Janoshesko angluno lil

Fejezetek:

1 2 3 4 5

1. vers

Dikhen, sar kamelas amen o Dad, ke le Devleske shavorenge phenen amen, haj vi kodal sam! Anda kodo chi pinzharel amen e luma, ke chi les chi pinzharel.

2. vers

Mure kamade, akanak le Devleske shavora sam, ba inke chi zhanglyilas avri, ke so avasa. Ba zhanas, ke kana sikadyola, kasave avasa, sar voj, ke dikhasa les, sar so si.

3. vers

Sa kodo, kon kado sperantisarel lestar, suntosarelpe, sar kaj vi voj sunto si.

4. vers

Sa kodo, kon bezex kerel, vi nasulipe kerel, ke e bezex nasulipe si.

5. vers

Haj zhanen, ke voj anda kodo sikadyilas, ke te lel amare bezexa, haj ande leste naj bezex.

6. vers

Sa kodo, kon ande leste ashol chi bezexarel, haj sa kodo, kon bezexarel, chi dikhlas haj chi pinzharelas les.

7. vers

Mure shavora, khonyik tena xoxavel tumen! Kon chachipe kerel, kodo chachoj, sar kaj vi voj chacho si.

8. vers

Kon bezex kerel kathar o beng si, ke o beng zhikathar o anglalipe bezexarel. Anda kodo sikadyilas le Devlesko Shavo, ke tele te rumusarel le bengeske kerdyimatan.

9. vers

Sa kodo, kon kathar o Del arakhadyilas, bezex chi kerel, ke o Del ande leste si, haj nashtig bezexarel, ke kathar o Del arakhadyilas.

10. vers

Pa kado shaj pinzharen opre, ke kon si le Devleske shavora, haj ke kon le bengeske shavora. Sa kodo, kon na o chachipe kerel, haj chi kamel peske phrales, na kathar o Del si.

11. vers

Ke kodi viaca, so zhikathar o anglalipe ashundine, ke te kamas jekhavres.

12. vers

Na kade, sar o Kain, kon kathar o nasul sas, haj mudardas peske phrales. Haj anda soste mudardas les? Anda kodo, ke leske kerdyimata nasula sas, leske phraleske kerdyimata pale chache.

13. vers

Na dikhen bari phralale, kana e luma rucil tumen.

14. vers

Ame zhanas, ke anda meripe perdal gelam ando trajo, ke kamas amare phralen. Kon chi kamel ando meripe ashol.

15. vers

Sa kodo, kon rucil peske phrales mudari si. Haj mishto zhanen, ke chi jekhe mudres naj sagutno trajo, so asholas ande leste.

16. vers

Anda kado pinzhardam le kamipes, ke voj pesko trajo das anda amende, kade vi amenge amaro trajo trubuj te das anda amare phral.

17. vers

Kas si barvalipe, haj dikhel peske pharales, ke chorroj, ba phandavel pesko ilo angla leste, atunchi sar ashola ande kodo le Devlesko kamipe?

18. vers

Mure shavora! Na kamas vorbenca, chi shibasa, ba kerdyipesa haj chachipesa!

19. vers

Pa kado pinzharas opre, ke ando chachipe sam, haj anglaleste pachardyola amaro ilo. 20 Ke kana vi te dosharel amen amaro ilo, o Del majbaro si kathar amaro ilo, haj sakofalo zhanel.

21. vers

Mure kamade! Kana amaro ilo chi dosharel amen, patyape si amen kaj o Del,

22. vers

haj zhiso mangas, las kodo lestar, ke andre inkras leske vladimata, haj kodo keras, so skunpoj angla leste.

23. vers

Haj lesko vladipe kodoj, ke te patyas ande leske Shavesko ande le Jezush Kristosko anav, haj te kamas jekhavres, sar vladisardasles amenge.

24. vers

Kon andre inkrel leske vladimata, ando Del ashol, haj vi o Del ande leste. Apol ke voj ande amende ashol, kodo kathar o Sunto Duho zhanas avri, so amenge das.

Fejezetek:

1 2 3 4 5