pe kodo, ke vorba te zhanen te den sakoneske, kon pa kodo sperantimasko kerdyipe pushen tumen, so ande tumende si.

16. vers

Ba kado blindopesa haj darasa, lashe duhoske hatyaripesa te keren, ke kon xoxaven pe tumaro trajo ando Kristo, te lazhardyon tele ande kodo, sosa tumen marhisaren.

17. vers

Ke majmishto si – kana o Del kade kamel – lasho kerdyipe kerindes te dukhajven, sar nasul kerdisardines.

18. vers

Ke vi o Kristo mulas jekhar anda bezexa, o Chacho anda bezexasle, ke tumen kaj o Del te ingrel. Kathar o trupo chaches ke mudardine les, ba o Duho opretrajardas les.

19. vers

Ande leste gelastar, ke vi kodalenge te viacarel o muntoipe, kon ande robija sas,

20. vers

kon varikana bi patyamne sas, kana o Del pachasa zhukarelas ande Noevoske dyesa, zhikaj o bero kerdyilas, ande soste cerra, numa oxto duho muntosardyilas kathar o paji.

21. vers

Kado si akanak o bolipe, so akanak tumen muntul, na kathar le truposko melalyimasko tele thovjipe, ba rudyipe kaj o Del, ke te del lasho duhikano hatyaripe perdal pa Jezush Kristosko opretrajisaripe,

22. vers

kon pe Devleski chachi rig si, pala soste opre gelas ando rajo, haj tala pesko rajipe las le andyelon haj saktimon haj zoran.

Fejezetek:

1 2 3 4 5